ເດືອນກັນຍາທີ່ຜ່ານມາ, ນັກຮຽນຂັ້ນ ປ.1 ທົ່ວປະເທດ ໄດ້ເລີ່ມຕົ້ນສົກຮຽນໃໝ່ພ້ອມກັບຫຼັກສູດຊັ້ນປະຖົມສຶກສາສະບັບປັບປຸງໃໝ່. ຫຼັກສູດ ຂັ້ນ ປ.1 ສະບັບປັບປຸງໃໝ່ ແມ່ນບາດກ້າວທຳອິດໃນການພັດທະນາຫຼັກສູດຊັ້ນປະຖົມສຶກສາ ແລະ ຈັດຕັ້ງປະຕິບັດໂດຍ ກະຊວງສຶກສາທິການ ແລະ ກິລາ (ສສກ) ໂດຍການສະໜັບສະໜູນຈາກລັດຖະບານອົດສະຕຣາລີ ແລະ ສະຫະພາບເອີຣົບ. ສສກ ຈະດຳເນີນການປັບປຸງໄປເທື່ອລະຂັ້ນຮຽນທຸກໆປີຈົນຮອດຂັ້ນ ປ.5. ຈຸດຫຼັກໆຂອງຫຼັກສູດສະບັບປັບປຸງໃໝ່ແມ່ນນັກຮຽນເປັນໃຈກາງ ພ້ອມວິທີການສອນແບບໃໝ່ທີ່ເນັ້ນໃສ່ການຮຽນທີ່ເນັ້ນການປະຕິບັດຕົວຈິງ. ນຳໃຊ້ວິທີການນີ້ເພື່ອການຮຽນຮູ້ຂອງເດັກນ້ອຍໂດຍການເຮັດກິດຈະກຳ, ແບ່ງປັບແນວຄວາມຄິດ ແລະ ນຳໃຊ້ສິ່ງທີ່ພວກເຂົາໄດ້ຮຽນຮູ້.
ທີມຂຽນຫຼັກສູດຈຳນວນ 38 ທ່ານ ຈາກ ສະຖາບັນຄົ້ນຄວ້າວິທະຍາສາດການສຶກສາ (ສວສ) ໄດ້ຮ່າງ, ອອກແບບ ແລະ ຂຽນແຕ່ລະວິຊາສຳລັບຄູ່ມືຄູ ແລະ ປຶ້ມແບບຮຽນສຳລັບນັກຮຽນ. ທີມຂຽນຫຼັກສູດໄດ້ແບ່ງເປັນລາຍວິຊາ ເຊັ່ນວ່າ: ວິຊາພາສາລາວ, ວິທະຍາສາດ ແລະ ສິ່ງແວດລ້ອມ, ຄະນິດສາດ, ຄຸນສົມບັດ, ສິລະປະກຳ ແລະ ຫັດຖະກຳ, ສິລະປະດົນຕີ, ພະລະສຶກສາ, ພາສາອັງກິດ (ເລີ່ມໃນຂັ້ນ ປ.3) ແລະ ສັງຄົມສຶກສາ (ເລີມໃນຂັ້ນ ປ.4).
ພ້ອມກັບສື່ການຮຽນ ແລະ ການສອນແບບໃໝ່, ຄູຮຽນຮູ້ທີ່ຈະອຳນວຍຄວາມສະດວກໃນການຮຽນຫຼາຍກວ່າການໃຫ້ພຽງຂໍ້ມູນ.
ນັກຮຽນຮຽນຮູ້ຈາກການເຮັດ, ການເຮັດກິດຈະກຳຕົວຈິງ ແລະ ສະທ້ອນຄືນກ່ຽວກັບສິ່ງທີ່ພວກເຂົາເຮັດ. ພາຍໃຕ້ຫຼັກສູດສະບັບປັບປຸງໃໝ່, ເດັກນ້ອຍໄດ້ມີສ່ວນຮ່ວມຢ່າງຫ້າວຫັນໃນການຮຽນຮູ້ຂອງຕົນ, ການຊ່ວຍເຫຼືອເຊິ່ງກັນ ແລະ ກັນ, ຄວາວສົນໃຈກັບສື່ການຮຽນ ແລະ ການທົດລອງຜ່ານການເຮັດກິດຈະກຳຕ່າງໆ.
ເພື່ອໃຫ້ສາມາດປະຕິບັດວິທີການສອນໃໝ່ນີ້ໃນຫ້ອງຮຽນ, ທີມຂຽນຫຼັກສູດໄດ້ອອກແບບບົດຮຽນພ້ອມກັບກິດຈະກຳທີ່ເຮັດໃຫ້ນັກຮຽນມີສ່ວນຮ່ວມ ແລະ ສົ່ງເສີມໃຫ້ພວກເຂົາໄດ້ຮັບຂໍ້ມູນໃໝ່ໆ ແລະ ນຳໃຊ້ຄວາມຮູ້ໃໝ່. ພ້ອມນັ້ນ, ກໍ່ຍັງມີປຶ້ມຄູ່ມືຄູ ທີ່ມີຄຳແນະນຳລະອຽດຫຼາຍກ່ຽວກັບວິທີການສອນບົດຮຽນໃນວິທີ ທີ່ຈະເຮັດໃຫ້ນັກຮຽນມີສ່ວນຮ່ວມ ແລະ ດຶງດູດກັບຂະບວນການຮຽນຮູ້ຫຼາຍຂຶ້ນ.
ທີມຂຽນຫຼັກສູດເຂົ້າຮ່ວມກອງປະຊຸມພັດທະນາຂີດຄວາມສາມາດຢ່າງເປັນເປັນປະຈຳເພື່ອຝຶກທັກສະຂອງພວກເຂົາໃຫ້ເຂັ້ມແຂງ ໃນການອອກແບບ ແລະ ພັດທະນາສື່ສຳລັບການຮຽນທີ່ເນັ້ນການປະຕິບັດຕົວຈິງ. ໃນລະຫວ່າງວັນທີ 5 – 7 ກຸມພາ ໄດ້ມີກອງປະຊຸມພັດທະນາວິຊາຊີບຢູ່ທີ່ ສວສ, ທີມຂຽນຫຼັກສູດຂັ້ນ ປ.3 ໄດ້ຝຶກການຂຽນບົດຮຽນທີ່ສົ່ງເສີມການມີສ່ວນຮ່ວມ ແລະ ຄວາມກະຕືລືລົ້ນ, ພິຈາລະນາຫຼັກການການຮຽນທີ່ເນັ້ນການປະຕິບັດຕົວຈິງ ແລະ ໃສ່ໃຈໃນເລື່ອງຄວາມເທົ່າທຽມດ້ານບົດບາດຍິງ-ຊາຍ ແລະ ການມີສ່ວນຮ່ວມໃນສັງຄົມໃຫ້ຫຼາຍຂຶ້ນໃນສື່ການສອນ ແລະ ການຮຽນ ແລະ ການປະຕິບັດ.
ຜູ້ຂຽນຫຼັກສູດຍັງໄດ້ທົດລອງການສອນໃນຫ້ອງຮຽນຂັ້ນ ປ.3 ເພື່ອກຳນົດ “ຄວາມສາມາດໃນການສອນ” ບົດຮຽນຂອງພວກເຂົາ. ຜູ້ຂຽນຫຼັກສູດຈາກ 7 ຂົງເຂດຫຼັກສູດໄດ້ຂຽນ ແລະ ຝຶກການຈັດກິດຈະກຳການຮຽນທີ່ເນັ້ນການປະຕິບັດຕົວຈິງກັບເພື່ອນຮ່ວມງານ ແລະ ໄດ້ຮັບຄຳຄິດເຫັນເພື່ອນຳໄປປັບປຸງ. ກິດຈະກຳນີ້ແມ່ນອອກແບບມາເພື່ອຊ່ວຍໃຫ້ຜູ້ຂຽນຫຼັກສູດເຂົ້າໃຈເຖິງສິ່ງທ້າທາຍທີ່ຄູປະສົບພົບພໍ້ໃນໂຮງຮຽນທົ່ວປະເທດລາວ ແລະ ເພື່ອເພີ່ມຂີດຄວາມສາມາດໃນການພັດທະນາທັກສະການມີສ່ວນຮ່ວມ, ການຖອດຖອນບົດຮຽນການເຮັດ ແລະ ຮຽນຮູ້ຕົວຈິງ ທີ່ສາມາດນຳໃຊ້ໃນບົດຮຽນ ແລະ ສົ່ງເສີມການນຳໃຊ້ວັດສະດູທີ່ມີໃນທ້ອງຖິ່ນ.
ທີມຂຽນຫຼັກສູດ ສວສ ຈະສືບຕໍ່ປັບປຸງຄວາມສາມາດໃນການອອກແບບບົດຝຶກຫັດການຮຽນ ທີ່ຈະຊ່ວຍເດັກນ້ອຍລາວໃນການປັບປຸງທັກສະການອ່ານ, ການຂຽນ, ການຄິດ, ການແກ້ໄຂບັນຫາ ແລະ ການຄິດແບບສ້າງສັນ. ຄູທົ່ວປະເທດຈະສອນຫຼັກສູດຂັ້ນ ປ.3 ສະບັບປັບປຸງໃໝ່ນັບແຕ່ເດືອນກັນຍາ 2021 ເປັນຕົ້ນໄປ.