ກອງປະຊຸມວິຊາການຂອງແຜນງານການປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນສຳລັບການສຶກສາຂັ້ນພື້ນຖານ ໃນ ສປປ ລາວ (BEQUAL) ເພື່ອປຶກສາຫາລືກ່ຽວກັບຄວາມຄືບໜ້າ, ສິ່ງທ້າທາຍ ແລະ ການດໍາເນີນກິດຈະກໍາຕ່າງໆໃນການຈັດຕັ້ງປະຕິບັດຫຼັກສູດຊັ້ນປະຖົມສຶກສາ ສະບັບປັບປຸງໃໝ່ ໄດ້ໄຂຂຶ້ນຢ່າງເປັນທາງການ ໃນຄັ້ງວັນທີ 13 ເດືອນ ຕຸລາ ໂດຍການເປັນປະທານຂອງທ່ານ ປອ. ບຸນປັນ ໄຊມູນຕຣີ, ຫົວໜ້າກົມແຜນການ ກະຊວງສຶກສາທິການ ແລະ ກິລາ ແລະ ປະທານຮ່ວມທ່ານນາງ ອານ່າ ໄດສັນ, ເລຂາເອກ ສະຖານທູດອົດສະຕຣາລີ ປະຈຳ ສປປ ລາວ.
ກອງປະຊຸມ ໄດ້ດໍາເນີນໃນຮູບແບບທາງໄກຢ່າງເຕັມຮູບແບບ ທັງນີ້ກໍເພື່ອປະຕິບັດຕາມມາດຕະການການປ້ອງກັນການແຜ່ລະບາດຂອງພະຍາດໂຄວິດ 19. ກອງປະຊຸມດັ່ງກ່າວມີຜູ້ເຂົ້າຮ່ວມຫຼາຍກວ່າ 75 ທ່ານຈາກກົມກອງອ້ອມຂ້າງກະຊວງ ສສກ, ພະແນກສຶກສາທິການ ແລະ ກິລາແຂວງ 18 ແຂວງ, ວິທະຍາໄລຄູ 8 ແຫ່ງ, ສະຖານບັນ ແລະ ສູນການສຶກສາ ແລະ ຄະນະທີມງານຈາກແຜນງານບີຄວາ ເພື່ອແລກປ່ຽນບົດຮຽນ ແລະ ສິ່ງທ້າທາຍໃນການຈັດຕັ້ງປະຕິບັດວຽກງານຂອງພາກສ່ວນຂອງຕົນ.
ນອກນີ້, ປະທານ ແລະ ປະທານຮ່ວມຂອງກອງປະຊຸມ ກໍໄດ້ສະແດງຄວາມຊົມເຊີຍຕໍ່ກັບບັນດາຜູ້ເຂົ້າຮ່ວມທັງໝົດ ທີ່ມີຄວາມມຸ້ງໝັ້ນ ແລະ ຄວາມຕັ້ງໃຈໃນການດຳເນີນທຸກວຽກງານເພື່ອຮັບປະກັນໃຫ້ບັນລຸເປົ້າໝາຍທີ່ວາງໄວ້ໂດຍຜ່ານວິກິດຄວາມຫຍຸ້ງຍາກໃນໄລຍະການແຜ່ລະບາດຂອງພະຍາດໂຄວິດ 19.
ທ່ານ ປອ ບຸນປັນ ໄຊມູນຕຣີ ໄດ້ໃຫ້ຄໍາເຫັນວ່າ: “ເຖິງວ່າຈະມີສິ່ງທ້າທາຍໃນໄລຍະວິກິດການຂອງການລະບາດຂອງພະຍາດໂຄວິດ 19, ແຕ່ທຸກໆຄົນໄດ້ເຮັດວຽກຢ່າງຂຸ້ນຂ້ຽວເພື່ອຊອກຫາວິທີແກ້ໄຂ ແລະ ຜ່ານຜ່າວິກິດດັ່ງກ່າວໄດ້. ສົກຮຽນໄດ້ເປີດຢ່າງເປັນທາງການ ຊຶ່ງນັ້ນກໍໝາຍຄວາມວ່າອຸປະກອນຫຼັກສູດຊັ້ນປະຖົມສຶກສາ ປີທີ 3 ສະບັບປັບປຸງໃໝ່, ສື່ການຮຽນການສອນ ໄດ້ຈັດສົ່ງແຈກຢາຍໄປເຖິງໂຮງຮຽນ ແລະ ຄູສອນຈໍານວນ ຫຼາຍກວ່າ 90% ໄດ້ຮັບການຝຶກອົບຮົມວິທີການຮຽນການສອນແບບໃໝ່ແລ້ວ. ນອກຈາກນີ້, ທ່ານຍັງໄດ້ກ່າວສະແດງຄວາມຂອບໃຈມາຍັງກະຊວງການຕ່າງປະເທດ ແລະ ການຄ້າ ປະເທດອົດສະຕຣາລີ ປະຈຳ ສປປ ລາວ ແລະ ລັດຖະບານອົດສະຕຣາລີ ທີ່ໄດ້ໃຫ້ການສະໜັບສະໜູນຂະແໜງສາທາລະນະສຸກ ສຳລັບແຜນວຽກການສັກຢາປ້ອງກັນພະຍາດ ແລະ ສ້າງຄວາມອາດສາມາດໃຫ້ກັບລັດຖະບານ ສປປ ລາວ ໃນການຕອບໂຕ້ຕໍ່ກັບການແຜ່ລະບາດຂອງພະຍາດໂຄວິດ 19 ເພື່ອສາມາດເຮັດໃຫ້ມາດຕະການການຈໍາກັດການເດີນທາງສັນຈອນ (ລັອກດາວ) ຜ່ອນຄາຍລົງ.
ທ່ານ ນາງ ອານ່າ ໄດສັນ ໄດ້ກ່າວຍ້ອງຍໍ ແລະ ຊົມເຊີຍຕໍ່ກັບຄວາມທຸ້ມເທ ແລະ ເຮັດວຽກຢ່າງຂຸ້ນຂ້ຽວຂອງທຸກພາກສ່ວນວ່າ: “ກ່ອນອື່ນໝົດ, ຂ້າພະເຈົ້າ ຂໍສະແດງຄວາມຍ້ອງຍໍ ແລະ ຊົມເຊີຍມາຍັງທີມງານຂອງກະຊວງສຶກສາທິການ ແລະ ກິລາ ໃນທົ່ວທຸກຂັ້ນ ແລະ ທີມງານຂອງແຜນງານບີຄວາ ທີ່ໄດ້ທຸມເທຄວາມສາມາດ ແລະ ຊອກຫາທຸກວິທີທາງໃນການປັບປ່ຽນການເຮັດວຽກໄດ້ຢ່າງໄວວາໃນໄລຍະຜ່ານມາຕໍ່ກັບແຜນການຈັດຕັ້ງປະຕິບັດຂອງແຜນງານເພື່ອຫຼຸດຜ່ອນຜົນກະທົບຈາກການແຜ່ລະບາດຂອງພະຍາດໂຄວິດ 19. ຄວາມມຸ້ງໝັ້ນ ແລະ ຄວາມຕັ້ງໃຈຂອງທ່ານ ເປັນການຢັ້ງຢືນວ່າແຜນກິດຈະກໍາ ໄດ້ບັນລຸຕາມເປົ້າໝາຍຕາມທີ່ວາງໄວ້.”
ເຖິງແມ່ນວ່າຈະມີການຈໍາກັດການເດີນທາງສັນຈອນກໍຕາມ ແຕ່ລັດຖະບານອົດສະຕຣາລີ ໂດຍຜ່ານແຜນງານບີຄວາ ສາມາດໃຫ້ການສະໜັບສະໜູນກະຊວງສຶກສາທິການ ແລະ ກິລາ ໄດ້ສໍາເລັດການຈັດພິມ ແລະ ແຈກຢາຍສື່ການຮຽນການສອນສຳລັບປຶ້ມແບບຮຽນ ແລະ ປຶ້ມຄູ່ມືຄູ ຂອງຫຼັກສູດຊັ້ນປະຖົມສຶກສາສະບັບປັບປຸງໃໝ່ ປີທີ 3 ຈຳນວນ 612,600 ຫົວ ແລະ ແຈກຢາຍໃຫ້ທຸກເມືອງກ່ອນເປີດສົກຮຽນ, ຈັດຝຶກອົບຮົມຄູໃຫ້ແກ່ຄູຝຶກ ຈຳນວນ 663 ທ່ານ ແລະ ຈັດຝຶກອົບຮົມຄູສອນຂັ້ນ ປ.3 ແບບໜ້າເຊີ່ງໜ້າ ຈຳນວນ 9,645 ທ່ານ ແລະ ຈັດຝຶກອົບຮົມຄູສຶກສານິເທດຈຳນວນ 366 ທ່ານ ໄດ້ເກືອບໝົດທຸກແຂວງຕາມແຜນທີ່ວາງໄວ້ ພ້ອມກັບການຮັກສາມາດຕະການປ້ອງກັນການແຜ່ລະບາດຂອງພະຍາດໂຄວິດ 19, ພ້ອມທັງສືບຕໍ່ພັດທະນາຫຼັກສູດຊັ້ນປະຖົມສຶກສາ ປີທີ 4 ແລະ ເປີດນໍາໃຊ້ຫຼັກສູດສ້າງຄູຢູ່ໃນວິທະຍາໄລຄູທຸກແຫ່ງ.
ນອກຈາກນີ້ ຄວາມມຸ້ງໝັ້ນ ແລະ ຄວາມຄືບໜ້າຂອງແຜນງານກໍຄືການນໍາເອົາວຽກງານສົ່ງເສີມບົດບາດຍິງ-ຊາຍ ແລະ ການສຶກສາຮຽນຮ່ວມ ມາເປັນອີກວຽກງານໜຶ່ງທີ່ສຳຄັນ ຊຶ່ງໄດ້ມີການເນັ້ນໜັກເປັນສະເພາະຄື: ການນໍາສະເໜີພາບລັກວຽກງານການສົ່ງເສີມດ້ານບົດບາດຍິງ-ຊາຍ ແລະ ການສຶກສາຮຽນຮ່ວມ ໃນສື່ການຮຽນການສອນ, ຄູ່ມືຄຳແນະນຳພາກປະຕິບັດໃນການຝຶກອົບຮົມ ແລະ ກິດຈະກຳຕ່າງໆ, ການຈັດຝຶກອົບຮົມຮ່ວມກັບທີມງານສື່ສານຂອງກະຊວງ ສສກ ກ່ຽວກັບການສົ່ງເສີມດ້ານບົດບາດຍິງ -ຊາຍ ແລະ ການສຶກສາຮຽນຮ່ວມ, ແລະ ວິດີໂອສຳລັບການພັດທະນາຄູທີ່ເພີ່ມພາສາມືເຂົ້າໃນວິດີໂອ. ນອກນີ້ ຍັງມີການທົດລອງນະວະຕະກໍາ ຫຼາຍອັນແກ້ໄຂສິ່ງທີ່ເປັນອຸປະສັກຕໍ່ກັບວຽກງານການສົ່ງເສີມດ້ານບົດບາດຍິງ -ຊາຍ ແລະ ການສຶກສາຮຽນຮ່ວມ ເຊັ່ນ: ໂຄງການທົດລອງຝຶກເວົ້າພາສາລາວ ສໍາລັບເດັກທີ່ບໍ່ເວົ້າພາສາລາວຢູ່ເຮືອນ, ໂຄງການທົດລອງການຮຽນການສອນແບບປະສົມປະສານ ໂດຍຜ່ານການຝຶກອົບຮົມຮູບແບບອອນລາຍ ສໍາລັບຜູ້ເຂົ້າຮ່ວມທີ່ຢູ່ເຂດຫ່າງໄກຊອກຫຼີກ ຫຼື ການສ້າງວິດິໂອສາລະຄະດີຄູຕົວແບບຊຶ່ງເປັນການນໍາສະເໜີ ແລະ ຖ່າຍທອດຜົນສໍາເລັດການຮຽນການສອນໃນການສຶກສາຮຽນຮ່ວມ.
ຜ່ານກອງປະຊຸມດັ່ງກ່າວ ຜູ້ເຂົ້າຮ່ວມໄດ້ສະແດງຄວາມຄິດເຫັນວ່າບັນຫາສິ່ງທ້າທາຍອັນທີ່ໃຫຍ່ຫຼວງຂອງການການແຜ່ລະບາດຂອງພະຍາດໂຄວິດ 19 ແມ່ນເຮັດໃຫ້ໂຮງຮຽນຫຼາຍແຫ່ງໄດ້ປິດເປັນເວລາດົນ. ນອກນີ້ ຜູ້ເຂົ້າຮ່ວມໄດ້ແລກປ່ຽນຄໍາຄິດເຫັນຫ່ວງໃຍຕໍ່ການລືມບົດຮຽນ ແລະ ການເຂົ້າເຖິງທາງເລືອກການຮຽນໃນຮູບແບບທາງໄກ ແລະ ທາງອອນລາຍ ໄດ້ຢ່າງທົ່ວເຖິງ. ຜູ້ເຂົ້າຮ່ວມຈາກພະແນກສຶກສາທິການ ແລະ ກິລາແຂວງ ຕ່າງໆກໍໄດ້ໃຫ້ຄໍາເຫັນວ່າ ພໍ່ແມ່ນັກຮຽນ ຍັງບໍ່ລົງທະບຽນການເຂົ້າຮຽນໃຫ້ລູກຫຼານຂອງຕົນ ແລະ ມີຄວາມກັງວົນວ່ານັກຮຽນຫຼາຍຄົນຈະອອກໂຮງຮຽນຢ່າງຖາວອນ ຖ້າຫາກບໍ່ມີການເປີດການຮຽນການສອນແບບເຊິ່ງໜ້າຄືນໃນໃກ້ໆນີ້. ນອກນີ້ ຍັງມີຄວາມຫຍຸ້ງຍາກທາງດ້ານການເສື່ອຕໍ່ອິນເຕີເນັດ, ຄວາມສາມາດນໍາໃຊ້ການໃຫ້ການບໍລິການທາງອອນລາຍ, ການຂາດອຸປະກອນໃນການເຊື່ອມຕໍ່ ຫຼື ຍ້ອນພໍ່ແມ່ຂອງນັກຮຽນບໍ່ຮູ້ວິທີຊ່ວຍເຫຼືອລູກຫຼານຂອງຕົນເອງເຂົ້າຮຽນອອນລາຍ ກໍ່ໃຫ້ເກີດສິ່ງທ້າທາຍສໍາລັບການຮຽນການສອນໃນຮຸບແບບອອນລາຍສຳລັບເດັກນ້ອຍທີ່ຮຽນໃນຊັ້ນປະຖົມສຶກສາເປັນສ່ວນຫຼາຍ. ບັນດາເດັກດ້ອນໂອກາດໃນເຂດຫ່າງໄກສອກຫຼີກ ແລະ ເຂດຊົນນະບົດ, ເດັກເພດຍິງ, ແລະ ເດັກທີ່ມີຄວາມພິການແມ່ນໄດ້ຮັບຜົນກະທົບຫຼາຍກວ່າເດັກກຸ່ມອື່ນ. ທ່ານ ປອ ບຸນປັນ ຍັງໄດ້ກ່າວຕື່ມອີກວ່າ: “ຖ້າເປັນໄປໄດ້ ການຮຽນການສອນແບບໜ້າເຊີ່ງໜ້າ ເປັນທາງເລືອກທີ່ດີທີ່ສຸດ ແຕ່ພວກເຮົາທຸກຄົນກໍຫວັງວ່າ ສະຖານະການທີ່ຍັງບໍ່ສາມາດເປີດການຮຽນການສອນໄດ້, ຄູສອນຈະສາມາດເປີດການຮຽນການສອນໃນຮູບແບບອອນລາຍແມ່ນເປັນທາງເລືອກໜຶ່ງໃນເຂດຫ່າງໄກຊອກຫຼີກ ເພື່ອຊ່ວຍໃຫ້ນັກຮຽນຂອງພວກເຂົາ.”
ໃນຕອນທ້າຍຂອງກອງປະຊຸມ, ລັດຖະບານອົດສະຕຣາລີ ແລະ ກະຊວງສຶກສາທິການ ແລະ ກິລາ ໄດ້ຮັບຮອງເອົາແຜນງານການຈັດຕັ້ງປະຕິບັດຂອງໄລະຍະເດືອນທີ່ຍັງເຫຼືອ ຂອງໄລຍະທີ 1 ຂອງແຜນງານບີຄວາ ຈົນຮອດວັນທີ 30 ເດືອນ ມີຖຸນາ 2022. ທ່ານ ປອ ບຸນປັນ ໄດ້ກ່າວປິດກອງປະຊຸມໃນຄັ້ງນີ້ວ່າ: “ແຜນງານບີຄວາ ໄລຍະທີ 1 ແມ່ນຈະຮອດວັນທີ 30 ເດືອນ ມີຖຸນາ 2022 ແລະ ເຫັນວ່າມີຫຼັກຖານໃນທາງບວກຫຼາຍອັນທີ່ພວກເຮົາໄດ້ໄດປະຕິບັດຮ່ວມກັນເພື່ອປັບປຸງອຸປະກອນຫຼັກສູດ ແລະ ການຮຽນການສອນ ໄດ້ປະສົບຜົນສໍາເລັດ. ສິ່ງນີ້ເປັນເວລາອັນສໍາຄັນເພື່ອນໍາມາສົນທະນາກ່ຽວກັບສິ່ງທີ່ຖອດຖອນໄດ້ຈາກ ການຈັດຕັ້ງປະຕິບັດວຽກງານໃນໄລຍະທີ 1 ນີ້ ສະນັ້ນການສ້າງແຜນວຽກງານໄລຍະທີ 2 ແມ່ນອີງໃສ່ຜົນສຳເລັດຂອງພວກເຮົາ ແລະ ວິທີການແກ້ໄຂ ບັນຫາທ້າທາຍທີ່ພວກເຮົາໄດ້ປະເຊີນມາ.”