ບໍ່ເປັນທີ່ໜ້າສົງໃສເລີຍວ່າ ຂີ້ເຫຍື້ອທີ່ເປັນພາສຕິກເປັນແຫຼ່ງມົນລະພິດທີ່ສຳຄັນ ເພາະຂີ້້ເຫຍື້ອພາສຕິກຈະບໍ່ຍ່ອຍສະຫຼາຍໂຕໄປເອງ ແຕ່ມັນຈະປ່ຽນຂະໜາດໃຫ້ນ້ອຍລົງ ແລະ ນ້ອຍລົງ ແລ້ວກໍ່ຝັງລົງປົນໄປໃນດິນ ແລະ ປ່ອຍສານເຄມີ ເຊິ່ງທ້າຍທີ່ສຸດກໍ່ຈະເປັນມົນລະພິດໃນນ້ຳໃຊ້. ຂີ້ເຫຍື້ອຈາກພາສຕິກ ມີຜົນສະທ້ອນຕໍ່ສຸຂະພາບຂອງຄົນ, ທຳລາຍຊັ້ນພື້ນດິນຂອງພວກເຮົາ, ທຳລາຍສັດປ່າ ແລະ ສັດນ້ຳ. ແຕ່ພວກເຮົາກໍ່ຍັງໃຊ້ ແລະ ຖິ້ມຂີ້ເຫຍື້ອພາສຕິກຢູ່ເຮືອນຂອງພວກເຮົາ, ຢູ່ຫ້ອງການຂອງພວກເຮົາ, ຢູ່ໂຮງຮຽນຂອງພວກເຮົາ…
ທີມງານບີຄວາ ໃຫ້ຄຳໝັ້ນສັນຍາວ່າຈະຫຼຸດຜ່ອນການສ້າງຜົນກະທົບທາງລົບຕໍ່ສິ່ງແວດລ້ອມໃຫ້ໜ້ອຍລົງ ແລະ ຕັດສິນໃຈທີ່ຈະເລີ່ມປະຕິບັດການຫຼຸດຜ່ອນ ແລະ ກ້າວໄປເຖິງການຢຸດນຳໃຊ້ພາສຕິກ. ທີມງານບີຄວາໄດ້ລົນນະລົງຫຼຸດຜ່ອນການນຳໃຊ້ພາສຕິກໃນສະຖານທີ່ເຮັດວຽກ ແລະ ແນວຄວາມຄິດດັ່ງກ່າວ ໄດ້ຮັບຄວາມສົນໃຈຫຼາຍ ເພາະມີທີມງານບີຄວາໄດ້ສົ່ງຄຳຄິດເຫັນມາທັງໝົດ 65 ຄຳເຫັນ ບໍ່ວ່າຈະເປັນການປ່ຽນແປງພຶດຕິກຳການໄປຊື້ເຄື່ອງ, ການກິນ ແລະ ການດື່ມ ເພື່ອເປັນລະບຽບໃໝ່ໃນຫ້ອງການ. ໃນລະຫວ່າງກອງປະຊຸມຂອງພະນັກງານທັງໝົດ,
ນະໂຍບາຍຫຼຸດຜ່ອນການນຳໃຊ້ພາສຕິກຂອງແຜນງານບີຄວາ ຕອນນີ້ແມ່ນໄດ້ເລີ່ມຮ່າງຂຶ້ນແລ້ວ ແລະ ນະໂຍບາຍນີ້ ຈະຖືກນຳໃຊ້ກັບຫ້ອງການ, ການຈັດງານ ແລະ ກິດຈະກຳຕ່າງໆທັງໝົດຂອງແຜນງານບີຄວາ.
ແນວຄວາມຄິດທຳອິດຄື ຫ້າມນຳໃຊ້ຕຸກນ້ຳດື່ມໃນງານ ແລະ ກອງປະຊຸມທີ່ຈັດໂດຍແຜນງານບີຄວາ. ທີມງານຈະຊ່ວຍ ແລະ ບອກໃຫ້ຜູ້ຈັດກອງປະຊຸມຈັດຫານ້ຳດື່ມ ໂດຍໃຊ້ເຢືອກນ້ຳ ແລະ ຈອກທີ່ສາມາດໃຊ້ຊ້ຳໄດ້. ທີມງານຍັງເຫັນດີໃນການຫ້າມນຳໃຊ້ ຊອງເອກະສານ ແລະ ແຟ້ມເອກະສານທີ່ເປັນພາສຕິກ ທີ່ໃຊ້ກັນເລື້ອຍໆເພື່ອສົ່ງເອກະສານໃນຫ້ອງການ ແລະ ໃນກອງປະຊຸມ; ແລະ ຈະຫັນມາໃຊ້ອຸປະກອນອື່ນທົດແທນເຊັ່ນວ່າ ຊອງເອກະສານເຈ້ຍ.
ທີມງານບີຄວາພາຍໃຕ້ບໍລິສັດຄອບຟີ ຍັງລົງຄະແນນສຽງໃນການປ່ຽນແປງພຶດຕິກຳການພິມເອກະສານ ເພື່ອຫຼຸດຜ່ອນຈຳນວນບັ້ງນ້ຳມຶກທີ່ເປັນພາສຕິກ, ຢຸດການນຳໃຊ້ຖົງຢາງຮອງກະຕ່າຂີ້ເຫຍື້ອ ແລະ ສະໜອງຖົງຜ້າຝ້າຍທີ່ສາມາດນຳມາໃຊ້ຄືນສຳລັບຊື້ເຄື່ອງຕ່າງໆສຳລັບຫ້ອງການ
ແລະ ແຜນງານບີຄວາຍັງຈະບໍ່ຢຸດຢູ່ພຽງເທົ່ານີ້! ໃນອະນາຄົດອັນໃກ້ນີ້, ທີມງານບີຄວາສັນຍາວ່າ ຈະເຮັດໃຫ້ກອງປະຊຸມທີ່ຈັດຂຶ້ນ ເປັນກອງປະຊຸມທີ່ປາສະຈາກຂີ້ເຫຍື້ອ ແລະ ຈະເຮັດວຽກຮ່ວມກັບບັນດາຜູ້ສະໜອງສິນຄ້າເພື່ອຫຼຸດຜ່ອນການນຳໃຊ້ພາສຕິກໃນການຫຸ້ມຫໍ່ເຄື່ອງ ຫຼື ສິນຄ້າຕ່າງໆ.
ແລ້ວທ່ານເດ, ທ່ານຈະເຮັດຫຍັງເພື່ອຫຼຸດຜ່ອນຂີ້ເຫຍື້ອທີ່ເປັນພາສຕິກ? ທ່ານພ້ອມແລ້ວບໍ່ທີ່ຈະເລີ່ມຈັດຕັ້ງປະຕິບັດຮ່ວມກັບທີມງານບີຄວາ? ແລະ ເປັນສ່ວນໜຶ່ງໃນການແກ້ໄຂບັນຫາ, ບໍ່ແມ່ນສ້າງມົນລະພິດ!