ໃນເດືອນກັນຍາ 2019, ຄູຂັ້ນ ປ. 1 ທຸກຄົນ ຈະໄດ້ເລິ່ມສອນຫຼັກສູດຊັ້ນປະຖົມສຶກສາສະບັບປັບປຸງໃໝ່ ໂດຍນຳໃຊ້ຄູ່ມືຄູ, ພ້ອມກັບສື່ການຮຽນ-ການສອນເພີ່ມເຕີມ, ແລະ ວິທີການສອນໃໝ່ໆ ເພື່ອເຮັດໃຫ້ນັກຮຽນ ຮຽນໄດ້ດີຂື້ນ. ເພື່ອເປັນການກະກຽມ ແລະ ບຳລຸງຄູຕໍ່ກັບການປ່ຽນແປງດັ່ງກ່າວນີ້, ກົມສ້າງຄູ ໄດ້ສ້າງລະບົບການຝຶກອົບຮົມຄູປະຈຳການແບບໃໝ່ຂື້ນ. ລະບົບໃໝ່ນີ້ຈະມີການຈັດຕັ້ງທີມຄູຝຶກຫຼັກແຫຼ່ງຢູ່ຂັ້ນສູນກາງຂຶ້ນ 1 ທີມ ແລະ ທີມຄູຝຶກປະຈຳແຂວງ 18 ທີມ (1 ທີມ ຕໍ່ ແຂວງ). ສິ່ງດັ່ງກ່າວນີ້ ກໍ່ເພື່ອເປັນການຮັບປະກັນວ່າ ຈະມີຈໍານວນຄູຝຶກທີ່ມີຄຸນວຸດທິສູງພຽງພໍເພື່ອໃຫ້ການສະໜັບສະໜູນຄູປະຈໍາການໝົດທຸກຄົນ ໂດຍການຈັດຝຶກອົບຮົມ ແລະ ກິດຈະກຳການພັດທະນາວິຊາຊີບຄູໃຫ້ທຸກໆແຂວງໃນທົ່ວປະເທດ.
ການຄັດເລືອກເອົາສະມາຊິກທີມຄູຝຶກ ແມ່ນເລີ່ມຈາກການຈັດກອງປະຊຸມເຜີຍແຜ່ຂໍ້ມູນກ່ຽວກັບການຄັດເລືອກຄູຝຶກຫຼັກແຫຼ່ງ ແລະ ຄູຝຶກປະຈໍາແຂວງໃຫ້ແກ່ທຸກໆກົມໃນຂັ້ນສູນກາງ, ພະແນກສຶກສາທິການ ແລະ ກິລາແຂວງ, ວິທະຍາໄລຄູ ແລະ ຫ້ອງການສຶກສາທິການ ແລະ ກິລາເມືອງຢູ່ທົ່ວປະເທດ ໃນບໍ່ດົນມານີ້. ພະນັກງານກະຊວງສຶກສາ ແລະ ກິລາ ທີ່ມີຄຸນວຸດທິທຸກຂັ້ນ (ຂັ້ນສູນກາງ, ຂັ້ນແຂວງ, ລວມທັງວິທະຍາໄລຄູ, ຂັ້ນເມືອງ, ແລະ ຂັ້ນໂຮງຮຽນ) ມີສິດສະໝັກເຂົ້າເປັນຄູຝຶກຫຼັກແຫຼ່ງ ຫຼື ຄູຝຶກປະຈຳແຂວງ ຫຼື ສະໝັກເຂົ້າເປັນຄູຝຶກທັງສອງທີມ ກ່ອນວັນທີ 12 ຕຸລາ.
ພາລະກິດທຳອິດສຳລັບທີມຄູຝຶກທີ່ໄດ້ຮັບການຄັດເລືອກມາໃໝ່ນິ້ີ້ ຈະແມ່ນການຝຶກອົບຮົມຄູຂັ້ນ ປ. 1 ທຸກໆຄົນ ກ່ຽວກັບການນໍາໃຊ້ຫຼັກສູດຊັ້ນປະຖົມສຶກສາສະບັບປັບປຸງໃໝ່.
ນີ້ເປັນໂອກາດພິເສດທີ່ສຸດທີ່ທ່ານຈະເຮັດໜ້າທີ່ໃນການສະໜັບສະໜູນການຈັດຕັ້ງປະຕິບັດຫຼັກສູດຊັ້ນປະຖົມສຶກສາສະບັບ ປັບປຸງໃໝ່ໃຫ້ປະສົບຜົນສຳເລັດໃນທົ່ວປະເທດ, ແລະ ທ່ານກໍ ຈະໄດ້ເປັນສ່ວນໜຶ່ງຂອງທີມທີ່ຈະສືບຕໍ່ການຝຶກອົບຮົມ ແລະ ການສະໜັບສະໜູນຄູປະຈໍາການຊັ້ນປະຖົມສຶກສາທຸກໆຄົນໃນທົ່ວປະເທດ.