ໃນລະຫວ່າງວັນທີ 9 ເຖິງ 13 ກໍລະກົດ, ນັກຮຽນຄູຈາກເຂດຊົນນະບົດ ແລະ ເຂດຫ່າງໄກສອກຫຼີກ ຊຸດທຳອິດ ຈຳນວນ 212 ຄົນ ທີ່ໄດ້ຮັບທຶນການສຶກສາ ຈາກກະຊວງສຶກສາທິການ ແລະ ກິລາ, ລັດຖະບານອົດສະຕຣາລີ, ແລະ ສະຫະພາບເອີຣົບ ໄດ້ສຳເລັດການສຶກສາ ຈາກວິທະຍາໄລຄູ 3 ແຫ່ງ ຢູ່ແຂວງຫຼວງນ້ຳທາ, ແຂວງສາລະວັນ, ແລະ ແຂວງສະຫວັນນະເຂດ. ສ່ວນນັກຮຽນຄູ ທີ່ໄດ້ຮັບທຶນການສຶກສາຊຸດທີສອງ ຈຳນວນ 149 ຄົນ ຈະສຳເລັດການສຶກສາໃນປີ 2019. ນັກຮຽນຄູຈຳນວນທັງໝົດ 361 ຄົນ, ເປັນເພດຍິງ ຈຳນວນ 235 ຄົນ, ໄດ້ຮັບທຶນການສືກສາ ເຊິ່ງຄັດເລືອກໂດຍກະຊວງສຶກສາທິການ ແລະ ກິລາ ຮ່ວມກັບອຳນາດການສຶກສາຂັ້ນທ້ອງຖິ່ນ. ຄູແຕ່ລະຄົນ ຈະຖືກສົ່ງລົງສອນຢູ່ບ້ານເກີດຂອງຕົນ ຢູ່ເຂດຊົນນະບົດ ແລະ ເຂດຫ່າງໄກສອກຫຼກ ເຊິ່ງເປັນບ່ອນທີ່ພວກເຂົາມີຄວາມເຂົ້າໃຈ ທາງດ້ານພາສາ ແລະ ຄວາມຮູ້ທາງດ້ານວັດທະນະທຳຢ່າງເລິກເຊິ່ງ ຊຶ່ງຈະເປັນປະໂຫຍດໃຫ້ແກ່ໂຮງຮຽນປະຖົມທ້ອງຖິ່ນເປັນຢ່າງດີ.
ທີ່ວິທະຍາໄລຄູສະຫວັນນະເຂດ, ພິທີສົ່ງນັກຮຽນຄູ ທີ່ໄດ້ຮັບທຶນການສຶກສາ ໄດ້ຈັດຂື້ນໃນວັນທີ 13 ກໍລະກົດ. ພິທີດັ່ງກ່າວ ເປັນປະທານໂດຍ ທ່ານ ເກດ ພັນລັກ, ວ່າການ ຫົວໜ້າກົມສ້າງຄູ, ທ່ານ ນ ເຄທີ ສະມິດທ໌ ເລຂາເອກຂອງສະຖານທູດອົດສະຕຣາລີ ປະຈຳ ສປປ ລາວ, ທ່ານ ສີໄຮ ແກ້ວໄຖຖິ່ນ ຫົວໜ້າພະແນກສຶກສາທິການ ແລະ ກິລາ ແຂວງຄຳມ່ວນ, ທ່ານ ສີອຸດອນ ທອງສຸວັນ ຮອງຫົວໜ້າພະແນກສຶກສາທິການ ແລະ ກິລາ ແຂວງສະຫວັນນະເຂດ, ແລະ ທ່ານ ລັດສະໝີ ພະໄຊສີ, ອຳນວຍການວິທະຍາໄລຄູສະຫວັນນະເຂດ.
ໃນພິທີຢ່າງເປັນທາງການນີ້, ທ່ານ ເກດ ພັນລັກ ໄດ້ມີຄຳເຫັນໂອ້ລົມ ຕໍ່ກັບນັກຮຽນທີ່ຈົບໃໝ່ວ່າ “ການສຶກສາຈາກວິທະຍາໄລ ເປັນພຽງຈຸດເລີ່ມຕົ້ນເທົ່ານັ້ນ. ຄູຕ້ອງສືບຕໍ່ຮຽນຮູ້ ແລະ ພັດທະນາຕົນເອງ ໃຫ້ເປັນແບບຢ່າງທາງດ້ານວິຊາການ ແລະ ການດຳລົງຊີວິດ, ແລະ ຈັດຕັ້ງການຮຽນການສອນ ຢ່າງມີຄຸນນະພາບ. ເປົ້າໝາຍສູງສຸດຂອງຄູປະຖົມສຶກສາ ກໍ່ແມ່ນເຮັດໃຫ້ເດັກນ້ອຍສາມາດອ່ານອອກຂຽນໄດ້ ແລະ ຄິດໄລ່ເປັນ.”
“ຄຳເຫັນໂອ້ລົມທຸກຄຳ ຂອງ ທ່ານ ເກດ ແມ່ນມີຄວາມໝາຍ, ຄວາມສຳຄັນ, ແລະ ເປັນບົດຮຽນທີ່ດີໃຫ້ແກ່ພວກຂ້ານ້ອຍ. ພວກຂ້ານ້ອຍ ຈະຂໍຮັບເອົາຄຳໂອວາດຂອງທ່ານ ໄປເປັນແນວທາງໃຫ້ແກ່ການປະຕິບັດ ໂດຍສະເພາະ ການຮຽນ-ການສອນ ຢູ່ໃນທ້ອງຖິ່ນຂອງພວກຂ້ານ້ອຍ ໃຫ້ມີຄຸນນະພາບທີ່ດີຂື້ນ.”.
“ລັດຖະບານອົດສະຕຣາລີ ມີຄວາມຍິນດີຫຼາຍ ທີ່ໄດ້ຮ່ວມງານກັບ ກະຊວງສຶກສາທິການ ແລະ ກິລາ ແລະ ສະຫະພາບເອີຣົບ ໃນການໃຫ້ການທຶນການສຶກສາແກ່ຄູ ທົ່ວ ສປປ ລາວ. ພວກເຮົາເຊື່ອວ່າ ຄູໃໝ່ນີ້ ຈະສ້າງການປ່ຽນແປງໃນຊຸມຊົນຂອງພວກເຂົາ ແລະ ກາຍເປັນແບບຢ່າງທີ່ດີທີ່ແກ່ຄົນຮຸ່ນຕໍ່ໄປ. ຄວາມເຂົ້າໃຈດ້ານພາສາ ແລະ ວັດທະນະທຳໃນຊຸມຊົນ ຈະເຮັດໃຫ້ເດັກນ້ອຍ ເຂົ້າຮຽນ ແລະ ສືບຕໍ່ຮຽນໜັງສືຫຼາຍຂື້ນ.”ທ່ານ ນ ເຄທີ ສະມິດທ໌ ເລຂາເອກຂອງສະຖານທູດອົດສະຕຣາລີ ປະຈຳ ສປປ ລາວ ໄດ້ກ່າວ.
ເພື່ອເປັນການສົ່ງເສີມອະນາຄົດຄູເຫຼົ່ານີ້ ໃຫ້ມີຄວາມພ້ອມໃນການສິດສອນຢູ່ຊຸມຊົນທ້ອງຖິ່ນຂອງພວກເຂົາເພີ່ມຕື່ມ, ໄດ້ມີການມອບອຸປະກອນການສອນ ເຊັ່ນ ຊຸດຄູ, ຄູ່ມືຄູ, ຖົງຜ້າສຳລັບໃສ່ປື້ມ, ແລະ ຄັນຮົ່ມ ໃຫ້ແກ່ຄູໃນພິທີດັ່ງກ່າວ.
ແຜນງານບີຄວາ, ເປັນແຜນງານທີ່ນຳພາໂດຍ ກະຊວງສຶກສາທິການ ແລະ ກິລາລາວ, ໂດຍການສະໜັບສະໜູນຈາກລັດຖະບານອົດສະຕຣາລີ, ແລະ ສະຫະພາບເອີຣົບ, ເຊິ່ງມີເປົ້າໝາຍໃນການຂະຫຍາຍໂອກາດໃຫ້ເດັກຍິງ ແລະ ເດັກຊາຍ, ໂດຍສະເພາະຜູ້ດ້ອຍໂອກາດ ໃຫ້ໄດ້ຮັບການສຶກສາທີ່ມີຄຸນນະພາບ, ສາມາດອ່ານອອກຂຽນໄດ້, ຄິດໄລ່ໄດ້ ແລະ ມີທັກສະຊີວິດ.