“ການລ້າງມື ແມ່ນສິ່ງທີ່ສຳຄັນຫຼາຍ ເນື່ອງຈາກວ່າ ແຕ່ລະວັນພວກເຮົາໃຊ້ມືຢູ່ຕະຫຼອດເວລາ ສໍາຜັດກັບສິ່ງຂອງ, ຈັບບາຍອາຫານ ຫຼື ໂດຍສະເພາະແມ່ນເດັກຈັບຫຼິ້ນສິ່ງຂອງຕ່າງໆ ອີກຢ່າງໜຶ່ງພວກເຮົາຍັງນໍາໃຊ້ມືໃນປັ້ນກິນເຂົ້າໜຽວ ເຊິ່ງມີໂອກາດສ່ຽງຕໍ່ການຕິດເຊື້ອພະຍາດໄດ້ ຖ້າຫາກວ່າມືບໍ່ສະອາດ ຫຼື ມືເປິະເປື້ອນ.” ທ່ານ ນ. ເພັດສະໝອນ ສິີບຸນເຮືອງ, ຮອງຜູ້ອຳນວຍການສູນພັດທະນາຫຼັກສູດ, ສະຖາບັນຄົ້ນຄວ້າວິທະຍາສາດການສຶກສາ (ສວສ) ກ່າວ. ປະຈຸບັນ, ສວສ ຊຶ່ງປະກອບມີທີມງານພັດທະນາຫຼັກສູດ ແລະ ການສະໜັບສະໜູນຂອງຊ່ຽວຊານແຜນງານບີຄວາ ກຳລັງຮຽບຮຽງປື້ມແບບຮຽນ ແລະ ຄູ່ມືຄູ ຂັ້ນ ປ. 1 ເພື່ອນຳໃຊ້ໃນເດືອນກັນຍາ 2019 ທີ່ຈະມາເຖິງ.
“ຂ້າພະເຈົ້າສຸມໃສ່ການປັບປຸງຫຼັກສູດວິຊາວິທະຍາສາດ ແລະ ສິ່ງແວດລ້ອມ ເຊິ່ງໄດ້ນໍາເອົາເນື້ອໃນຄວາມຮູ້ກ່ຽວກັບ ການລ້າງມື ເພື່ອໃຫ້ຄູສາມາດແນະນໍານັກຮຽນໃຫ້ໄດ້ມີຄວາມຮູ້ ແລະ ພຶດຕິກໍາ ການລ້າງມືທີ່ຖືກຕ້ອງ ແລະ ການປະຕິບັດຕົວຈິງເປັນປະຈໍາ; ເດັກນ້ອຍມີຄວາມສ່ຽງສູງທີ່ຈະຕິດພະຍາດຈາກມືທີ່ເປິະເປື້ອນ ຍ້ອນວ່າມືຂອງພວກເຂົາສຳຜັດກັບຂີ້ຝຸ່ນ, ສັດລ້ຽງ. ໃນຫຼັກສູດໃໝ່, ເດັກນ້ອຍຈະໄດ້ຮຽນຮູ້ວ່າ ເປັນຫຍັງພວກເຂົາຈຶ່ງຈໍາເປັນຕ້ອງລ້າງມື, ຕ້ອງລ້າງມືເວລາກ່ອນກິນອາຫານ, ຫຼັງໃຊ້ຫ້ອງນ້ຳ ແລະ ຫຼັງຈາກສຳຜັດກັບສິ່ງເປິະເປື້ອນ ຫຼື ຂີ້ດິນ. ສຳຄັນທີ່ສຸດແມ່ນພວກເຂົານໍາໃຊ້ຄວາມຮູ້ທີ່ຮຽນມາໝູນໃຊ້ເຂົ້າໃນການປະຕິບັດກິດຈະກໍາຕົວຈິງ ໂດຍຄູຈະເປັນຜູ້ສາທິດວິທີການລ້າງມື 7 ຂັ້ນຕອນ ແລ້ວນໍາພານັກຮຽນປະຕິບັດ ສົ່ງເສີມໃຫ້ເດັກສະແດງ ວິທີການລ້າງມືທີ່ຖືກຕ້ອງ ແລະ ຊ່ວຍເຜີຍແຜ່ພຶດຕິກຳໃນການຮັກສາຄວາມສະອາດໃຫ້ແກ່ຄົນໃນຄອບຄົວອີກດ້ວຍ” ທ່ານ ນ. ເພັດສະໝອນ ໄດ້ໃຫ້ຄໍາເຫັນເພີ່ມເຕີມ.
ທ່ານ ນ ອາລັນຍາພອນ ວຽງມີໄຊ ແມ່ນ ຜູ້ຝຶກອົບຮົມວຽກສະໜອງນ້ຳ, ສຸຂາພິບານ ແລະ ສຸຂະອະນາໄມ ຂອງແຜນງານບີຄວາ ທີ່ເຮັດວຽກຮ່ວມກັບນັກພັດທະນາຫຼັກສູດ ກ່າວວ່າ “ການລ້າງມືດ້ວຍສະບູຈະສົ່ງຜົນດີ ບໍ່ສະເພາະແຕ່ດ້ານສຸຂະພາບຂອງເດັກເທົ່ານັ້ນ ແຕ່ຍັງສົ່ງຜົນໃຫ້ເດັກມາໂຮງຮຽນຢ່າງເປັນປົກກະຕິ ແລະ ມີຜົນການຮຽນທີ່ດີຂື້ນ. ການລ້າງມືດ້ວຍສະບູຢ່າງເປັນປົກກະຕິຈະຊ່ວຍຂ້າເຊື້ອແບັດທີເລ໌ຍ, ຫຼຸດຜ່ອນການຕິດເຊື້ອພະຍາດຖອກທ້ອງ ແລະ ແມ່ທ້ອງໄດ້. ພວກເຮົາຈຶ່ງຄວນເລິ່ມສອນພຶດຕິກຳການຮັກສາຄວາມສະອາດໃຫ້ເດັກຕັ້ງແຕ່ຍັງນ້ອຍ. ສະນັ້ນ, ພວກເຮົາຈຶ່ງເພິ່ມຄວາມຮູ້ກ່ຽວກັບນ້ຳ, ສຸຂາພິບານ ແລະ ສຸຂະອະນາໄມ ໃນປຶ້ມແບບຮຽນຊັ້ນປະຖົມ ໂດຍເລິ່ມຈາກ ຂັ້ນ ປ. 1 ເພື່ອເຮັດໃຫ້ເດັກມີສຸຂະພາບທີ່ດີ, ແຂງແຮງ ແລະ ຮ່ຳຮຽນໄດ້ດີຂຶ້ນ.”