Menu

ພະນະທ່ານ ຮອງສາດສະດາຈານ ປອ ກອງສີ ແສງມະນີ, ຮອງລັດຖະມົນຕີກະຊວງສຶກສາທິການ ແລະ ກິລາ ໄດ້ປະກາດນຳໃຊ້ຫຼັກສູດຊັ້ນປະຖົມສຶກສາ ສະບັບປັບປຸງໃໝ່ຢ່າງເປັນທາງການ ທີ່ ໂຮງຮຽນປະຖົມສົມບູນທົ່ງກາງ ເມືອງສີສັດຕະນາກ ໂດຍຈະເລີ່ມນຳໃຊ້ຫຼັກສູດສະບັບປັບປຸງໃໝ່ ຂັ້ນ ປ.1 ໃນເດືອນກັນຍາ 2019.

1- Handover of teaching and learning materials

Handover of teaching and learning materials

2- Curriculum display

Curriculum display

3- Teacher training materials

Teacher training materials

4- Learn Together

Learn Together

5- MAking of Learn Together

Making of Learn Together

ໃນ​ວັນ​ທີ 05 ມິ​ຖຸ​ນາ, ພະ​ນະ​ທ່ານ ຮອງ​ສາດ​ສະ​ດາ​ຈານ ປ​ອ ກອງ​ສີ ແສງ​ມະ​ນີ, ຮອງລັດ​ຖະ​ມົນ​ຕີ​ກະ​ຊວງ​ສຶກ​ສາ​ທິ​ການ ແລະ ກິ​ລາ ໄດ້ປະ​ກາດ​ນຳ​ໃຊ້​ຫຼັກ​ສູດ​ຊັ້ນ​ປະ​ຖົມ​ສຶກ​ສາ ສະ​ບັບ​ປັບ​ປຸງ​ໃໝ່​ຢ່າງ​ເປັນ​ທາງ​ການ  ທີ່ ໂຮງຮຽນປະຖົມສົມບູນທົ່ງກາງ ເມືອງສີສັດຕະນາກ ໂດຍ​ຈະເລີ່ມ​ນຳໃຊ້​ຫຼັກ​ສູດ​ສະ​ບັບ​ປັບ​ປຸງ​ໃໝ່ ຂັ້ນ ປ.1 ໃນ​ເດືອນ​ກັນ​ຍາ 2019.

ພະ​ນະ​ທ່ານ ນາງ ຊາ​ແມນ ສະ​ໂຕນ, ທູດ​ຮັບ​ຜິດ​ຊອບ​ວຽກ​ງານແມ່​ຍິງ ແລະ ເດັກ​ຍິງ ຂອງ​ປະ​ເທດ​ອົດ​ສະ​ຕ​ຣາ​ລີ ໄດ້ໃຫ້ກຽດເປັນແຂກກິດຕິມະສັກຂອງພິທິດັ່ງກ່າວ ໃນໂອກາດການມາຢ້ຽມຢາມ ແລະ ເຮັດວຽກທາງການຢູ່ ສປປລາວ. ພິທີດັ່ງກ່າວມີຜູ້ແທນເຂົ້າຮ່ວມຫຼາຍກວ່າ 200 ທ່ານ ໂດຍມີ ພະນະທ່ານນາງ ຄຳເພົາ ເອີນລາວັນ ຮອງລັດຖະມົນຕີກະຊວງການຕ່າງປະເທດ, ພະ​ນະ​ທ່ານ ຈ໋ອງ ເບີ​ນາດ ຄາ​ຣາ​ສ໌ໂກ, ເອ​ກ​ອັກ​ຄະ​ລັດ​ຖະ​ທູດ ອົດ​ສະ​ຕ​ຣາ​ລີປະ​ຈຳ ສປປ​ລາວ, ພະ​ນ​ະ​ທ່ານ ລີ​ໂອ ຟາ​ເບີ, ເອກ​ອັກ​ຄະ​ລັດ​ຖະ​ທູດ ສະ​ຫະ​ພາບ​ເອີ​ຣົບປະ​ຈຳ ສປປ​ລາວ ແລະ ພະ​ນ​ະ​ທ່ານ ນາງ ຣີ​ນາ ບິດ​ເຕີ, ເອກ​ອັກ​ຄະ​ລັດ​ຖະ​ທູດ ສະ​ຫະ​ລັດ​ອາ​ເມ​ລິ​ກາ ປະ​ຈຳ ສປປ​ລາວ ໄດ້ໃຫ້ກຽດເຂົ້າຮ່ວມ. ນອກຈາກນີ້ ຍັງມີບັນດາຜູ້ຕາງໜ້າຈາກ ​ກະ​ຊວງ​ສຶກ​ສາ​ທິ​ການ ແລະ ກິ​ລາ, ​ຫົວ​ໜ້າ​ພະ​ສຶກ​ສາ​ທິ​ການ ແລະ ກິ​ລາ​ແຂວງ 18 ແຂວງ, ​ວິ​ທະ​ຍາ​ໄລ​ຄູ 8 ແຫ່ງ​, ບັນດາກະຊວງອື່ນໆ, ​ຄູ່​ຮ່ວມ​ພັດ​ທະ​ນາ​ດ້ານ​ການ​ສຶກ​ສ​າ, ຜູ້​ອຳ​ນວຍ​ການ​ໂຮງ​ຮຽນ, ຄູ​ສອນ, ຜູ້​ປົກ​ຄອງພໍ່ແມ່​ນັກ​ຮຽນ ແລະ ນັກ​ຮຽນ​ຊັ້ນ​ປະ​ຖົ​ມ​ກໍ່​ໄດ້​ເຂົ້າ​ຮ່ວມ.

ໃນໄລຍະ 4 ປີ​ທີ່ຜ່ານມາ, ກະ​ຊວງ​ສຶກ​ສາ​ທິ​ການ ແລະ ກິລາ ແຫ່ງ ສ​ປ​ປ ລາວ (ສ​ສກ) ໄດ້​ພັດ​ທະ​ນາ​ຫຼັກ​ສູດ​ຊັ້ນ​ປະ​ຖົມ​ສຶກ​ສາ​ສະ​ບັບ​ປັບ​ປຸງ​ໃໝ່ ພ້ອມ​ກັບ​ສື່​ການ​ຮຽນ​ການ​ສອນ​ໃໝ່ ແລະ ແຜນ​ຝຶກ​ອົບ​ຮົມ​ຄູ​ປະ​ຈຳ​ການ ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ, ສະຫະພາບເອີຣົບ ແລະ  ລັດ​ຖະ​ບານ​ສະ​ຫະ​ລັດ​ອາ​ເມ​ລິ​ກາ ໂດຍ​ຜ່ານ​ແຜນ​ງານປັບປຸງຄຸນນະພາບ ແລະ ຂະຫຍາຍໂອກາດເຂົ້າຮຽນສຳລັບການສຶກສາຂັ້ນພື້ນຖານໃນ ສປປ ລາວ (​ບີ​ຄວາ). ​ຫຼັກ​ສູດ​ຊັ້ນ​ປະ​ຖົມ​ສຶກ​ສາ​ສະ​ບັບ​ປັບ​ປຸງ​ໃໝ່​ ແມ່ນຈະ​ໄດ້ຈັດຕັ້ງປະຕິບັດໄປເທື່​ອ​ລະ​ຂັ້ນ​ຮຽນ, ເຊິ່ງ​ເລີ່ມ​ຈາກຫຼັກ​ສູດ​ຂັ້ນ ປ.1 ໃນ​ເດືອນ​ກັນ​ຍາ 2019ນີ້ ແລະ ໃນຂັ້ນປ. 5 ໃນປີສົກ​ຮຽນ 2023 – 2024.

ທ່ານ ຮອງ​ສາດ​ສະ​ດາ​ຈານ ປອ ກອງ​ສີ ແສງ​ມະ​ນີ ໄດ້​ກ່າວ​ວ່າ “ຫຼັກສູດຊັ້ນປະຖົມສຶກສາສະບັບປັບປຸງໃໝ່ແມ່ນສຸມໃສ່ການຮຽນທີ່ເນັ້ນການປະຕິບັດຕົວຈິງ ແລະ ເອົານັກຮຽນເປັນໃຈກາງ. ນັກຮຽນຈະໄດ້ຮຽນໂດຍການເຮັດກິດຈະກຳຕ່າງໆ ແລະ ນຳໃຊ້ຄວາມຮູ້ໃໝ່ໃນຫ້ອງຮຽນຮ່ວມ. ພ້ອມ​ນັ້ນ​ຍັງ​ມີ​ວິ​ທີ​ການ​ຮຽນ​ການ​ສອນ​ແບບໃໝ່ອີກ, ຕົວ​ຢ່າງ: ການ​ຮຽນ​ການ​ສອນ​ວິ​ຊາ​ພາ​ສາ​ລາວ, ທີ່​ຈະ​ຊ່ວຍ​ເດັກ​ນ້ອຍ​ຮຽນ​ອ່ານ ແລະ ຮຽນ​ຂຽນ​ໄດ້​ງ່າຍ​ຂຶ້ນ”

​ທ່ານ ດຣ ຊາແມນ ສະໂຕນ ໄດ້ກ່າວວ່າ ​“ລັດຖະບານອົດສະຕຣາລີ ແລະ ຜູ້ຮ່ວມໃຫ້ທຶນ ມີຄວາມຍິນດີທີ່ໄດ້ໃຫ້ການສະໜັບສະໜູນກະຊວງສຶກສາທິການ ແລະ ກິລາ ໃນການຈັດຕັ້ງປະຕິບັດຫຼັກສູດປະຖົມສຶກສາສະບັບໃໝ່ໃນທົ່ວປະເທດ. ຫຼັກສູດສະບັບປັບປຸງໃໝ່ນີ້ ແມ່ນບາດກ້າວທຳອິດທີ່ສຳຄັນໃນການປັບປຸງຜົນການຮຽນຂອງເດັກນ້ອຍລາວ ໂດຍສະເພາະແມ່ນ ເດັກນ້ອຍທີ່ດ້ອຍໂອກາດເປັນຕົ້ນແມ່ນ ເດັກຍິງ, ເດັກພິການ, ແລະ ເດັກຊົນເຜົ່າ.

ທ່ານທູດ ຍັງໄດ້ກ່າວຕື່ມອີກວ່າ “ເພື່ອຈະເຮັດໃຫ້ຫຼັກສູດໃໝ່ ໄດ້ຮັບຜົນສຳເລັດ ມັນຕ້ອງການການສິດສອນທີ່ມີຄຸນນະພາບ ແລະ ຄວາມເອົາໃຈໃສ່ຈາກທຸກພາກສ່ວນແລະທຸກຂັ້ນທົ່ວປະເທດ.

ໃນເດືອນກັນຍານີ້, ໂຮງຮຽນປະຖົມທຸກໆແຫ່ງຈະໄດ້ຮັບອຸປະກອນການຮຽນການສອນໃໝ່. ນັກຮຽນປະຖົມຈຳນວນຫຼາຍກວ່າ 800,000 ຄົນ ຈະໄດ້ຮັບປື້ມແບບຮຽນໃໝ່ ແລະ ຄູປ 1, ຜູ້ອຳນວຍການໂຮງຮຽນ ແລະ ຄູສຶກສານິເທດ ຈຳນວນ 16,600 ຄົນ ຈະໄດ້ຮັບການຝຶກອົບຮົມກ່ຽວກັບວິທີສິດສອນໃໝ່.

ຫຼັກສູດປະຖົມສຶກສາສະບັບປັບປຸງໃໝ່ນີ້ ແມ່ນ ການປະຕິຮູບອັນສຳຄັນ ເຊິ່ງຈະມີວິທີການໃໝ່ ເຊັ່ນການແນະນຳເບື້ອງຕົ້ນເປັນເວລາ 1 ອາທິດໃຫ້ແກ່ນັກຮຽນປ.1 ເພື່ອສ້າງຄວາມຄຸ້ນເຄີຍກັບຊີວິດໃນໂຮງຮຽນ, ສະເໜີວິທີການສອນແບບໃໝ່ທີ່ເນັ້ນໃສ່ການປະຕິບັດຕົວຈິງ, ສົ່ງເສີມການຮຽນຮ່ວມ ແລະ ການສອນຫ້ອງຄວບຫຼາຍຂຶ້ນ ແລະ ນຳໃຊ້ວິທີການປະເມີນນັກຮຽນແບບໃໝ່ເພື່ອວັດແທກຄວາມເຂົ້າໃຈ, ທັກສະ ແລະ ທັດສະນະຄະຕິຂອງນັກຮຽນ.

ພາ​ຍ​ຫຼັງ ພິ​ທີ​ລັ່ນ​ຄ້ອງ ປະ​ກາດ​ນຳ​ໃຊ້​ຫຼັກ​ສູດ​ຊັ້ນ​ປະ​ຖົມ​ສຶກ​ສາ​ສະ​ບັບ​ປັບ​ປຸງ​ໃໝ່​ຢ່າງ​ເປັນ​ທາງ​ການ, ພະ​ນ​ະ​​ທ່ານ ຮອງສາດ​ສະ​ດາ​ຈານ ປອ ກອງ​ສີ ແສງ​ມະ​ນີ ແລະ ບັນດາແຂກ​ທີ່​ມາ​ຮ່ວມ​ງານ ໄດ້​ຢ້ຽມ​ຊົມ​ການ​ວາ​ງ​ສະ​ແດງ ​ສື່​ການ​ຮຽນ​ການ​ສອນ​ທີ່​ໄດ້ພັດທະນາ​ຂຶ້ນ​ເພື່ອນຳໃຊ້ໃນການຈັດຕັ້ງປະຕິບັດ​​ຫຼັກ​ສູດ​ສະ​ບັບ​ປັບ​ປຸງ​ໃໝ່.

ຜູ້ຕາງໜ້າຈາກສະ​ຖາ​ບັນ​ຄົ້ນ​ຄວ້າ​ວິ​ທະ​ຍາ​ສາດ​ການ​ສຶກ​ສາ ໄດ້​ນຳ​ສະ​ເໜີ​ກ່ຽວ​ກັບ​ສື່​ການ​ຮຽ​ນ​ການ​ສອນສຳລັບຂັ້ນປ.1 ເຊິ່ງມີ: ປຶ້ມ​ແບບ​ຮຽນ 4 ວິ​ຊາ​ທີ່​ມີ​ສີ​ສັນ​ ແລະ ​ຮູບພາບ​ປະ​ກອບ, ຄູ່​ມື​ຄູ 7 ວິ​ຊາ ​ທີ່​ມີ​ລາຍ​ລະ​ອຽດ​ກ່ຽວ​ກັບ​ການ​ສອນ​ບົດ​ຮຽນ, ຄຳ​ແນະ​ນຳ​ໃນ​ການ​ນຳ​ໃຊ້​ຄວາມ​ຮູ້​ໃນ​ທ້ອງ​ຖິ່ນ, ການ​ສອນ​ຫ້ອງ​ຄວບ ແລະ ການ​ສອນ​ນັກ​ຮຽນ​ທີ່ບໍ່ເວົ້້າພາ​ສາ​ລາວ​, ປຶ້ມ​ນິ​ທານ​ທີ່​ເໝາະ​ສົມ​ຕາມ​ເກນ​ອາ​ຍຸ ເພື່ອ​ຊ່ວຍ​ການ​ຮຽນ​ການ​ສອນ​ພາ​ສາ​ລາວ, ຊຸດ​ປຶ້ມ​ອ່ານ​ເສີມ​ທີ່​ເໝາະ​ສົມ​ຕາມ​ຂັ້ນ​ຮຽນ ເພື່ອ​ຊ່ວຍ​ພັດ​ທະ​ນາ​ການ​ຮູ້​ໜັງ​ສື​ ແລະ ສື່​ການ​ຮຽນ​ການ​

ສອນ​ເພີ້ມ​ເຕີມ​ອື່ນໆ ເຊັ່ນ​: ບັດ​ຄຳ​ສັບ, ໂປ​ສ​ະ​ເຕີ ແລະ ແວ່ນ​ຂະ​ຫຍາຍ. ນັກ​ຮຽນ ຂັ້ນ​ ປ.1 ທຸກ​ຄົນ​ຈະ​ໄດ້​ຮັບ​ຊຸດ​ປຶ້ມ​ແບບ​ຮຽ​ນ 1 ຊຸດ​ຕໍ່​ຄົນ ແລະ ສື່​ການ​ຮຽນ​ການ​ສອນ​ສຳ​ລັບ​ຄູ 1 ຊຸດ​.

ກົມ​ສ້າງ​ຄູ ໄດ້​ອະ​ທິ​ບາຍ​ກ່ຽວ​ກັບ​ຂັ້ນ​ຕອນ​ການ​ຝຶກ​ອົບ​ຮົມ​ຄູ​ປະ​ຈຳ​ການ. ຄູ​ຝຶກ​ຫຼັກ​ແຫຼ່ງ​ຈຳ​ນວນ 60 ທ່ານ ແລະ ທີມຄູຝຶກ​ຂັ້ນ​ແຂວງ 18 ທີມຈຳ​ນວນ 611 ທ່ານ ຈະ​ຝຶກ​ອົບ​ຮົມ​ໃຫ້​ແກ່ ຄູ​ປ.1, ຜູ້​ອຳ​ນວຍ​ການ​ໂຮງ​ຮຽນ​ ແລະ ຄູ​ສຶກ​ສາ​ນິ​ເທດ​ທຸກຄົນ ໃນ​ລະຫວ່າງເດືອນ ກໍ​ລະ​ກົດ ແລະ ສິງ​ຫາ. ​​ ​ບັນ​ດາກອງປະຊຸມຝຶກອົບຮົມ, ສື່ອຸປະກອນການ​ຝຶກ​ອົບ​ຮົມ​ ແລະ ອຸປະກອນການຮຽນການສອນທີ່ຈະຊ່ວຍສະໜັບສະໜູນຄູໃນການສິດສອນ​ຕະ​ຫຼອດ​ສົກ​ຮຽນ ແມ່ນສະ​ທ້ອນ​ໃຫ້​ເຫັນ​ເຖິງ​ຄວາມ​ສຳ​ຄັນ​ຂອງການ​ວາງ​ແຜນ​ທີ່​ດີ​ສຳ​ລັບ​ການ​ຝຶກ​ອົບ​ຮົມ​ຄູ​ທີ່​ມີ​ຄຸນ​ນະ​ພາບ​ເພື່ອ​ ເຮັດໃຫ້​ການ​ຈັດ​ຕັ້ງປະຕິບັດ​ຫຼັກ​ສູດ​ສະ​ບັບ​ປັບ​ປຸງ​ໃໝ່ໄດ້ຮັບຜົນ​ສຳ​ເລັດ​.

ໃນ​ຕອນ​ທ້າຍ, ບັນ​ດາ​ຜູ້​ແທນ​ໄດ້​ຢ້ຽມ​ຊົມ​ການ​ວາງ​ສະ​ແດງ​ໂດຍ ສູນ​ໂຄ​ສ​ະ​ນາ​ຂໍ້​ມູນ​ຂ່າວ​ສານ ແລະ ກິ​ລາ ຂອງ ກະ​ຊວງ​ສຶກ​ສາ​ທິ​ການ ແລະ ກິ​ລາ ເພື່ອ​ເບິ່ງ ລາຍ​ການ​ “ຮຽນ​ຮູ້​ຮ່ວມ​ກັນ” ເຊິ່ງ​ເປັນ​ລາຍ​ການ​ໂທ​ລະ​ພາບ​ເພື່ອ​ການ​ສຶກ​ສາ​ທີ່​ມ່ວນ ທີ່​ອອກ​ແບບ​ມາ​ສະ​ເພາະ​ສຳ​ລັບ ເດັກ​ນ້ອຍ ຂັ້ນ ປ.1 ເພື່ອຊ່ວຍໃນການຮຽນຫຼັກ​ສູດ​​ໃໝ່. ລາຍ​ການ​ນີ້​ຈະ​ອອກ​ອາ​ກາດ​ທາງ​ໂທ​ລະ​ພາບ​ແຫ່ງ​ຊາດ​ລາວ ຕັ້ງ​ແຕ່​ເດືອນ​ສິງ​ຫາ ນີ້​ເປັນ​ຕົ້ນ​ໄປ, ພ້ອມ​ນັ້ນ​ຍັງ​ສາ​ມາດ​ເຂົ້າ​ເບິ່ງ​ຜ່ານ​ຊ່ອງ​ທາງ​ຢູ​ທູບ ໂດຍ​ພິມ ‘Learn Together Laos’.

ແຜນງານບີຄວາ ແມ່ນ ແຜນງານດ້ານການສຶກສາມູນຄ່າ 64 ລ້ານໂດລ້າອົດສະຕຣາລີ ເຊິ່ງໄດ້ຮັບການສະໜັບສະໜູນຈາກລັດຖະບານອົດສະຕຣາລີ ໂດຍຮ່ວມມືກັບສະຫະພາບເອີຣົບ ແລະ ລັດຖະບານສະຫະລັດອາເມລິກາ. ຈຸດປະສົງຂອງແຜນງານແມ່ນເພື່ອປັບປຸງຜົນການຮຽນຂອງເດັກນ້ອຍ​ຊ​ັ້ນປະຖົມ ໂດຍສະເພາະແມ່ນເດັກນ້ອຍທີ່ດ້ອຍໂອກາດ ລວມທັງເດັກຍິງ, ເດັກພິການ ແລະ ເດັກຊົນເຜົ່າ ໂດຍການພັດທະນາຫຼັກສູດປະຖົມສຶກສາໃໝ່, ປັບປຸງຄຸນນະພາບການສອນ ແລະ ການສະໜັບສະໜູນວຽກງານການໃຫ້ການບໍລິການດ້ານການສຶກສາໃນຂັ້ນທ້ອງຖິ່ນ.