Menu

ລາຍການຮຽນຮູ້ຮ່ວມກັນ ເປັນລາຍການທີ່ມ່ວນຊື່ນ ແລະ ເປັນລາຍການໂທລະພາບເພື່ອການສຶກສາຮູບແບບໃໝ່ ທີ່ອອກແບບມາສະເພາະເພື່ອສະໜັບສະໜູນການຮຽນຮູ້ສຳລັບນັກຮຽນຫ້ອງ ປ.1.

Image 001

Image 002

Image 003

Image 004

Image 005

ລ​າຍ​ການ​ຮຽນ​ຮູ້​ຮ່ວມ​ກັນ ຕອນ​ທຳ​ອິດ ຈະ​ອອກ​ອາ​ກາດ​ທາງ​ໂທ​ລະ​ພາບ​ແຫ່ງ​ຊາດ​ລາວວັນ​ອາ​ທິດ​ນີ້ ທາງຊ່ອງ 3 ເວ​ລາ 4:45ໂມງ​ແລງ ແລະ ທາງ​ຊ່ອງ ປກ​ສ ເວ​ລາ 10:30 ໂມງ​ເຊ​ົ້າ. ຕອນ​ໃໝ່​ໆຈ​ະ​ອອກ​ອາ​ກາດ​ທຸກໆ​ສອງ​ອາ​ທິດ. ພ້ອມ​ນັ້ນ​ທຸກ​ຕອນ ສາ​ມາດ​ເຂົ້າ​ເບິ່ງ​ໄດ້​ອີກ​ ​ທາງ​ຊ່ອງ​ທາງ​ຢູ​ທູບຂອງ​ລາຍ​ການ “ຮຽນຮູ້ຮ່ວມກັນ Learn Together Laos”.

ລາຍ​ການ​ຮຽນ​ຮູ້​ຮ່ວມ​ກັນ ເປ​ັນ​ລາຍ​ການ​ທີ່​ສ້າງ​ສັນ​ໜຶ່ງ ​ທີ່​ຈະ​ຊ່ວຍ​ໃຫ້​ເດັກ​ນ້ອຍ​ລາວ​ຮຽນ​ຮູ້​ໄດ້​ດີ​ຂຶ້ນພ້ອມ​ກັບ​ຫຼັກ​ສູດ​ຊັ້ນ​ປະ​ຖົມ​ສຶກ​ສາ​ສະ​ບັບ​ປັບ​ປຸງ​ໃໝ່ ​ພ້ອມ​ກັບວິ​ທີ​ການ​ຮຽນ​ທີ່​ເນັ້ນ​ການ​ປະ​ຕິ​ບັດ​ຕົວ​ຈິງແບບ​ໃໝ່​. ເນື້ອ​ໃນ​ຫຼັກ​ຂອງ​ແຕ່​ລະ​ຕອນແມ່ນ​ອີງ​ໃສ່​ຫຼັກ​ສູດ​ຂອງ​ສົກ​ຮຽນເພື່ອ​ຊ່ວຍ​ໃຫ້​ເດັກ​ນ້ອຍ​ມີ​ການ​ພັດ​ທະ​ນາ​ທັກ​ສະ​ທີ່​ດີ​ຂຶ້ນ. ພາຍ​ໃນ​ຕອນ​ຈະ​ປະ​ກອບ​ມີ​ຫຼາ​ກ​ຫຼາຍ​ເນື້ອ​ຫາ​ເຊັ່ນ ພາກ​ກະ​ຕູນ​ດິນ​ປັ້ນ, ພ້ອມ​ກັບ​ພາ​ກ​ຕົວ​ສະ​ແດງ​ແທ້ ແລະ ພາກ​ເລົ່າ​ນິ​ທານ ເຊິ່ງ​ທັງ​ໝົດ​ນີ້​ແມ່ນ​ສ້າງ​ໂດຍ​ນັກ​ສິ​ລະ​ປິນ​ລາວ.

ລາຍ​ການ​ຮຽນ​ຮູ້​ຮ່ວມ​ກັນ ອອກ​ແບບລາຍ​ການ ໂດຍ​ເອົາ​ການ​ສຶກ​ສາ​ເປັນ​ຫຼັກ ໃນ​ຂະ​ນະ​ດຽວ​ກັນ​ກໍ່​ໃຫ້​ມີ​ຄວາມ​ມ່ວນ​ຊື່ນ ເພື່ອ​ດຶງ​ດູດ​ຜູ້​ຊົມ​ໄວ​ໜຸ່ມ​ນ້ອຍ, ເປັ​ນ​ຮູບ​ແບບ​ການ​ສຶກ​ສາ​ທີ່​ສົ່ງ​ຜ່ານ​ຄວາມ​ບັນ​ເທິງ ຫຼື “ການ​ໃຫ້​ຄວາມ​ບັນ​ເທິງ​ຄຽງ​ຄູ່​ກັບ​ສາ​ລະ​ຄວາມ​ຮູ້” ເຊິ່ງ​ຮູບ​ແບບ​ນີ້ ນຳ​ໃຊ້​ຫຼາຍ​ໃນ​ທົ່ວ​ໂລກ ເຊັ່ນວ່າ ສະ​ຖາ​ບັນ​ການ​ສຶກ​ສາ, ລັດ​ຖະ​ບານ ແລະ ໜ່ວຍ​ງານ​ອື່ນໆ​

ເພື່ອ​ເຜີຍ​ແພ່​ຂໍ້ມູນ​ທີ່​ມີ​ຜົນ​ຕໍ່​ຄ​ວາມ​ຄິດ ແລະ ພຶດ​ຕິ​ກຳ​ຂອງ​ຜູ້​ຮັບ​ຊົມ ແລະ ເພື່ອ​ເວົ້າ​ເຖິງ​ການ​ສຶກ​ສາ, ສຸ​ຂະ​ພາບ ແລະ ບັນ​ຫາ​ທາງ​ສັງ​ຄົມ ເຊິ່ງ​ລາຍ​ການ​ປະ​ເພດ​ນີ້​ຍັງ​ບໍ່​ຄ່ອຍ​ມີ​ຫຼາຍ​ໃນ​ເຂດ​ອາ​ຊີ​ຕາ​ເວັນ​ອອກ​ສຽງ​ໃຕ້ ແລະ ຜູ້​ລິ​ເລີ່ມສ້າງລາຍ​ການ​ທີ່​ໃຫ້​ຄວາມ​ບັນ​ເທິງ​ຄຽງ​ຄູ່​ກັບ​ສາ​ລະ​ຄວາມ​ຮູ້​ໃນ​ປະ​ເທດ​ລາວ ກໍ່​ຄື​ຜູ້​ສ້າງ​ລາຍ​ການຮຽນ​ຮູ້​ຮ່ວມ​ກັນ. ​ຄວາມ​ຄິດລິ​ເລີ່ມ​ຂອງ​ ລາຍ​ການ​ຮຽນ​ຮູ້​ຮ່ວມ​ກັນ ແມ່ນ​ນຳ​ພາ​ໂດຍ ກະ​ຊວງ​ສຶກ​ສາ​ທິ​ການ ແລະ ກິ​ລາ, ໂດຍ​ການ​ຮ່ວມ​ມີ​ກັບ ​ກະ​ຊວງ​ຖະ​ແຫຼງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ່ຽວ ແລະ ​ສະ​ໜັບ​ສະ​ໜັບ​ໂດຍ ລັດ​ຖະ​ບານ​ອົດ​ສະຕ​ຣາ​ລີ ແລະ ສະ​ຫະ​ພາບ​ເອີ​ຣົບ. ລາຍ​ການ​ນີ້​ຜະ​ລິດ​​ໂດຍ ເຄ​ຼ​ເຮົ້າ​ສ​໌ສະ​ຕູ​ດີ​ໂອ (Clay House Studios), ​ບໍ​ລິ​ສັດທີ່​ສ້າງໜັງ ແລະ ​ກະ​ຕູນ​ເອ​ນີ​ເມ​ຊັ້ນຂອງຄົນ​ລາວ.

ເນື້ອ​ໃນ​ຂອງ​ຕອນ​ທຳ​ອິດ ທີ່​ຈະ​ອອກ​ອາ​ກາດ​ໃນ​ວັນ​ອາ​ທິດ 11 ສິງ​ຫາ ແມ່ນກ່ຽວ​ກັບ “ການ​ກຽມ​ພ້ອມ​ສຳ​ລັບ​ວັນ​ເປີ​ດ​ສົກ​ຮຽນ​ໃໝ່”. ຕົວລະຄອນຫຼັກທຸກຕົວຈະເຫັນໃນຕອນທຳອິດນີ້ ເນື່ອງຈາກ​ມີ​ການ​ໂຄ​ສະ​ນາ​ກ່ຽວ​ກັບວັນເປີດສົກຮຽນໃໝ່. ພ້ອມນັ້ນຍັງມີພິທີກອນຜູ້ທີ່ຈະນຳສະເໜີລາຍການຄື ນາງ ນົກ​ຍຸງ ແລະ ນົກນ້ອຍ, ​ເຊິ່ງນົກນ້ອຍຈະເປັນກະຕູນດິນປັ້ນ. ສາກເຫຼົ່ານີ້ແມ່ນມີການໃຊ້ເຕັກນິກພິເສດ ເພື່ອເຮັດໃຫ້ນົກນ້ອຍສາມາດເວົ້າ ແລະ ບິນໄປ-ມາໄດ້. ​

ນອກ​ນັ້ນ ນາງ ດາດ້າ ຜູ້ເລົ່າເລື່ອງ ຍັງຈະມາເລົ່ານິທານທີ່ມ່ວນຊື່ນຂອງນົກນ້ອຍຜູ້ໜ້າຮັກ ຜູ້ທີ່ຕ້ອງການຢາກໄປໂຮງຮຽນຄືກັນ ໃຫ້​ຟັງ​ນຳ ແລະ ພາກກະຕູນດິນປັ້ນ ຈະເປັນພາກທີ່ເດັກນ້ອຍມັກນຳ​ດ້ວຍ.

ພາກ​ກະ​ຕູນ​ດິນ​ປັ້ນນີ້ ຈະ​ໃຊ້​ເຕັກ​ນິກການຖ່າຍ​ພາບການ​ເຄື່ອນ​ໄຫວເທື່ອລະ​ຄັ້ງ ແລະ 1 ວິ​ນາ​ທີ ຈະ​ມີ​ການ​ເຄື່ອນ​ໄຫວ​ຂອງ​ພາບ​ນັ້ນ 15 ຄັ້ງ. ຕົວ​ລະ​ຄອນ​ທຸກ​ຕົວ​ແມ່ນ​ປັ້ນ​ຈາກ​ດິນ​ປັ້ນ​ສູດ​ພິ​ເສດ​ໂດຍ ສິ​ລະ​ປິນ ທ່ານ ສຸ​ລິ​ຍາ ພູ​ມິ​ວົງ, ນັກ​ສິ​ລະ​ປິນ​ໜຸ່ມ​ຜູ້ທີ​ມີ​ແຮງ​ບັນ​ດານ​ໃຈ. ຕົວ​ລະ​ຄອນ ແລະ ອຸ​ປະ​ກອນ​ທຸກ​ຢ່າງ​ແມ່ນ​ເຮັດ​ດ​້ວຍ​ມື ໂດຍ ນັກ​ສິ​ລະ​ປິນ​ຂອງເຄ​ຼ​ເຮົ້າ​ສ​໌ສະ​ຕູ​ດີ​ໂອ. ໃນ​ຕອນ​ທຳ​ອິດ, ຜູ້​ຊົມ​ຈະ​ໄດ້​ເຫັນ​ບ້ານ​ປ່າ​ຜາ​ສຸກ ທີ່​ພ້ອມ​ແລ້ວ​ສຳ​ລັບ​ມື້​ເປີດ​ສົກ​ຮຽນ​ໃໝ່. ຕົວ​ລະ​ຄອນ​ຫຼັກ​ໂຕ​ນ້ອຍໆ​ທີ່​ຊື່​ວ່າ ນາງ​ດີ, ທ້າວດອນ, ທ້າວ​ຄຳ, ທ້າວ​ຈື່​ລີ່, ນາງ​ຫຼ້າ ເຊິ່ງ​ພວກ​ເຂົາ​ທັງ​ໝົດ​ນີ້​ມີ​ຄວາມ​ຕື່ນ​ເຕັ້ນ​ ແລະ ກັງ​ວົນ ​ທີ່​ຈະ​ໄປ​ໂຮງ​ຮຽນ​ຄັ້ງທຳ​ອິດ. ພວກ​ເຂົາຈະ​ໄປ​ປະ​ຊຸມ “ງານ​ຕ້ອນ​ຮັບເຂົ້າ​ສູ່​ການ​ຮຽນ​ຊັ້ນ​ປະ​ຖົມ” ກັບ​ພໍ່​ແມ່​ຂອງ​ພວກ​ເຂົາ ແລະ ພວກ​ເຂົາ​ກໍ່​ຈະ​ພົບ​ກັນ ແຕ່​ວ່າ ຖ້າ​ຫາ​ເຈົ້າ​ຢາກ​ຮູ້​ເລື່ອງ​ລາວ​ຂອງ​ພວກ​ເຂົາ​ອີກ, ຢ່າ​ລືມ​ຕິດ​ຕາມ​ລາຍ​ການ​ຮຽນ​ຮູ້ຮ່ວມ​ກັນ ຮ່ວມ​ກັບ ຄອບ​ຄົວ ແລະ ໝູ່​ເພື່ອ​ນ​ຂອງ​ເຈົ້າ​ເດີ້!

ລາຍ​ການ​ຮຽນ​ຮູ້​ຮ່ວມ​ກັນ, ຈະ​ອອກ​ອາ​ກາດ​ທຸກໆ​ວັນ​ອາ​ທິດທາງ​ຊ່ອງ​ໂທ​ລະ​ພາບ​ແຫ່ງ​ຊາດ​ລາວ ຊ່ອງ 3 ເວ​​ລາ 4.45 ໂມງ​ແລງ ແລະ ທາງ​ໂທ​ລະ​ພາບ ປກ​ສ ເວ​ລາ 10.30 ໂມງ​ເຊົ້າ ແລະ ທາງ​ຊ່ອງ​ຢູ​ທ​ູບ ຮຽນຮູ້ຮ່ວມກັນ Learn Together Laos