Menu

ກະຊວງສຶກສາທິການ ແລະ ກິລາ ໄດ້ສ້າງລາຍການສອນທາງໂທລະພາບ ແລະ ວິທະຍຸຂຶ້ນໃຫມ່ ໂດຍນຳເອົາວິຊາຮຽນຫຼັກໃນຂັ້ນປະຖົມສຶກສາມາສອນ ເພື່ອທົດແທນໃນໄລຍະໂຮງຮຽນປິດຊົ່ວຄາວເນື່ອງຈາກການແຜ່ລະບາດຂອງເຊື້ອພະຍາດຈຸລະໂລກສາຍພັນໃຫມ່ ໂຄວິດ-19

TV Teaching during school closed 1

TV Teaching during school closed 2

TV Teaching during school closed 3

ໂຮງ​ຮຽນ​ຊັ້ນ​ປະ​ຖົມ​ສຶກ​ສາ​ສົມ​ບູນ​ໃນ ສ​ປ​ປ ລາວ​ ໄດ້​ປະ​ກາດ​ປິດ​ຊົ່ວ​ຄາວ​ ຕັ້ງ​ແຕ່​ວັນ​ທີ 19 ເດືອນ​ມີ​ນາ ແລະ ສະ​ຖາ​ບັນ​ຄົ້ນ​ຄວ້າ​ວິ​ທະ​ຍາ​ສາດ​ການ​ສຶກ​ສາ​ໄດ້​ເລີ່ມ​ຖ່າຍ​ທຳ​ວິ​ດີ​ໂອ​ການ​ສອນ​ບົດ​ຮຽນ​ທາງ​ໂທ​ລະ​ພາບ ນັບ​ແຕ່​ວັນ​ທີ 23 ມີນາ ເປັນ​ຕົ້ນ​ມາ​ເພື່ອ​ຊ່ວຍ​ໃຫ້​ນັກ​ຮຽນ​ຊັ້ນ​ປະ​ຖົມ​ສາ​ມາດ​ຮຽນ​ດ້ວຍ​ຕົນ​ເອງ​ຢູ່​ບ້ານໃນໄລຍະໂຮງ​ຮຽນ​ປິດ​ນີ້. ຫົວ​ຂໍ້​​ນຳ​ມາ​ສອນ​ແມ່ນ​ຫລັກ​ສູດ​ຊ່ວຍ​ໃຫ້​ນັກ​ຮຽນ​ສາ​ມາດ​ຮຽນ​ຮູ້​ໄດ້​ໄວ ແລະ ຫລຸດ​ຜ່ອນ​ຜົນ​ກະ​ທົບ​ຈາກ​ການ​ພັກ​ໂຮງ​ຮຽນ​ເປັນ​ເວ​ລາ​ດົນ​, ພ້ອມ​ກັນ​ນີ້​ຍັງ​ມີ​ຈຸດ​ປະ​ສົງ​ເຜີຍ​ແຜ່​ຄວາມ​ຮູ້​ກ່ຽວ​ກັບ​ຄວາມ​ສ່ຽງ​ທີ່​ຈະ​ຕິດ​ເຊື້ອ​ພະ​ຍາດ​ຈາກ​ການ​ແຜ່​ລະ​ບາດ ພ້ອມ​ກັບ​ໃຫ້​ຄຳ​ແນະ​ນຳ​ວິ​ທີ​ການ​ປ້ອງ​ກັນ​ຕົນ​ເອງ ແລະ ສາ​ທິດ​ວິ​ທີ​ການ​ລ້າງ​ມື​ທີ່​ຖືກ​ຕ້ອງ​ອີກ​ດ້ວຍ.

ຜົນ​ງານ​ການ​ສ້າງວິ​ດີ​ໂອ​ການ​ສອນ​ດັ່ງ​ກ່າວ​ແມ່ນ​ໄດ້​ຮັບ​ການ​ສະ​ຫນັບ​ສະ​ຫນູນ​ຈາກ​ລັດ​ຖະ​ບານ​ອົ​ສ​ຕຣາ​ລີ ແລະ ສະ​ຫະ​ພາບ​ເອີ​ຣົບ ໂດຍ​ຜ່ານ​ແຜນ​ງານ​ບີ​ຄວາ. ​ທີມ​ງານ​ຂອງ​ສະ​ຖາ​ບັນ​ຄົ້ນ​ຄວ້າ​ວິ​ທະ​ຍາ​ສາດ​ການ​ສຶກ​ສາ ຮ່ວມ​ກັບ​ນັກ​ພັດ​ທະ​ນາ​ຫລັກ​ສູດ, ທີມ​ງານ​ຖ່າຍ​ທຳ​ວິ​ດີ​ໂອ ແລະ ທີມ​ງານ​ສື່​ການ​ຮຽນ-ການ​ສອນ​ດ້ານ​ອີ​ເລັກ​ໂທ​ຣ​ນິກ ໄດ້​ເຮັດ​ວຽກ​ຢ່າງ​ຫນັກ​ຫນ່ວງ ໃນ​ການ​ສ້າງ​ຜົນ​ງານ​ວິ​ດີ​ໂອ​ການ​ສອນ​ອອກ​ມາ ເພື່ອ​ໃຫ້​ໄດ້ 3 ບົດ​ສອນ ຕໍ່​ມື້. ນາຍ​ຄູ​ສອນ​ຂັ້ນ​ປະ​ຖົມຈຳ​ນວນ 10 ທ່ານ ແລະ ອຳ​ນວຍ​ການ​ໂຮງ​ຮຽນ​ ໄດ້​ອາ​ສາ​ຜັດ​ປ່ຽນ​ກັນ​ເຂົ້າ​ມາ​ຖ່າຍ​ທຳ​ການ​ສອນ​ບົດ​ຮຽນ​ໃນ​ຊ່ວງ​ພັກ​ປີ​ໃຫມ່​ລາວ​ອີກ​ດ້ວຍ.

ສຳ​ລັບ​ວິ​ຊາ​ທີ່​ນຳ​ມາ​ສອນ​ແມ່ນ​ບົດ​ຮຽນ​ແຕ່​ຂັ້ນ ປ.1 ຮອດ ປ.5 ເຊິ່ງ​ໃນ​ນັ້ນ​ມີວິ​ຊາ: ພາ​ສາ​ລາວ, ຄະ​ນິດ​ສາດ ແລະ ພາ​ສາ​ອັງ​ກິດ. ລາຍ​ການ​ຍັງ​ໄດ້​ນຳ​ເອົາ​ບົດ​ຄວາມ​ແນະ​ນຳ​ວິ​ທີ​ການ​ຫລີກ​ລ່ຽງ​ຈາກ​ເຊື້ອ​ພະ​ຍາດ​ໂຄວິດ-19 ໂດຍ​ໃຊ້​ວິ​ທີ​ການ​ແທດ​ເຫມາະ​ກັບ​ນັກ​ຮຽນ​ຂັ້ນ​ປະ​ຖົມ​ເພື່ອ​ຄວາມ​ເຂົ້າ​ໃຈ​ງ່າຍ ແລະ ບົດ​ຄວາມ​ສົ່ງ​ເສີມ​ໃຫ້​ເຂົາ​ເຈົ້າ​ຝຶກ​ຝົນ​ຢູ່​ບ້ານ, ຫມັ່ນ​ອ່ານ​ບົດ​ຮຽນ, ການ​ຮັກ​ສາ​ປຶ້ມ​ແບບ​ຮຽນ​ຂອງ​ຕົນ ແລະ ຊ່ວຍ​ເຫລືອ​ພໍ່​ແມ່​ເຮັດ​ວຽກ​ເຮືອນ​ນຳ​ອີກ.

ລາຍ​ການ​ນີ້​ແມ່ນ​ໄດ້​ອອກ​ອາ​ກາດ ສອງ​ເທື່ອ​ຕໍ່​ມື້ ທາງ​ໂທ​ລະ​ພາບ​ແຫ່ງ​ຊາດ​ລາວ​ຊ່ອງ 1 ແລະ ຫ້າ​ເທື່ອ​ຕໍ່​ອາ​ທິດ​ທາງວິ​ທະ​ຍຸ​ກະ​ຈາຍ​ສຽງ​ແຫ່ງ​ຊາດ​ທັງ​ລະ​ບົບ FM ແລະ AM. ການ​ອອກ​ອາ​ກາດ​ແຕ່​ລະ​ເທື່ອ​ແມ່ນ​ນຳ​ເອົາ​ການ​ສອນ ສອງວິ​ຊາ​ມາ​ສອນ ລວມ​ເປັນ 30 ນາ​ທີ.

ນາຍ​ຄູ​ຍັງ​ໄດ້​ນຳ​ໃຊ້​ສື່​ອອນ​ລາຍ ແລະ ສົ່ງ​ຂໍ້​ຄວາມ​ທາງ​ມື​ຖື​ເພື່ອ​ຕິດ​ຕໍ່​ກັບ​ນັກ​ຮຽນ​ຂອງ​ຕົນ​ເພື່ອ​ຊ່ວຍ​ອະ​ທິ​ບາຍ​ບົດ​ຮຽນ​ເພີ່ມ​ເຕີມ, ພ້ອມ​ທັງ​ໃຫ້​ວຽກ​ບ້ານ ແລະ ກວດ​ຄືນ​ນຳ​ອີກ.

ລາຍ​ການ​ນີ້​ຈະ​ຍັງ​ຄົງ​ສືບ​ຕໍ່​ໄປ​ຈົນ​ຮອດ​ປິດ​ສົກ​ຮຽ​ນ.

ທ່ານ​ສາ​ມາດ​ຕິດ​ຕາມ​ລາຍ​ການ​ໄດ້​ທີ່:

– ໂທ​ລະ​ພາບ​ແຫ່ງ​ຊາດ ຊ່ອງ 1, ທຸກໆ​ວັນ ເວ​ລາ 8-8.30 ແລະ 15-15.30

– ວິ​ທະ​ຍຸ​ກະ​ຈາຍ​ສ​ຽງ​ແຫ່ງ​ຊາດ ທາງ​ຄື້ນ AM 567 KHz and FM 103.7 MHz , ທຸກໆ​ວັນຈັນ​, ວັນ​ພຸດ ແລະ ວັນ​ສຸກ, ເວ​ລາ 09:00 – 09:30 ແລະ ວັນ​ເສົາ-ອາ​ທິດ ເວ​ລາ 14:30 – 15:00

– ທາງ​ເຟ​ສ​ບຸກ​ເພ​ສ: “Edu-Sport TV online” ແລະ “ສື່ເອເລັກໂຕຣນິກສຳລັບການຮຽນການສອນ”.