Menu

ຕາງໜ້າຫຼາຍກວ່າ 100 ທ່ານ ໄດ້ເຂົ້າຮ່ວມແລກປ່ຽນ ແລະ ຖອດຖອນບົດຮຽນໃນການພັດທະນາຫຼັກສູດ ແລະ ການຈັດຕັ້ງປະຕິບັດຫຼັກສູດ ສະບັບປັບປຸງໃໝ່.

Grade 1 teacher doing a Lao Language lesson (website)

Grade 2 teachers being trained on the new Sciences and Environment curriculum (website)

DSC_0130 (website)

DSC_0095 (website)

DSC_0092 (website)

Districts receiving Grade 2 materials for schools (website)

ໃນ​ຂະ​ນະ​ທີ່ ການຈັດຕັ້ງປະຕິບັດພັດທະນາຫຼັກສູດຊັ້ນປະຖົມສຶກສາ ສະບັບປັບປຸງໃໝ່ ດຳເນີນມາຮອດຂັ້ນຕອນໄລຍະກາງຂອງແຜນງານ, ກະຊວງສຶກສາທິການ ແລະ ກິລາ ໂດຍການສະໜັບສະໜູນຈາກລັດຖະບານອົດສະຕຣາລີ ໄດ້ຈັດກອງປະຊຸມທົບ​ທວນ ແລະ ປຶກ​ສາ​ຫາ​ລື​ໃນ​ການ​ຈັດ​ຕັ້ງ​ປະ​ຕິ​ບັດຫຼັກສູດຊັ້ນປະຖົມສຶກສາ ຮ່ວມກັບພາກສ່ວນທີ່ກ່ຽວຂ້ອງ, ຊຶ່ງຈັດຂຶ້ນໃນວັນທີ 4 ກຸມພາ 2021 ທີ່ນະຄອນຫຼວງວຽງຈັນ. ກອງປະຊຸມດັ່ງກ່າວ ແມ່ນເພື່ອ​ທົບທວນຄືນຄວາມຄືບໜ້າ ແລະ ແລກປ່ຽນຄວາມຄິດເຫັນຈາກບົດຮຽນທີ່ຖອດຖອນໄດ້. ການຈັດຕັ້ງປະຕິບັດຫຼັກສູດຊັ້ນປະຖົມສຶກສາ ຂັ້ນ ປ.1 ໄດ້​ເລີ້ມ​ຕົ້ນ 2 ປີຜ່ານມາ, ແຕ່ເດືອນ ກັນຍາ 2019 ແລະ ໄດ້ສືບຕໍ່ນໍາ​ໃຊ້ຫຼັກສູດຊັ້ນປະຖົມສຶກສາ ຂັ້ນ ປ.2 ​ໃນເດືອນ ກັນຍາ 2020. ສຳ​ລັບການພັດທະນາຫຼັກສູດຊັ້ນປະຖົມສຶກສາ ຂັ້ນ ປ.3 ກຳ​ລັງ​ດຳ​ເນີ​ນການ​ຢູ່​ໃນ​ຂັ້ນ​ສຸດ​ທ້າຍ ​ເພື່ອກຽມນຳໄປຈັດຕັ້ງປະຕິບັດໃນສົກຮຽນປີໜ້າ, ​ພ້ອມດຽວກັນນີ້ ​ໄດ້ດຳເນີນການວາງແຜນ ແລະ ​ການຂຽນຫຼັກສູດຊັ້ນປະຖົມສຶກສາ ຂັ້ນ ປ.4 ແລະ ຂັ້ນ ປ.5 ໃນ​ທ້າຍ​ເດືອ​ນ​ທີ່​ຜ່ານ​ມາ..

ກອງປະຊຸມດັ່ງກ່າວ ໄດ້ໄຂຂຶ້ນໂດຍການເປັນປະທານຂອງທ່ານ ປອ. ອ່ອນແກ້ວ ນວນນະວົງ, ຜູ້ອຳນວຍການ ສະຖາບັນຄົ້ນຄວ້າວິທະຍາສາດການສຶກສາ (ສວສ), ແລະ ປະທານຮ່ວມທ່ານ ນາງ ນາງ ແອນນາ ດາເອຊັນ, ເລຂາທີໜຶ່ງ ຂອງເອກອັກຄະລະຊະທູດ ສະຖານທູດອົດສະຕຣາລີ ປະຈຳ ສປປ ລາວ ໂດຍມີຜູ້ຕາງໜ້າຈາກພາກສ່ວນທີ່ກ່ຽວຂ້ອງເຂົ້າຮ່ວມຫຼາຍກວ່າ 100 ທ່ານ ຈາກກົມກອງອ້ອມຂ້າງກະຊວງ ສສກ, ທີມງານນັກຂຽນຫຼັກສູດ, ວິທະຍາໄລສ້າງຄູ 8 ແຫ່ງ, ແລະ ພະແນກສຶກສາທິການ ແລະ ກິລາແຂວງ ຈຳນວນ 18 ແຂວງ. ຄະ​ນະ​​ພະ​ແນກສຶກ​ສາ​ທິ​ການ ແລະ ກິ​ລາ​ແຂວງ ພ້ອມດ້ວຍຄູອາຈານທີ່ໄດ້ຖືກຄັດເລືອກມາຈາກໂຮງຮຽນຊັ້ນປະຖົມສຶກສາ ​ທັງພາກລັດ ແລະ ເອກະຊົນ ຈຳນວນ 21 ທ່ານຜູ້ທີ່ມີບົດບາດດີເດັ່ນໃນ​ສິດ​ສອນ ແລະ ຈັດຕັ້ງປະຕິບັດຫຼັກສູດຊັ້ນປະຖົມສຶກສາ ຂັ້ນ ປ.1 ແລະ ຂັ້ນ ປ.2 ສະບັບປັບປຸງໃໝ່. ​

ໃນກອງປະຊຸມ ຈະ​ມີ​ການ​ນ​ຳ​ສະ​ເໜີ​ຈາກທ່ານ ປອ. ອ່ອນແກ້ວ ນວນນະວົງ, ຫົວໜ້າທີມງານລາຍວິຊາ ຈາກ ສວສ ແລະ ແຜນງານບີຄວາ ລາຍງານໃຫ້ຜູ້ເຂົ້າຮ່ວມໄດ້ຮັບຊາບ ກ່ຽວກັບການປ່ຽນແປງຫຼັກໆຢູ່ໃນຫຼັກສູດຊັ້ນປະຖົມສຶກສາ ແລະ ເຫດ​ຜົນຂອງການປ່ຽນແປງດັ່ງກ່າວ ລວມໄປເຖິງການນຳເອົາວິທີການຮຽນການສອນແບບໃໝ່ ໂດຍອີງໃສ່ການຮຽນການສອນແບບເນັ້ນການປະຕິ ບັດຕົວຈິງ, ວິທີການປະເມີນການຮຽນການສອນໂດຍ​ນຳ​ໃຊ້ຣູບຣິກ, ການ​ແນະ​ນຳການສອນຫ້ອງຄວບ  ແລະ ລາຍ​ງານ​ຄວາມ​ຄືບ​ໜ​້າ​ໃນ​ການ​ຜະ​ລິດ ແລະ ແຈກຢາຍຊຸດເຄື່ອງມືການຮຽນການສອນ. ຈາກກອງ​ປະ​ຊຸມນີ້, ​ຕາງ​ໜ້າ​ພະ​ແນກ​ສຶກ​ສາ ແລະ ກິ​ລາ​ແຂວງ ແລະ ວິ​ທະ​ຍາ​ໄລ​ສ້າງ​ຄູ ຈະໄດ້ຮັບຟັງການລາຍງານ ພ້ອມທັງປະກອບຄຳຄິດເຫັນຕໍ່​ກັ​ບ​ສິ່ງທ້າທາຍໃນການຈັດຕັ້ງປະຕິບັດຫຼັກສູດຊັ້ນປະຖົມສຶກສາ ສະບັບປັບປຸງໃໝ່ ໃນຂັ້ນແຂວງ ແລະ ຂັ້ນເມືອງ, ໃນ​ຂະນະດຽວກັນ ຄູສິດສອນດີ​ເດັ່ນໃນການຈັດຕັ້ງປະຕິບັດຫຼັກສູດ ຈະ​ໄດ້ແລກປ່ຽນປະສົບການ ກ່ຽວກັບຜົນສຳເລັດ ແລະ ຜ່ານ​ຜ່າສິ່ງທ້າທາຍທີ່ເກີດຂຶ້ນໃນລະຫວ່າງການສິດສອນຫຼັກສູດຊັ້ນປະຖົມສຶກສາ ຂັ້ນ ປ.1 ແລະ ຂັ້ນ ປ.2 . ບັນດາຄູສອນ ຈະໄດ້ລາຍງານ ແລະ ແລກ​ປ່ຽນ ​ກ່ຽວ​ກັບ​ວິ​ທີ​ການສອນແບບໃໝ່ ສຳລັບວິຊາພາສາລາວ, ແລກປ່ຽນປະສົບການກ່ຽວກັບການນຳໃຊ້ການປະເມີນແບບຣູບຣິກ, ວິທີການສອນຫ້ອງຄວບ, ແລະ ການນຳໃຊ້ຊຸດອຸ​ປະ​ກອນ​ໃນຫຼັກສູດ ສະບັບປັບປຸງໃໝ່. ນອກຈາກນີ້ ພວກເຂົາຍັງໄດ້ປະກອບຄຳຄິດເຫັນ ກ່ຽວກັບ ການພັດທະນາຫຼັກສູດຊັ້ນປະຖົມສຶກສາ ຂັ້ນ ປ.4 ແລະ ຂັ້ນ ປ.5 ເຊັ່ນດຽວກັນກັບວິ​ທີການຊຸກຍູ້ຊ່ວຍເຫຼືອ ແລະ ຈັດຕັ້ງຝຶກອົບຮົມການຮຽນການສອນແບບໃໝ່ ໃຫ້ຄູໃນອານາຄົດ.

ການຈັດຕັ້ງປະຕິບັດຫຼັກສູດຊັ້ນປະຖົມສຶກສາ ສະບັບປັບປຸງໃໝ່ ເປັນວຽກງານທີ່ຫຼວງຫຼາຍ ແລະ ຮຽກຮ້ອງໃຫ້ທຸກໆພາກສ່ວນທີ່ກ່ຽວຂ້ອງ ​ໃນ​ລະ​ດັບຊາດ​, ຂັ້ນແຂວງ, ຂັ້ນເມືອງ ແລະ ບັນດາໂຮງຮຽນ ຈົ່ງໃຫ້ການຮ່ວມມືໃນການຈັດຕັ້ງປະຕິບັດວຽກງານດັ່ງກ່າວ. ກອງປະຊຸມ​ທົບ​ທວນ ແລະ ປຶກ​ສາ​ຫາ​ລື​ໃນ​ການ​ຈັດ​ຕັ້ງ​ປະ​ຕິ​ບັດຫຼັກສູດຊັ້ນປະຖົມສຶກສາ ໃນຄັ້ງນີ້ ໄດ້ເປີດໂອກາດໃຫ້ທຸກພາກສ່ວນ ແລະ ທຸກໆຂັ້ນ ມີສ່ວນຮ່ວມເຂົ້າມາແລກປ່ຽນປະສົບການ ລວມທັງປະກອບຄຳຄິດເຫັນເພື່ອສືບຕໍ່ພັດທະນາຫຼັກສູດຂັ້ນຕໍ່ໄປໃນອານາຄົດ. ສຳລັບຊຸດເຄື່ອງມືໃນການຮຽນການສອນຫຼັກສູດຊັ້ນປະຖົມສຶກສາ ສະບັບປັບປຸງໃໝ່ນີ້ ຈະເປັນສິ່ງສຳຄັນເຂົ້າໃນການປັບປຸງຄຸນນະພາບຂອງຜົນການຮຽນຂອງເດັກນ້ອຍ ພ້ອມດຽວກັນ ກໍຊ່ວຍໃຫ້ເດັກຍິງ ແລະ ເດັກຊາຍ ຜູ້ທີ່ມີເກນອາຍຸເຂົ້າໂຮງຮຽນ ໂດຍສະເພາະຜູ້ທີ່ດ້ອຍໂອກາດ ສາມາດອ່ານອອກຂຽນໄດ້.