Menu

ໃນເດືອນທີ່ຜ່ານມາ, ກຸ່ມຄູຝຶກຫຼັກແຫຼ່ງ 3 ທ່ານ ແລະ ຄູ 25 ທ່ານໄດ້ເຂົ້າຮ່ວມການຝຶກອົບຮົມທົດລອງຫຼັກສູດຂັ້ນປ.2 ສະບັບປັບປຸງໃໝ່ ເພື່ອຮຽນ ແລະ ທົດສອບສື່ການຮຽນ ການສອນຂັ້ນ ປ.2 ສະບັບປັບປຸງໃໝ່ ທີ່ຈະນຳໃຊ້ທົ່ວປະເທດ ເຊິ່ງຈະເລີ່ມໃນສົກຮຽນໜ້ານີ້.

DSC_0655-1

DSC_0668-1

DSC_0635-1

DSC_0620-1

ລະ​ຫວ່າງ​ເດືອນ​ກໍ​ລະ​ກົດ – ສິງ​ຫາ 2020, ກະ​ຊວງ​ສຶກ​ສາ​ທິ​ການ ແລະ ກິ​ລາ (ສ​ສກ) ໂດຍ​ການ​ສະ​ໜັບ​ສະ​ໜູນ​ຂອງ​ລັດ​ຖະ​ບານ​ອົດ​ສະ​ຕ​ຣາ​ລີ ແລະ ສະ​ຫະ​ພາບ​ເອີ​ຣົບ ໂດຍ​ຜ່ານ​ແຜນ​ງານ​ບີ​ຄວາ ຈະ​ໄດ້​ຝຶກ​ອົບ​ຮົມ​ໃຫ້​ກັບ​ຄູ​ຂັ້ນ ປ.2 ແລະ ຄູ​ສຶກ​ສາ​ນິ​ເທດຫຼາຍກວ່າ 10,000 ຄົນ ກ່ຽວ​ກັບ​ການ​ນຳ​ໃຊ້​ສື່​ການ​ຮຽນ​ການ​ສອນ​ຂັ້ນ ປ.2 ສະ​ບັບ​ປັບ​ປຸງ​ໃໝ່. ພ້ອມ​ກັນ​ນີ້ ກຸ່ມ​ຄູ​ຝຶກ​ຫຼັກ​ແຫຼ່ງ 3 ທ່ານ ແລະ ຄູ 25 ທ່ານ​ ກໍ່ໄດ້​ເຂົ້າ​ຮ່ວມ​ການ​ຝຶກ​ອົບ​ຮົມ​ທົດ​ລອງແບບ​ເຊິ່ງ​ໜ້າ ໄລ​ຍະ 5 ວັນ ແລະ ນຳ​ໃຊ້​ສື່​ການ​ຝຶກ​ອົບ​ຮົມ.

ທ່ານ ນາງ ຄຳ​ໄມ ສີ​ວົງ​ໄຊ, ຄູ​ຝຶກ​ຫຼັ​ກ​ແຫຼ່ງ​ຈາກ​ກົມ​ສ້າງ​ຄູ ແລະ ທ່ານ ນາງ ພູ​ແຖວ ຢາດ​ສະ​ດາ​ຮັກ, ຄູ​ຂັ້ນ ປ.2, ໄດ້​ເຂົ້າ​ຮ່ວມ​ການ​ຝຶກ​ອົບ​ຮົມ​ທົດ​ລອງ ແລະ ໄດ້ແບ່ງ​ປັນ​ຄວາມ​ປະ​ທັບ​ໃຈ​ຂອງ​ຕົນ.

“ໃນ​ໄລ​ຍະ​ການ​ຝຶກ​ອົບ​ຮົມ, ພວກ​ເຮົາ​ໄດ້​​ແນະ​ນຳ​ປຶ້ມ​ແບບ​ຮຽນ ແລະ ຄູ່​ມື​ຄູ​ຂັ້ນ​ ປ.2 ພ້ອມ​ທັງ​ແນະ​ນຳ​ການ​ພັດ​ທະ​ນາ​ວິ​ຊາ​ຊີບ​ແບບ​ຕໍ່​ເນື່ອງໃຫ້​ແກ່​ຄູ​ສອນ” ກ່າວ​ໂດຍ ອາ​ຈານ​ຄຳ​ໄມ. “ສື່​ການ​ຮຽນ​ການ​ສອນຂັ້ນ ປ.2 ​ແມ່ນ​ມີ​​ປະ​ໂຫຍດ​ຫຼາຍ ໂດຍ​ສະ​ເພາະ​ຊຸດ​ອຸ​ປະ​ກອນ​ຄູ, ຮູບ​ພາບ​ທີ່​ມີ​ຫຼາກ​ຫຼາຍ​ກິດ​ຈະ​ກຳ ແລະ ວິ​ດີ​ໂອ​ການ​ຮຽນ​ຮູ້​ຕ່າງໆ ຮູບ​ພາບ​ທີ່ນຳ​ສະ​ເໜີ​ໃນ​ປຶ້ມ​ແບບ​ຮຽນ​ຈະ​ແຈ້ງ, ມີ​ສີ​ສັນ​, ​ບົດ​ຮຽນ​ມີ​ຄວາມ​ໜ້າ​ສົນ​ໃຈຫຼາຍ​ຂຶ້ນ​ສຳ​ລັບຜູ້​ຮຽນ. ຄູ່​ມື​ຄູປະ​ກອບມ​ີ ບົດ​ສອນ ແລະ ຄຳ​ແນະ​ນ​ຳ​ທີ່​ລະ​ອຽດສຳ​ລັ​ບ​ຄູ​ເພື່ອ​ໄປ​ຈັດ​ຕັ້ງ​ປະ​ຕິ​ບັດ​ບັນ​ດາກິ​ດ​ຈະ​ກຳ​ຕ່າງໆ​ໂດຍ​ສະ​ເພາະ​ເຕັກ​ນິກ​ການ​ສອນ​ໃນ​ວິ​ຊາ​ພາ​ສາ​ລາວ”

ຄູ​ພູ​ແຖວ​ຈຶ່​ໄດ້​ວ່າ ປຶ້ມ​ແບບ​ຮຽນ​ໃໝ່​ຈະ​ຊ່ວຍ​ໃຫ້​ຄູ​ສອນ​ງ່າຍ​ຂຶ້ນ, ໂດຍ​ສະ​ເພາະ​ແມ່ນ​ວິ​ຊາ​ພາ​ສາ​ລາວ​ເພາະ​ວ່າ “ຮູບ​ພາບທັງ​ໝົດ​ແມ່ນ​ເປັນ​ປະ​ໂຫຍດຫຼາຍ​ສຳ​ລັບ​ນັກ​ຮຽນ​ຜູ້​ທີ່​ກຳ​ລັງ​ຮຽນ​ຮູ້​ການ​ອ່ານ;

ນັກ​ຮຽນ​ຈະ​ບອກ​ຊື່​ໄດ້​ຕາມ​ຮູບ​ພາບ ແລະ ອອກ​ສຽງ​ພະ​ຍັນ​ຊະ​ນະ, ສະ​ຫຼະ ແລະ ຕົວ​ສະ​ກົດ​ເຖິງ​ແມ່ນ​ເຂົາ​ເຈົ້າ​ອ່ານບໍ່​ເປັນ​”

ໃນ​ໄລ​ຍະ​ທົດ​ລອງ, ຄູພູ​ແຖວ​ຍັງ​ໄດ້​ຮຽນ​ຮູ້​ການ​ຮຽນ ແລະ ການ​ສອນ​ທີ່​ເນັ້ນ​ການ​ປະ​ຕິ​ບັດ​ຕົວ​ຈິງ​ຂອງວິ​ທີ​ການ​ສອນ​ແບບ​ໃໝ່ທີ່​ມີ​ໃນ​ຫຼັກ​ສູດ​ຂັ້ນ ປ.1 ສະ​ບັບ​ປັບ​ປຸງ​ໃໝ່​ທີ່​ນຳ​ໃຊ້​ໃນ​ສົກ​ຮຽນ​ປັດ​ຈຸ​ບັນ ແລະ ວິ​ທີ​ການ​ສອນ​ນີ້ກໍ່​ມີ​ໃນ​ຫຼັກ​ສູດ​ຂັ້ນ ປ.2. ລາວ​ໝັ້ນ​ໃຈ​ວ່າ​ວິ​ທີ​ການ​ແບບໃໝ່​ນີ້​ຈະ​ຊ່ວຍ​ໃຫ້​ນັກ​ຮຽນ​ຮຽນ​ໄດ້​ດີ​ຂຶ້ນ. “ຫຼັ​ກ​ສູດ​ຂັ້ນ ປ.2 ສະ​ບັບ​ປັບ​ປຸງ​ໃໝ່ແມ່ນ​ເນັ້ນ​ໃສ່​ການ​ຮຽນ​ທີ່​ເນັ້ນ​ການ​ປະ​ຕິ​ບັດ​ຕົວ​ຈິງ. ນັກ​ຮຽນ​ຈະ​ໄດ້​ເຮັດ​ກິດ​ຈະ​ກຳ​ຫຼາຍ​ຂຶ້ນ, ພວກ​ເຂົາ​ຈະ​ໄດ້​ຮຽນ​ຮູ້​ຜ່ານ​ເກມຫຼິ​້ນ​ເກມ ແລະ ນຳ​ໃຊ້​ທັກ​ສະ​ການ​ຟັງ ແລະ ການ​ເວົ້າ​ຂອງ​ເຂົາ​ເຈົ້າ. ຂ້າ​ພະ​ເຈົ້າ​ຄິດ​ວ່າ​ເດັກ​ນ້ອຍ​ຈະ​ເອົາ​ໃຈ​ໃສ່​ ແລະ ມີ​ສ່ວນ​ຮ່ວມຫຼາຍ​​ຂຶ້ນ​ໃນ​ການ​ຮຽນ​ຂອງ​ເຂົາ​ເຈົ້າ“

ຜູ້​ເຂົ້າ​ຮ່ວມ​ການ​ທົດ​ລອງ​ໃຫ້​ຄຳ​ຄິດ​ເຫັນ​ໃນ​ທາງ​ທີ່​ສ້າງ​ສັນ​​ກ່ຽວ​ກັບ​ເປົ້າ​ໝາຍ ແລະ ເນື້ອ​ໃນ​ການ​ຝຶກ​ອົບ​ຮົມ ແລະ ເນັ້ນ​ໃສ່​ຄວາມ​ຍືນ​ຍົງ​ໃນ​ການພັດ​ທະ​ນາ​ອາ​ຊີບ​ເຊິ່ງ​ແມ່ນ​ໜ້າ​ທີ່​ສຳ​ຄັນໃນ​ການ​ປັບ​ປຸງ​ຄຸນ​ນະ​ພາບ​ການ​ສອນ. ແຕ່​ວ່າ​ໄລ​ຍະ​ເວ​ລາ​ໃນ​ການ​ຝຶກ​ອົບ​ຮົມ​ແມ່ນ​ສັ້ນ ແລະ ລວມ​ທຸກ​ລາຍ​ວິ​ຊາ, ເຊິ່ງ​ເຮັດ​ໃຫ້​ເວ​ລາບໍ່​ພຽງ​ພໍ​ໃນ​ການ​ສຶກ​ສາ​ຄົ້ນ​ຄວ້າ​ແຕ່​ລະ​ວິ​ຊາ​ຢ່າງ​ລະ​ອຽດ​ບໍ່​ພຽງພ​ໍ. ດ້ວຍ​ເຫດ​ຜົນ​ນັ້ນ ຄູ​ຈຶ່ງ​​ມີ​ຄວາມຈຳ​ເປັນ​ຕ້ອງ​ໄດ້​ສືບ​ຕໍ່​ຮຽນ​ຮູ້​​ພາຍ​ຫຼັງ​ການ​ຝຶກ​ອົບ​ຮົມ. ໃນ​ປຶ້ມ​ສຳ​ລັບ​ສຳ​ມະ​ນາ​ກອນ ຈະ​ມີກິດ​ຈະ​ກຳ​ການ​ຮຽນ​ຮູ້​ດ້ວຍ​ຕົນ​ເອງ ທີ​່​ສຳ​ມະ​ນາ​ກອນ​ຈະ​ໄດ້​ຮັບ ແລະ ສືບ​ຕໍ່​ການ​ຮຽນ​ຮູ້​ຂອງ​ເຂົາ​ເຈົ້າ. ຂ້າ​ພະ​ເຈົ້າ​ຈະຊຸກ​ຍຸ້​ໃຫ້ຄູ​ທຸກ​ທ່ານ​ທີ່​ຂ້າ​ພະ​ເຈົ້າ​ຝຶກໃຫ້ສຳ​ເລັດໂມ​ດູນ​ຮຽນ​ຮູ້​ດ້ວຍ​ຕົນ​ເອງໂດຍ​ຜ່ານ​ປຶ້ມ​ຄູ່​ມື​ສຳ​ມະ​ນາ​ກອນ. ​

ພ້ອມ​ນັ້ນ ສະ​ຖາ​ບັນ​ຄົ້ນ​ຄວ້າ​ວິ​ທະ​ຍາ​ສາດ​ການ​ສຶກ​ສາ (ສວ​ສ) ຍັງ​ໄດ້ຜະ​ລິດ​ວິ​ດີ​ໂອ​ສຳ​ລັບ​ການ​ພັດ​ທະ​ນາ​ຄູ ທີ່​ຄູ​ສາ​ມາດ​ເຂົ້າ​ເບິ່ງ ໂດຍ​ຜ່ານ​ຊ່ອງ​ທາງ​ຢູ​ທ​ູບ ‘ວິດີໂອສໍາລັບການພັດທະນາຄູ Teacher Development Videos’. ຄູ​ສອນ​ຂັ້ນ ປ.1 ແລະ ຂັ້ນ ປ.2 ຄວນ​ເບິ່ງວິ​ດີ​ໂອເຫຼົ່າ​​ນີ້ ເພື່ອ​ກະ​ກຽມ​ບົດ​ສອນ ຫຼື ຊອກ​ຫາ​ຂໍ້​ມູນ​ກ່ຽວ​ກັບ​ເຕັກ​ນິກ​ສະ​ເພາະ​ເພີ້ມ​ເຕີມ”.

ຄູ​ພູ​ແຖວ​ຍັງ​ເຫັນ​ດີ​ວ່າ “ການ​ຝຶກ​ອົບ​ຮົມ​ແມ່ນ​ການ​ນຳ​ສະ​ເໜີ​ທີ່​ດີ​ຫຼາຍ​ກ່ຽວ​ກັບ​ຫຼັກ​ສູດ​ໃໝ່. ແຕ່​ວ່າ​ພວກ​ເຮົາ​ຕ້ອງ​ສືບ​ຕໍ່​ຮຽນ​ຮູ້​ພາຍ​ຫຼັງ​ການ​ຝຶກ​ອົບ​ຮົມ. ຄວາມ​ທ້າ​ທາຍ​ຂອງ​ພວກ​ເຮົາຄື ຄູ​ຈະ​ຕ້ອງ​ໄດ້​ກະ​ກຽມ​ບົດ​ສອນ ພ້ອມ​ນັ້ນ​ກໍ່​ຕ້ອງ​ກະ​ກຽມ​ສື່​ການ​ຮຽນ ແລະ ການ​ສອນ​ຫຼາຍ​ຂຶ້ນ​ເພື່ອ​ເຮັດ​ໃຫ້​ກິດ​ຈະ​ກຳ​ມີ​ຄວາມ​ໜ້າ​ສົນ​ໃຈ ແລະ ມ່ວນ​ຊື່ນ, ເຊິ່ງ​ຄຸ່​ມື​ຄູ​ສະ​ບັບ​ໃໝ່​ທີ່​ມີ​ຂໍ້​ມູນ​ຕ່າງໆ​ນີ້ ​ແມ່ນ​ມີ​ປະ​ໂຫຍດ​ຫຼາຍ. ຂ້າ​ພະ​ເຈົ້າ​ຢາກ​ແນະ​ນຳ​ໃຫ້​ຄູ​ຂັ້ນ ປ.2 ອ່ານ​ຄູ່​ມື​ຄູ​ນີ້​ໃຫ້​ລະ​ອຽດ ແລະ ຫຼາຍໆ​ຄັ້ງ ເພື່ອ​ກະ​ກຽມ​ແຕ່​ລະ​ບົດ​ສອນ.”

ຄຳ​ຄິດ​ເຫັນ​ຈາກ​ອາ​ຈານ​ຄຳ​ໄມ, ຄູ​ພູ​ແຖວ ແລະ ຜູ້​ເຂົ້າ​ຮ່ວມ​ທ່ານ​ອື່ນໆ​ໃນ​ການ​ທົດ​ລອງ​ນີ້ ຊ່ວຍ​ໃນ​ການ​ປັບ​ປຸງ ແລະ ອັບ​ເດດ​ວິ​ທີ​ການ​ຝຶກ​ອົບ​ຮົມ​ຂັ້ນ ປ.2 ແລະ ການ​ກະ​ກຽມ​ສື່​ສຳ​ລັບ​ການ​ປຶກ​ສາ​ຫາ​ລື​ ແລະ ຮັບ​ຮອງໃນ​ຕໍ່​ໜ້າ. ການ​ຈັດ​ຕັ້ງ​ປະ​ຕິ​ບັດ​ການ​ຝຶກ​ອົບ​ຮົມ​ຂັ້ນ ປ.2 ແຫ່ງ​ຊາດ​ແມ່ນ​ຈະ​ເລີ່ມ​ໃນ​ເດືອນ​ພຶດ​ສະ​ພາ​ສຳ​ລັບ​ຄູ​ຝຶກ​ຫຼັກ​ແຫຼ່ງ, ເດືອນ​ມິ​ຖຸ​ນາ​ສຳ​ລັບ​ຄູ​ຝຶກ​ປະ​ຈຳ​ແຂວງ, ຫຼັງ​ຈາກ​ນັ້ນ ບັນ​ດາ​ທ່ານ​ເຫຼົ່າ​ນີ້ ຈະ​ໄດ້​ໄປ​ຝຶກ​ອົບ​ຮົມ​ໃຫ້​ແກ່​ຄູ​ຝຶກ​ຂັ້ນ ປ.2 ແລະ ຄູ​ສຶກ​ສາ​ນິ​ເທດ​ທົ່ວ​ປະ​ເທດ ທີ່​ຈະ​ຈັດ​ຂຶ້ນ​ໃນ​ຊ່ວງ​ເດືອນ​ກໍ​ລະ​ກົດ ແລະ ສິງ​ຫາ ເປັນ​ເວ​ລາ 5 ວັນ.