Menu

ເລີ່ມແຕ່ເດືອນກໍລະກົດ ປີ 2019, ໄດ້ມີການຈັດຝຶກອົບຮົມໃຫ້ແກ່ຄູສອນຂັ້ນ ປ.1, ຜູ້ອຳນວຍການໂຮງຮຽນ ແລະ ຄູສຶກສານິເທດ ກ່ຽວກັບຫຼັກສູດຊັ້ນປະຖົມສຶກສາ ປີທີ 1 ສະບັບປັບປຸງໃໝ່ ເຊິ່ງທີມງານທີ່ລົງຕິດຕາມກໍ່ຄືຄະນະຮັບຜິດຊອບໄດ້ລົງຕິດຕາມການຝຶກອົບຮົມໃນທຸກໆເມືອງເພື່ອ ໃຫ້ການສະໜັບສະໜູນ ແລະ ໃຫ້ຄຳແນະນຳຕ່າງໆ.

Image 003

Image 002

Image 001

Image 004

Image 005

ການ​​ຈັດຝຶກ​ອົບ​ຮົມ​​ກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດຫຼັກ​ສູດ​ຊັ້ນ​ປະ​ຖົມ​ສຶກ​ສາ​ ຫ້ອງ ປ.1 ສະ​ບັບ​ປັບ​ປຸງ​ໃໝ່ນີ້ ເປັນ​ການ​ຈັດ​ຝຶກ​ອົບ​ຮົມ​ຄັ້ງ​ທຳ​ອິດ. ຕະ​ຫຼອດໄລ​ຍະ​ເວ​ລາພຽງແຕ່ 9 ​ອາ​ທິດ ໄດ້​ມີ​ການ​ຈັດ​ຝຶກ​ອົບ​ຮົມ​ວຽກ​ດັ່ງ​ກ່​າວ​ນີ້​ໄດ້​ທັງ​ໝົດ 483 ຄັ້ງ ແລະ ໃນ​ແຕ່​ລະ​ຄັ້ງເວ​ລາການ​ຝຶກອົບ​ຮົມແມ່ນ 6 ມື້ ແມ່ນ​ໄດ້​ຝຶກ​ໃຫ້​ແກ່ ຄູ​ສອນ ຂັ້ນ ປ.1 ຫຼາຍກວ່າ 16,000 ຄົນ,  ຜູ້​ອຳ​ນວຍ​ການ​ໂຮງ​ຮຽນ ແລະ ຄູ​ສຶກ​ສາ​ນິ​ເທດ. ການ​ຝຶກ​ອົບ​ຮົມແມ່ນ​ດຳ​ເນີນ​ໂດຍ​ຄູ​ຝຶກ​ປະ​ຈຳ​ແຂວງ (611 ທ່ານ) ແລະ ຄູ​ຝຶກ​ຫຼັກ​ແຫຼ່ງ (60 ທ່ານ), ພະ​ແນກ​ສຶກ​ສາ​ທິ​ການ ແລະ ກິ​ລາ​ແຂວງ (ສກ​ຂ) ທັງ​ໝົດ 18 ແຂວງ ແລະ ຫ້ອງ​ການ​ສຶກ​ສາ​ທິ​ການ ແລະ ກິ​ລາ​ເມືອງ (ສກມ) ​ຮັບ​ຜິດ​ຊອບ​ປະ​ສານ​ງານ, ຂຶ້ນ​ງົບ​ປະ​ມານ ແລະ ໃຫ້​ການ​ສະ​ໜັບ​ສະ​ໜູນ​ໃນ​ການ​ຈັດ​ຕັ້ງ​ປະ​ຕິ​ບັດ​ການ​ຝຶກ​ອົບ​ຮົມ​ທ​ັງ​ໝົດ​ນີ້ ໂດຍ​ການ​ນຳ​ໃຊ້​​ທຶນສະ​ໜ​ັບ​ສະ​ໜູນ​ການ​ສຶກ​ສາ ທີ່​ສະ​ໜັບ​ສະ​ໜູນ​ໂດຍ​ແຜນ​ງານ​ບີ​ຄວາ.

ທີມ​ງານ​ທີ່​ລົງຕິດ​ຕາມ​ທັງ​ໝົດ​ລວມ​ມີ 46 ທ່ານ​ໄດ້​ເດີນ​ທາງ​ໄປ​ທົ່ວ​ປະ​ເທດ​ລາວ ລວມ​​ມີ​ບັນ​ດາ​ເມືອງ​ຫ່າງ​ໄກ​ສອກ​ຫຼີກ​ທີ່​ສຸດ ເພື່ອ​ຕິດ​ຕາມ​ການ​ຝຶກ​ອົບ​ຮົມ. ທີມ​ງານ​​ທີ່ລົງ​ຕິດ​ຕາມ​​ລວມ​ມີ ​ພະ​ນັກ​ງານ​​ວິ​ຊາ​ການຈາກ​ພະ​ແນກບຳ​ລຸງ​ຄູຂອງ​ກົມ​ສ້າງ​ຄູ, ພະ​ນັກ​ງານ​ວິ​ຊາ​ການ​ຈາກ​ສູນ​ກາງກໍ່​ຄື​ກະ​ຊວງ​ສຶກ​ສາ​ທິ​ການ ແລະ ກິ​ລາ (ໂດຍ​ສະ​ເພາະ​ແມ່ນ​ຄູ​ຝຶກ​ຫຼັກ​ແຫຼ່ງ​ຈາກ​ສະ​ຖາ​ບັນ​ຄົ້ນ​ຄວ້າ​ວິ​ທະ​ຍາ​ສ​າດ​ການ​ສຶກ​ສາ (ສວ​ສ), ກົມ​ສາ​ມັນ​ສຶກ​ສາ, ກົມ​ການ​ສຶກ​ສາ​ຊັ້ນ​ສູງ, ​ກົມ​ການ​ສຶກ​ສາ​ນອກ​ໂຮງ​ຮຽນ), ຊ່ຽວ​ຊານ​ຈາກ​ແຜນ​ງານ​ບີ​ຄວາ ແລະ ພະ​ນັກ​ງານ​ຈາກ​ສະ​ຖານ​ທູດ​ອົດ​ສະ​ຕ​ຣາ​ລີ.

ຜູ້​ຕິດ​ຕາມ​ທຸກ​ທ່ານ​ໄດ້​ນ​ຳ​ໃຊ້​ເຄື່ອງ​ມື​​ຕິດ​ຕາມການ​ຝຶກ​ອົບ​ຮົມ ເພື່ອ​ເກັບ​ກຳ​ຂໍ້​ມູນ​ຂອງທຸກ​ການ​ຝຶກ​ອົບ​ຮົມ. ຕະ​ຫຼອດ​ເດືອນ​ກໍ​ລະ​ກົດ ແລະ ສິງ​ຫາ, ຜູ້​ຕິດ​ຕາມ​ໄດ້​ຮ່ວມ​ສັງ​ເກດ​ການ​ຢ່າງ​ໜ້ອຍ​ໜຶ່ງ​ຄັ້ງໃນແຕ່​ລະ 32 ເມືອງ​ເປົ້າ​ໝາຍ ແລະ ຢ່າງ​ໜ້ອຍ 2 ເມືອງ​​ທີ່ບໍ່​ແມ່ນ​ເມືອງ​ເປົ້າ​ໝາຍ ເຊິ່ງກວມ 40% ຂອງ​ຈຳ​ນວນ​ການ​ຈັດ​ຝຶກ​ອົບ​ຮົມ​ທັງ​ໝົດ. ​

          ຈຸດ​ປະ​ສົງ​ຂອງ​ການ​ຕິດ​ຕາມ​ແມ່ນ​ເພື່ອ​ຕິດ​ຕາມ​​ຄຸນນ​ະ​ພາບ​ໃນການ​ຈັດ​ການ​ຝຶກ​ອົບ​ຮົມ​ ແລະ ​​ປະ​ສິດ​ຕິ​ພາບ​ໃນ​ການ​ປະ​ສານ​ງານ​ຂອງ ສກ​ຂ ແລະ ສກມ ແລະ ພ້ອມ​ນັ້ນ​ກໍ່ເພື່ອ​ເປັນ​ການ​ຖອດ​ຖອນບົດ​ຮຽນ​​ສຳລັບ​ການ​ປັບ​ປຸງ​ຫຼັກ​ສູດ ຂັ້ນ ປ.2 ແລະ ການ​ຈັດ​ຝຶກ​ອົບ​ຮົມ​ໃນ​ປີ​ຕໍ່​ໄປ. ທີມ​ງານ​​ທີ່​ລົງຕິດ​ຕາມ​ສາ​ມາດ​ສັງ​ເກດ​ການ ແລະ ເກັບ​ກຳ ​ຄວາມ​ຄິດ​ເຫັນ​ຈາກ​ຜູ້​ເຂົ້າ​ຮ່ວມ, ຄູ​ຝຶກ ແລະ ຄະ​ນະ​ຈັດ​ຕັ້ງ​ການ​ຝຶກ​ອົບ​ຮົມ. ການ​ມີ​ສ່ວນ​ຮ່ວມ​ຈາກຫຼາຍ​ພາກ​ສ່ວນ ຂອງ​ທີມ​ງານ​ຕິດ​ຕາມ​ ຊ່ວຍ​ໃຫ້​ພະ​ນັກ​ງານ​ຈາກ​ພະ​ແນກ​ບຳ​ລຸງ​ຄູ​ຂອງ​ກົມ​ສ້າງ​ຄູ ແລະ ຄູ​ຝຶກ​ຫຼັກ​ແຫຼ່ງ​ເຫັນ​ໄດ້​ເຖິງ​ຜົນ​ຂອງ​ການ​ຝຶກ​ອົບ​ຮົມ​ຂອງ​ຄູ​ຝຶກ​ປະ​ຈຳ​ແຂວງ ແລະ ​​ໃຫ້ການສະ​ໜັບ​ສະ​ໜູນເຂົາ​ເຈົ້າ​ໃນ​ໄລ​ຍະ​ຂອງ​ການ​ຈັດ​ຝຶກ​ອົບ​ຮົມ.

          ທີມ​ງານ​ທີ່​ລົງ​ຕິດ​ຕາມ​ໄດ້​ສັງ​ເກດ​ການ​ຜູ້​ເຂົ້າ​ຮ່ວມ​ຈຳ​ນວນ 3,963 ທ່ານ ແລະ ໄດ້​ຮັບຄວາມ​ຄິດ​ເຫັນທີ່​ສ້າງ​ສັນ. ການ​ເຂົ້າ​ຮ່ວມ​ຝຶກ​ອົບ​ຮົມ​ປະ​ຕິ​ບັດ​ໄດ້​ດີ, ມີ​ພຽງ​ 1% ທີ່​ຄາດ​ເຄື່ອນ​ຈາກ​ແຜນ​ທີ່​ວາງ​ໄວ້; 99% ຂອງ​ການ​ຝຶກ​ອົບ​ຮົມ ແລະ ສື່​ການ​ສຶກ​ສາ​ໄດ້​ຖືກ​ແຈກ​ຢາຍ​ທັນ​ເວ​ລາ​ເຖິງ​ແມ່ນ​ວ່າ​ຈະ​ແມ່ນ​ລະ​ດູ​ຝົນ.  ​ອີງ​ຕາມ​ການ​ຕິດ​ຕາມ, ບັນ​ດາ​ເມືອງ​ໄດ້​ໃຫ້ການ​ສະ​ໜັບ​ສະ​ໜູນ​ເປັນ​ຢ່າງດີ​​ຕາມ​ການ​ສັງ​ເກດ​ການ​ໃນ​ທຸກກອງ​ປ​ະ​ຊຸມ.

ຄູ​ຝຶກ ແລະ ສຳ​ມະ​ນາ​ກອນ ມີ​ຄວາມ​ຫ້າວ​ຫັນ ແລະ ມີ​ສ່ວນ​ຮ່ວມ​ໃນ​ໄລ​ຍະ​ການ​ຝຶກ​ອົບ​ຮົມ, ມີ​ຫຼາຍ​ຄັ້ງ​ທີ່​ເລີ່ມ​ການ​ຝຶກ​ອົບ​ຮົມ​ຕັ້ງ​ແຕ່​ເຊົ້າໆ ແລະ ຢູ່​ຈົນ​ຫຼັງ​ໂມງ​ເລີກ. “ມີ​ຫຼາຍໆ​ບ່ອນ ທີ່​ພວກ​ເຮົາ​ເຫັນ​ຄູ​ຝຶກ​ປະ​ຈຳ​ແຂວງ ແລະ ສກມ ເຮັດ​ວຽກ​ວັນ​ອາ​ທິດ​ເພື່ອ​ກະ​ກຽມ​ສະ​ຖານ​ທີ່​ຝຶກ​ອົບ​ຮົມ; ຄູ​ຝຶກ​ປະ​ຈຳ​ແຂວງ​ຈາກ​ເຂດ​ດຽວ​ກັນ ແມ່ນ​ຊ່ວຍ​ກັນ​ໃນ​ການ​ວາງ​ແຜນ ແລະ ຈັດ​ການ​ຝຶກ​ອົບ​ຮົມ; ຜູ້​ເຂົ້າ​ຮ່ວມກໍ່​ມີ​ຄວາມ​ຫ້າວ​ຫັນ​ຫຼາຍ​ທີ່​ຈະ​ຮຽນ​ຮູ້, ຝຶກ​ຝົນ​ເຕັກ​ນິກ​ໃໝ່ໆ​ເປັນ​ກຸ່ມ​ນ້ອຍ ແລະ ມີຄຳ​ຖາມ​​ທີ່​ຫຼາກ​ຫຼາຍຕໍ່​ຄູ​ຝຶກ​ປະ​ຈຳ​ແຂວງ” ກ່າວ​ໂດຍ​ທີມ​ງານ​ຕິດ​ຕາມ​ຈາກ​ແຂວງ​ສະ​ຫວັນ​ນະ​ເຂດ.

          ຄວາມ​ຄິດ​ເຫັນ​ຈາກ​ສຳ​ມະ​ນາ​ກອນ​ຕໍ່​ກັບ​ຄູນ​ນະ​ພາບ​ການ​ຝຶກ​ອົບ​ຮົມ ແລະ ສື່​ການ​ຮຽນ​ການ​ສອນ​ສຳ​ລັບ​ຫຼັກ​ສູດ​ຊັ້ນ​ປະ​ຖົມ​ສຶກ​ສາ​ ຂັ້ນ ປ.1 ​ສະ​ບັບ​ປັບ​ປຸງ​ໃໝ່ ​​ກໍ່ແມ່ນ​ດີ. “ຄູ​ສອນ​ແມ່ນ​ມີ​ຄວາມ​ກະ​ຕື​ລື​ລົ້ນ​ໃນ​ການ​ໃຊ້​ຫຼັກ​ສູດ​ສະ​ບັບ​ປັບ​ປຸງ​ໃໝ່​ເພື່ອ​ສອນ​ເດັກ​ນ້ອຍ​ໃນ​ໂຮງ​ຮຽນ​ຂອງ​ເຂົາ​ເຈົ້າ. ພວກ​ເຂົາ​ມັກ​ວິ​ທີ​ການ​ສອນ​ແບບ​ໃໝ່​ທີ່​ມີ​ກິດ​ຈະ​ກຳ​ຫຼາຍ​ຂຶ້ນ ແລະ ພວກ​ເຂົາ​ເຊ​ື່ອ​ວ່າ ມັນ​ຈະ​ຊ່ວຍ​ໃຫ້​ເດັກ​ນ້ອຍ​ຮຽນ​ໄດ້​ດີ​ຂຶ້ນ” ກ່າວ​ໂດຍ​ທີມ​ງານ​ຕິດ​ຕາມ​ຈາກ​ເມືອງ​ຄົງ​ເຊ​ໂດນ, ແຂວງ​ສາ​ລະ​ວັນ.

          ຈາກ​ການ​ຕິດ​ຕາມ​ການ​ຝຶກ​ອົບ​ຮົມ​ເຫັນ​ວ່າ​ມີ​ບາງ​ຈຸດ​ທີ່​ຕ້ອງ​ໄດ້​ປັບ​ປຸງ​ເຊັ່ນ​ວ່າ ຂະ​ໜາດ​ຂອງ​ຫ້ອງ​ປະ​ຊຸມ ຫຼື ເພີ້ມ​ເວ​ລາ​ໃນ​ການ​ຝຶກ​ອົບ​ຮົມ​ຂຶ້ນ​ຕື່ມ​ສຳ​ລັບ​ການ​ຝຶກ​ການ​ອອກ​ສຽງ​ພາ​ສາ​ລາວ ຫຼື ການນຳ​ໃຊ້​ເກນ​ການ​ປະ​ເມີນ.

          ຂອບ​ເຂດ​ການ​ຕິດ​ຕາມ ແລະ ການ​ຝຶກ​ອົບ​ຮົມ​ຫຼັກ​ສູດ​ຊັ້ນ​ປະ​ຖົມ​ສຶກ​ສາ​ສະ​ບັບ​ປັບ​ປ​ຸງ​ໃໝ່​ແມ່ນເປັນ​ທີ່​ພໍໃຈ. ສິ່ງ​ທີ່​ສຳ​ຄັນກໍ່​ຄື: ການ​ປັບ​ປຸງ​ເຕັກ​ນິກ​ການ​ສອນ ແລະ ຜົນການ​ຮຽນ​ຮູ້​ຂອງ​ເດັກ​ນ້ອຍ​ລາວ​ທີ່​ຢູ່​ໃນ​ເກນ​ເຂົ້າ​ຮຽນ​ຊັ້ນ​ປະ​ຖົມໃຫ້​ດີ​ຂຶ້ນ​ກວ່າ​ເກົ່າ