Menu

ໃນຕອນນີ້ ແຕ່ລະເມືອງຈະປະສານຫາໂຮງຮຽນປະຖົມເພື່ອແຈກຢາຍສື່ການຮຽນການສອນສະບັບປັບປຸງໃໝ່ສຳລັບ ຫ້ອງ ປ.1 ກ່ອນມື້ເປີດສົກຮຽນໃໝ່

Image 001

Image 005

Image 003

Image 004

ສື່​ການ​ຮຽນ​ການ​ສອນ​ທັງ​ໝົດ​ເຊິ່ງ​ມີ ປຶ້ມ​ແບບ​ຮຽນຂັ້ນ ປ.1 ຈຳ​ນວນ 856,000 ຫົວ ແລະ ຊຸດ​ສື່​ການ​ຮຽນ​ການ​ສອນ​ສຳ​ລັບ​ຄູ​ຂັ້ນ ປ.1 ຫຼາຍກວ່າ 9,000 ຊຸດ ໄດ້​ຖືກ​ນຳ​ສົ່ງ​ໄປເຖິງ 148 ເມືອງ​ທົ່ວ​ ສ​ປ​ປ ລາວ ແລ້ວ.

ໃນ​ຕອນ​ນີ້ ຫ້ອງ​ການ​ສຶກ​ສາ​ທິ​ການ ແລະ ກິ​ລາ​ເມືອງ (ສກມ) ຈະ​ກະ​ກຽມ​ປະ​ສານ​ຫາ​ໂຮງ​ຮຽນ​ປະ​ຖົມ​ພາກ​ລັດ​ທຸກ​ໂຮງ​ຮຽນ​ ເພື່ອ​ມາ​ຮັບ​ເອົາ​ປ​ຶ້ມ​ແບບ​ຮຽນ ແລະ ຊຸດ​ສື່​ການ​ຮຽນ​ການ​ສອນ​ສຳ​ລັບ​ຄູ​ກ່ອນ​ມື້​ເປີດ​ສົກ​ຮຽນ​ໃໝ່ ວັນ​ທີ 1 ກັນ​ຍາ​ນີ້. ຫ້ອງ​ການ​ສຶກ​ສາ​ທິ​ການ ແລະ ກິ​ລາ​ເມືອງ​ທຸກ​ເມືອງ ຈະ​ຕ້ອງ​ຮັບ​ປະ​ກັນ​ວ່າ ຜູ້​ອຳ​ນວຍ​ການ​ໂຮງ​ຮຽນ​ປະ​ຖົມ​ພາກ​ລັດ​ທຸກ​ແຫ່ງ ແລະ ຄູ​ຫ້ອງ ປ.1 ທຸກ​ຄົນ ໄດ້​ຮັບ​ຄຳ​ແນະ​ນຳ​ເພື່ອ​ມາ​ຮັບ​ເອົາ​ສື່​ການ​ຮຽນ​ການ​ສອນ​ຈາກ​ເມືອງ​ຂອງ​ຕົນ. ໂຮງ​ຮຽນ​ສາ​ມາດ​ນຳ​ໃຊ້​ເງິນ​ບໍ​ລິ​ຫານ​ໂຮງ​ຮຽນ​ຂອງ​ເຂົາ​ເຈົ້າ​ເພື່ອ​ມາ​ຮັບ ຫຼື ເອົາ​ປຶ້ມ.

​ນັກ​ຮຽນ ຫ້ອງ ປ.1 ທຸກ​ຄົນ ຈະ​ໄດ້​ຮັບ​ຊຸດ​ປຶ້ມ​ແບບ​ຮຽນ​ສີ່​ຫົວ​ຟີ​ຣຄື: ວິ​ຊາ​ພາ​ສາ​ລາວສອງ​ຫົວ, ວິ​ຊາ​ຄຸນ​ສົມ​ບັດ​ໜຶ່ງຫົວ ແລະ ວິ​ຊາວິ​ທະ​ຍາ​ສາດ ແລະ ສິ່ງ​ແວດ​ລ້ອມ​ໜຶ່ງ​ຫົວ.

ປຶ້ມ​ແບບ​ຮຽນ​ສະ​ບັບ​ປັບ​ປຸງ​ໃໝ່​ນີ້ ມີ​ສີ​ສັນ​ສວຍ​ງາມ ແລະ ພາບ​ປະ​ຈັກ​ຕາ​ຫຼາຍ​ຢ່າງ ເພື່ອ​ເພີ້ມ​ຄວາມ​ສົນ​ໃຈ ແລະ ການ​ຈື່​ຈຳ​ຂອງ​ນັກ​ຮຽນ.

ຫ້ອງ ປ.1 ທຸກ​ໂຮງ​ຮຽນ ຈະ​ໄດ້​ຮັບ​ຊຸດ​ສື່​ການ​ຮຽນ​ການ​ສອນ ເຊິ່ງ​ຊຸດ​ດັ່ງ​ກ່າວ​ປະ​ກອບ​ມີ ປຶ້ມ​ນິ​ທານ, ປຶ້ມ​ອ່ານ​ຕາມ​ຕາມ​ເກນ​ອາ​ຍຸ, ບັດ​ຄຳ​ສັບ, ໂພ​ສ​ເຕີ້ ແລະ ບັນ​ທັດ​ຂະ​ຫຍາຍ ເພື່ອ​ນຳ​ໃຊ້​ເຮັດ​ກິດ​ຈະ​ກຳ​ໃນ​ຫ້ອງ​ຮຽນ, ເພື່ອ​ສົ່ງ​ເສີມ​ການ​ຮູ້​ໜັງ​ສື​ລາວ ແລະ ພັດ​ທະ​ນາການ​ຮູ້​ໜັງ​ສື​ສຳ​ລັບ​ຜູ້​ອ່ານ​ໄວ​ໜຸ່ມ.

ທຸກ​ສື່​ການ​ຮຽນ​ການ​ສອນແມ່ນ​ໄດ້​ທົດ​ລອງ​ນຳ​ໃຊ້​ກັບ​ບັນ​ດາ​ໂຮງ​ຮຽນ​​ທົດ​ລອງພາຍໃນ​ປະ​ເທດ ແລະ ໄດ້​ມີ​ການ​ປັບ​ປຸງ​​ຕາມ​ຄຳ​ຄິດ​ເຫັນ​ຈາກ​ໂຄງ​ການ​ທົດ​ລອງ

ລັກ​ສະ​ນະ​ພິ​ເສດ​ຂອງ​ຫຼັກ​ສູດ​ສະ​ບັບ​ປັບ​ປຸງ​ໃໝ່​ນີ້ແມ່ນ ​ອາ​ທິດແຫ່ງ​ການ​ແນະ​ນຳ​ເບື້ອງ​ຕົ້ນ. ໃນ​ຊ່ວງ​ອາ​ທິດ​ທຳ​ອິດ​ຂອງ​ການ​ເປີດ​ສົກ​ຮຽນ, ນັກ​ຮຽນ ຫ້ອງ ປ.1 ຈະ​ໄດ້​ປະ​ຕິ​ບັດ​ຕາມ​ແຜນ​ກິດ​ຈະ​ກຳ​ເພື່ອ​ຊ່ວຍ​ໃຫ້​ເຂົາ​ເຈົ້າ​ ມີ​ຄວາມ​ຮູ້​ສຶກ​ຄຸ້ນ​ເຄີຍ​ກັບ​ຊິ​ວິດ​ໃນ​ໂຮງ​ຮຽນ ແລະ ສ້າງ​ຄວາມ​ໝັ້ນ​ໃຈ​ໃຫ້​ເຂົາ​ເຈົ້າໃນ​ກິດ​ຈະ​ກຳ​ປ​ະ​ຈຳ​ວັນ​ຫຼັກໆ, ພຶດ​ຕິ​ກຳ ແລະ ທັກ​ສະ​ທີ່​ຈຳ​ເປັນ​ໃນ​ໂຮງ​ຮຽນ.

ອາ​ທິດ​ແຫ່ງ​ການ​ແນະ​ນຳ​ເບື້ອງ​ຕົ້ນ ຈະ​ຊ່ວຍ​ຮັບ​ປະ​ກັນ​ວ່າ​ເດັກ​ນ້ອຍ ຈະ​ເຫັນ​ວ່າ​ໂຮງ​ຮຽນ​ມີ​ຄວາມ​ມ່ວນ​ຊື່ນ ແລະ ໜ້າ​ສົນ​ໃຈ ແລະ ຍັງ​ເປັນ​ທີ່​ຮ​ັບ​ຮູ້​ວ່າ​ສິ່ງ​ເຫຼົ່າ​ນີ້​ສົ່ງ​ຜົນ​ໃນ​ທາງບວກ​ຕໍ່​ຜົນ​ການ​ຮຽນ​ຂອງ​ເດັກ​ນຳ​ດ​້ວຍ. ການ​ມາ​ຮັບ​ເອົາ​ສື່​ການ​ຮຽນ​ການ​ສອນ​ກ່ອນ​ມື້​ເປີດ​ສົກ​ຮຽນ​ໃໝ່​ມີ​ຄວາມ​ສຳ​ຄັນ​ຫຼາຍ ເພາະ​ຈະ​ເຮັດ​ໃຫ້ ນັກ​ຮຽນຫ້ອງ ປ.1 ສາ​ມາດ​ເລີ່ມ​ອາ​ທິດ​ແຫ່ງ​ການ​ແນະ​ນຳ​ເບື້ອງ​ຕົ້ນກັບ​ຫຼັກ​ສູດ​ສະ​ບັບ​ປັບ​ປຸງ​ໃໝ່​​ໄດ້. ກະ​ຊວງ​ສຶກ​ສາ​ທິ​ການ ແລະ ກິ​ລາ ຈະ​ອອກ​ອາ​ກາດ​ໂຄ​ສະ​ນະ​ທາງວິ​ທະ​ຍຸ​ໃນ​ເດືອນ​ສິງ​ຫາ​ນີ້ ເພື່ອ​ແນະ​ນຳ​ໃຫ້​ທຸກ​ໂຮງ​ຮຽນ​ປະ​ຖົມ​ພາກ​ລັດ​ໄປ​ຮັບ​ເອົາ​ສື່​ການ​ຮຽນ​ການ​ສອນ​ຂອ​ງ​ໂຮງ​ຮຽນ​ຂອງ​ຕົນ.

ກະ​ຊວງ​ສຶກ​ສ​າ​ທິ​ການ ແລະ ກິ​ລາ ໄດ້​ຮັບ​ການ​ສະ​ໜັບ​ສະ​ໜູນ​ຈາກ​ລັດ​ຖະ​ບານ​ອົດ​ສະ​ຕ​ຣາ​ລີ, ສະ​ຫະ​ພາບເອີ​ຣົບ ແລະ ອົງ​ການ​ພັດ​ທະ​ນາ​ສາ​ກົນປະ​ເທດ​ສະ​ຫະ​ລັດ​ອາ​ເມ​ລິ​ກາ ໂດຍ​ຜ່ານ​ແຜນ​ງານບີ​ຄວາ ເພື່ອ​ປັບ​ປ​ຸງ ແລະ ສົ່ງ​ມອບ​ສື່​ການ​ຮຽນ​ການ​ສອນ​ສະ​ບັບ​ປັບ​ປຸງ​ໃໝ່​ໃຫ້ແກ່​ທຸກ​ໂຮງ​ຮ​ຽນ​ປະ​ຖົມ​ພາ​ກ​ລັດ​ທົ່ວ​ປະ​ເທດ.