Menu

ຊົມເຊີຍ ວັນເດັກນ້ອຍສາກົນ!
ເພື່ອເປັນການສະເຫຼີມສະຫຼອງວັນເດັກນ້ອຍ ສາກົນປີນີ້, ພວກເຮົາຈະນຳສະເໜີເບື້ອງຫຼັງການຖ່າຍທຳ ຮຽນຮ່ວມກັນ ເຊິ່ງ ເປັນ ໜັງ ອະນິເມຊັ່ນ ທາງດ້ານການສຶກສາ ທີ່ຈະອອກອາກາດ ທາງຊ່ອງ 3 ຂອງ ໂທລະພາບແຫ່ງຊາດ ແລະ ລາວສະຕາ ຕັ້ງແຕ່ວັນທີ 10 ມິຖຸນາ ເປັນຕົ້ນໄປ. ອົດສະຕຣາລີ ແລະ ສະຫະພາບ ເອີຣົບ ມີຄວາມພາກພູມໃຈຈະສະໜັບສະໜູນໂຄງ ການນີ້ເພື່ອຊຸກຍູ້ສົ່ງເສີມໃຫ້ເດັກນ້ອຍໄດ້ ພັດທະນາມີ ໃຈຮັກໃນການຮຽນ ແລະ ເຂົ້າເຖິງສັກກາຍະພາບຂອງພວກເຂົາຢ່າງ ເຕັມທີ.

20170728_232001-01-01

ທ່ານ ສຸລິຍາ ກໍາລັງແຕ້ມຕົວລະຄອນແມວ ແລະ ໝາ ຮອບສຸດທ້າຍ

20171015_170027

ແລະ......ເລິ່ມການສະແດງ! ສັນຕິ ແລະ ປູນາ, ຕົວລະຄອນໝູ່ເພື່ອນສອງຄົນ ໃນລາຍການ ຮຽນຮູ້ຮ່ວມກັນ

IMG_3485

ທົດລອງສາຍໜັງກາຕູນຮອບທໍາອິດ ຮ່ວມກັບເດັກນ້ອຍໂຮງຮຽນປະຖົມ

ໜຶ່ງ​ໃນ​ຜູ້​ໄດ້​ຮັບ​ກອງ​ທຶນ​​ທີ່​ມີ​ຄວາມຄິດ​ສ້າງ​ສັນຂອງ​ແຜນ​ງານ​ບີ​ຄວາ ທີ່​ຢູ່​ໃນ​ອັນ​ດັບ​ຕົ້ນໆ ແມ່ນ ບໍ​ລິ​ສັດ ເຄຼ​ ຮາວ​ສ໌ ສະ​ຕູ​ດິ​ໂອ ຊຶ່ງ​ເປັນ​ບໍ​ລິ​ສັດ​ຖ່າຍ​ທຳ​ໜັງ ແລະ ກາ​ຕູນ ທ້ອງ​ຖິ່ນ​ຂອງລາວ. ໂຄງ​ການ​ຂອງ​ພວກ​ເຂົາ ແມ່ນ​ການ​ປະ​ສົມ​ປະ​ສານ​ ລະ​ຫວ່າງ​ໜັງ​ອະ​ນິ​ເມ​ຊັ່ນ​ທີ່​ໃຫ້​ການ​ສຶ​ກສາ ແລະ ອຸ​ປະ​ກອນ​ການ​ຮຽນ ເພື່ອ​ສ້າງ​ແຮງ​ຈູ​ງ​ໃຈ​ໃຫ້​ເດັກ​ນ້ອຍ​ໄປ​ໂຮງ​ຮຽນ ແລະ ມີ​ສ່ວນ​ຮ່ວມໃນ​ໂຮງ​ຮຽນຫຼາຍ​ຂື້ນ. ​​ໂຄ​ງ​ການ​ດັ່ງ​ກ່າວນີ້ ຈະ​ຖືກ​ນຳ​ໃຊ້​ຄວບ​ຄູ່​ກັບ​ປື້ມ​ແບບ​ຮຽນ ແລະ ປື້ມ​ຄູ່​ມື​ຄູ ຢູ່​ໂຮງ​ຮຽນ​ທົດ​ລອງ 6 ແຫ່ງ ໃນ​ແຂວງ​ອັດ​ຕະ​ປື ແລະ ແຂວງ​ສາ​ລະ​ວັນ, ກາ​ຕູນ​ດິນ​ປັ້ນ ທີ່​ມີ​ຊື່​ວ່າ “ຮຽນ​ຮູ້​ຮ່ວມ​ກັນ” ຈະໄດ້​ອອກ​ອາ​ກາດ​ຢູ່​ສະ​ຖານ​ນີ​ໂທ​ລະ​ພາບ​ແຫ່ງ​ຊາດ ​ຕັ້ງ​ແຕ່​ວັນ​ທີ 10 ມິ​ຖຸ​ນາ ເປັນ​ຕົ້ນ​ໄປ. ເດັກ​ທຸກ​ຄ​ົນ​ໃນ​ປະ​ເທດ​ລາວ ລວມ​ທັງ​ຜູ້​ປົກ​ຄອງ​ຂອງ​ພວກ​ເຂົາ ຈະ​ໄດ້​ເຫັນ​ການ​ຜະ​ຈົນ​ໄພ​ຂອງ ອ້າຍ​ແດງ, ໝາ​ສີ​ແດງ​ທີ່​ມີ​ຄວາມ​ສະຫຼາດ ພ້ອມ​ດ້ວຍ​ໝູ່​ຂອງ​ລາວ​ອີກ 2 ຄົນ ຊື່​ວ່າ ນ. ປູ​ນາ ເດັກ​ຍິງ​ຊົນ​ເຜົ່າ​ທີ່​ສະຫຼາດ ແລະ ທ. ສັນ​ຕິ ເດັກ​ຊາຍ​ທີ່​ອາ​ໄສ​ຢູ່​ບ້ານ​ຕົ້ນ​ໄມ້​ກັບ​ພໍ່​ຕູ້​ຂອງ​ລາວ. ໃນ​ແຕ່​ລະ​ຕອນ​ຂອງ​ລາຍ​ການ ຮຽນຮູ້ຮ່ວມກັນ, ເດັກ​ນ້ອຍ​ຈະ​ໄດ້​ຮຽນ​ຮູ້​ກ່ຽວ​ກັບ​ຄວາມ​ສຳ​ຄັນ​ຂອງ​ການ​ໄປ​ໂຮງ​ຮຽນ, ການ​ສ້າງ​ໝູ່ ແລະ ການ​ຊ່ວຍ​ເຫຼ​ືອ​ຊຶ່ງ​ກັນ ແລະ ກັນ. ພວກ​ເຂົາ​ຈະ​ໄດ້​ຮຽນ​ຮູ້ ​ກ່ຽວ​ກັບ ການ​ປົກ​ປ້ອງ​ສິ່ງ​ແວດ​ລ້ອມ, ຄວາມ​ປອດ​ໄພ​ເທິງ​ທ້ອງ​ຖະ​ໜົນ​, ສຸ​ຂະ​ສຶກ​ສາ, ໂພ​​ຊະ​ນາ​ການ, ນ້ຳ​ສະ​ອ​າດ ແລະ ບໍ່​ສະ​ອາດ, ການ​ບອກ​ເວ​ລາ, ແລະ ຫົວ​ຂໍ້​ທີ່​ໜ້າ​ສົນ​ໃຈ​ອື່ນໆ ອີກ.

ທ່ານ ສຸ​ລິ​ຍາ ພູ​ມິ​ວົງ, ຄູ​ສອນ​ຢູ່​ພາກວິ​ຊາ​ອອກ​ແບບ​ການ​ສື່​ສານ ຢູ່​ສະ​ຖາ​ບັນ​ວິ​ຈິດ​ສິນແຫ່ງ​ຊາດ, ​ຜູ້ກໍ່​ຕັ້ງ ບໍ​ລິ​ສັດ ເຄຼ​ ຮາວ​ສ໌ ສະ​ຕູ​ດິ​ໂອ­, ທັງ​ເປັນນັກ​ສິ​ນ​ລະ​ປິນ​ຜູ້​ຢູ່​ເບື້ອງຫຼັງ​ລາຍ​ການ ຮຽນຮູ້ຮ່ວມກັນ ກ່າ​ວວ່າ “ກາ​ຕູນ​ດິນ​ປັ້ນ​ແມ່ນ​ຮູບ​ແບບ​ໜຶ່ງ​ຂອງ​ສິ​ນ​ລະ​ປະ ແລະ ມີ​ມົນ​ສະ​ເໜ່. ແຕ່​ການ​ຜະ​ລິດ​ກາ​ຕູນ​ດິນ​ປັ້ນ​ແມ່ນບໍ່​ງ່າຍ ຕ້ອງມີ​ຄວາມ​ອົດ​ທົນ ແລະ ມີ​ຄວາມ​ສົນ​ໃຈ. ກ່​ອນ​ອື່ນ​ໝົດ ເຮົາ​ຕ້ອງ​ຂ​ຽນ​ເລື່ອງ​ກ່ອນ. ຂ້າ​ພະ​ເຈົ້າ​ຮ່ວມ​ມື​ກັບ​ສະ​ຖາ​ບັນ​ຄົ້ນ​ຄວ້າ​ວິ​ທະ​ຍາ​ສາດ​ການ​ສຶກ​ສາ ແລະ ກົມ​ສື່ມວນ​ຊົນ. ພວກ​ເຮົາ​ນຳ​ໃຊ້ຫຼັກ​ສູດ​ແຫ່ງ​ຊ​າດ ສຳ​ລັບ ຂັ້ນ ປໍ 1 ແລະ 2 ແລະ ​ໄດ້ເລືອກ​ເອົາ​ຫົວ​ຂໍ້​ທີ່​ສຳ​ຄັນ​ທີ່​ສຸດ​ສຳ​ລັບ​ນັກ​ຮຽນ​ໜຸ່ມ​ນ້ອຍ​ອອກ​ມາ. ຂັ້ນ​ຕອນ​ທີ່​ຢາກ​ທີ່​ສຸດ ແລະ ​ໃຊ້​ເວ​ລາທີ່​ສຸດ​ແມ່​ນ: ການ​ສ້າງ​ເລື່ອງ​ໃຫ້ນັກ​ຮຽນ​ໜຸ່ມ​ນ້ອຍ​​ສົນ​ໃຈ. ການ​ສ້າງ​ຄວາມມີ​ຊີ​ວິດ​ຊີວ​າ​ໃຫ້ຫຼັກ​ສູດ ຊຶ່ງ​ໃຊ້​ເວ​ລາ​ເກືອບ 2 ປີ ແລະ ການ​ປັບບົດ​ລະ​ຄອນຫຼາຍຄັ້ງ ​ໃຫ້​ທຸກ​ພ​າກ​ສ່ວນເຫັນ​ດີ.”

“ສ່ວນ​ທີ່​ໜ​້າ​ສົນ​ໃຈ​ທີ່​ສຸດ​ຂອງ​ໂຄງ​ການ ແມ່ນ​ການ​ສ້າງ​ຕົວ​ລະ​ຄອນ ແລະ ບັນ​ຍາກາດ. ທີມ​ຂອງ​ພວກ​ເຮົາ ໄດ້​ລົງ​ຢ້ຽມ​ຢາມ​ເດັກ​ນ້ອຍ ແລະ ຄຸ​ອາ​ຈານ, ຮັບ​ຟັງ​ຄ​ຳ​ຄິດ​ເຫັນ ແລະ ຄວາມ​​ຮູ້​ສຶກຂອງ​ພວກ​ເຂົາ. ພວກ​ເຮົາ​ໄດ້​ເອົາ​ຮ່າງໂຄງ​ພາບ​ເບື້ອງ​ຕົ້ນ, ແລະ ການ​ປັບ​ປຸງ​ກາ​ຕູນ​ສະ​ບັບ​ລ່າ​ສຸດ​ໃຫ້​ພວກ​ເຂົາ​ເບິ່ງ. ພວກ​ເຮົາ​ຢາກ​ປັບ​ໂຕ​ລະ​ຄອນ​ໃຫ້​ເຂົ້າ​ກັບ​ຜູ້​ຊົມ, ຕົວ​ລະ​ຄອນ​ທີ່​ຜູ້​ຊົມ​ເບິ່ງ​ແລ້ວ​ຮູ້​ສຶກ​ມັກທັນ​ທີ ແລະ ຢາກ​ຟັງ​ເລື່ອງທັນ​ທີ. ໃນ​ຂະ​ນະ​ທີ່ ຢູ່​ພາກ​ເໜືອ​ຂອງ​ປະ​ເທດ​ລາວ ມີ​ຊື່​ສຽງ​ໃນໂຕຊ້າງ ແລະ ຄວາຍ, ເດັກນ້ອຍຢູ່​ພາກ​ໃຕ້​ ພັດມັກ​ໃຫ້​ໂຕ​ໝາ ຫຼື ໂຕ​ແມວ​​ເປັນ​ໂຕ​ສະ​ແດງຫຼັກ. ນີ້​ຈຶ່ງ​ເປັນ​ທີ່​ມາ​ຂອງ​ອ້າຍ​ແດງ. ຂ້າ​ພະ​ເຈົ້າ​ສ້າງ​ຊຸດ​ໂຄງ​ພາບ​ເມື່ອ​ເວ​ລາ​ທີ່​ເດີນ​ທາງ​ໄປ​ພາກ​ໃຕ້. ດັ່ງ​ນັ້​ນ, ​ເຄື່ອງ​ແຕ່ງ​ກາຍ, ສາກຫຼັງ, ເຮືອນ, ພືດ​ຜັກ, ຕົ້​ນ​ໄມ້ ແລະ ອື່ນໆ ໃນ​ລາຍ​ການ​ແມ່​ນ​ມາ​ຈາກ​ພາກ​ໃຕ້​ຂອງ​ປະ​ເທດ​ລາວ.”

ຢູ່​ຫ້ອງ​ສະ​ແດງກາ​ຕູນດິນ​ປັ້ນ ​ມີ​ຄົນ​ເຮັດ​ວຽກ​ຮ່ວມ​ກັບ ທ່ານ ສຸ​ລິ​ຍາ ຈຳ​ນວນ 6 ຄົນ. ພວກ​ເຂົາ​ເຮັດ​ວຽກ​ຮ່ວມ​ກັນ​ ໃນ​ການສ້າງ​ສາກ 6 ສາກ, ຕົວ​ລະ​ຄອນ​ດິນ​ປັ້ນ ຫຼາຍກວ່າ ຮ້ອຍໂຕ, ແລະ ສ້າງເປົ້າ​ໝາຍ​ຂອງ​ການ​ຖ່າຍ​ທຳ​ລາຍ​ການ ຮຽນຮູ້ຮ່ວມກັນ. ທ່ານ ສຸ​ລິ​ຍາ ອະ​ທິ​ບາຍ​ວ່າ “​ພາກ​ການ​ຂື້ນ​ຮ່າງ​ ແມ່ນ​ອັດ​ສະ​ຈັນ, ພ​ວກ​ເຮົາຫຼໍ່​ດິນ​ປັ້ນ​ຕາມ​ແບບ​ທີ່​ກຳ​ນົດ, ໃສ່​ສີ, ແລະ ສ້າງ​ເລື່ອງ​ໃຫ້​ຕົວ​ລະ​ຄອນ​ດ້ວຍ​​ນີ້ວມື, ຂ້​າ​ພະ​ເຈົ້າ​ອອກ​ແບບ​ຕົວ​ລະ​ຄ​ອ​ນຫຼັກ​ດ້ວນ​ຕົນ​ເອງ. ຂ້າ​ພະ​ເຈົ້າ​ສ້າງສ່ວນ​ປະ​ສົມ​​ເອງຈາກ​ເຂົ້າ ​ດ້ວຍສູດ​ລັບ​ຂອງ​ຂ້າ​ພະ​ເຈົ້​າ, ຂ້າ​ພະ​ເຈົ້າ​ຢາກ​ໃຫ້​ດິນ​ປັ້ນ​ແຂງ​ແຮງ​ພໍ​ ໃນການ​ວາງ​ໃສ່ສາກ, ມີ​ຄວາມ​ທົນ​ນານ, ແຕ່​ມີ​ຄວາມ​ຢືດ​ຍຸນ​ໃນ​ການ​ສະ​ແດງ ແລະ ເຄື່ອນ​ໄຫວ. ”

ໃນ​ການ​ຖ່າຍ​ທຳ​ຕົວ​ຈິງ ຕ້ອ​ງ​ໄ​ດ້​ໃຊ້​ຄວາມ​ຕັ້ງ​ໃຈ, ຄວາມ​ແມ່ນ​ຍຳ​ໃນ​ການ​ສ້າງ​ກາ​ຕູນ​ໃຫ້​ເໝືອນ​ຈິງ. ທ່ານ ສຸ​ລິ​ຍາ ນຳ​ພາ ແລະ ຄວບ​ຄຸມ ການ​ຜະ​ລິດ​ແຕ່​ລະ​ຕອນ​ຢ່າງ​ລະ​ມັດ​ລະ​ວັງ. “ຕາມ​ບົດ​ລະ​ຄອນແລ້ວ, ພ​ວກ​ເຮົາ​ວາງ​ຕົວ​ລະ​ຄອນ ແລ້ວ​ຖ່າຍ​ຮູບ​ໂດຍ​ການນ​ຳ​ໃຊ້​ເຕັກ​ນິກ​ການຢຸດ​ການ​ເຄື່ອນ​ໄຫວ. ຫຼັງ​ຈາກນັ້ນ ພວກ​ເຮົາ​ລວມ​ຮູບ​ພາບ​ເຂົ້າ​ດ້ວຍ​ກັນ ​ເພື່ອ​ສ້າງວິ​ດີໂອ ທີ່​ມີ​ຮູບ 15 ຮູບ​ ຕໍ່ 1 ວິ​ນາ​ທີ. ບາງ​ສາກກໍ່​ຍາກຫຼາຍ ເພາະ​ວ່າ​ມີຫຼາຍ​ຕົວ​ລະ​ຄອນ. ພວກ​ເຮົາ​ຕ້ອງ​ໄດ້​ລະ​ວັງ​ ເພື່ອ​ຮັບ​ປະ​ກັນ​ວ່າ​ການ​ສະ​ແດງ​ແຕ່​ລະ​ບົດ​ບາດ​ແມ່ນ​ມີ​ຄວ​າມ​ຕໍ່​ເນື່ອງ​ກັນ. ເພາະ​ວ່າ ​ຈະມີ​ຄວາມ​ສ່ຽງ​ທີ່​ເຮົາ​ເອີ້​ນວ່າ ການ​ສະ​ແດງ​ໂດດ, ໝາຍ​ຄວາມ​ວ່າ​ຕົວ​ລະ​ຄ​ອນ​ໂດດ​ໄປ​ຕຳ​ແໜ່ງ​ທີ່​ແຕກ​ຕ່າງ​ກັ​ນ. ຖ້າ​ວ່າ​ຜິດ​ພາດ, ພວ​ກ​ເຮົາ​ຕ້ອງ​ໄດ້​ຖ່າຍ​ທຳ​ໃໝ່​ທັງ​ໝົດ.”

ສ່ວນ​ສຸດ​ທ້າຍ ແມ່ນ​ສ່ວນ​ທີ່​ງ່າຍ​ທີ່​ສຸດ ກໍ​ຄື​ການ​ອັດ​ສຽງ​ນັກ​ສະ​ແດງ ທີ່​ອອກ​ສຽງ​ໃຫ້​ແກ່​ຕົວ​ລະ​ຄອນຫຼັກ ແລະ ຖ່າຍ​ທຳ​ການ​ສະ​ແດງ​ຕົວ​ຈິງ. ແຕ່​ລະ​ຕອນ ມີ​ຄວາມ​ຍາວ​ປະ​ມານ 15 ນາ​ທີ ແລະ ມີ​ການ​ປະ​ສົມ​ປະ​ສານ​ລະ​ຫວ່າງ ‘ດິນ​ປັ້ນ’, ສາກການ​ສະ​ແດງ​ຕົ​ວ​ຈິງ, ແລະ​ ການເລົ່າ​ເລື່ອ​ງ​ດ້ວຍ​ກາ​ຕູນ.

ທ່ານ ສຸ​ລິ​ຍາ ກ່າວ​ວ່າ “ຂ້າ​ພ​ະ​ເຈົ້າ​ເປັນ​ນັກ​ສິນ​ລະ​ປິ​ນ ແລະ ຍັງ​ເປັນ​ຄູອີກ​ດ້ວຍ. ຂ້າ​ພະ​ເຈົ້າ​ຢາກ​ນຳ​ໃຊ້ສິນ​ລະ​ປະ​ຂອງ​ຂ້າ​ພະ​ເຈົ້າ ເຮັດ​ໃຫ້​ສຶກ​ສາມີ​ຄວາມ​ເຂັ້ມ​ແຂງ​ຂື້ນ, ຊ່ວຍ​ດັກ​ນ້ອຍ​ໃນ​ປະ​ເທດ​ລາວ ​ໃຫ້ມີ​ຄວາມ​ຮູ້ຫຼາຍ​ຂື້ນ. ຂ້າ​ພະ​ເຈົ້າ​ຢາກ​ຂໍ​ຂອບ​ໃຈ​ຄູ່​ຮ່ວມ​ງານ​ຈາກ​ທຸກ​ພາກ​ສ່ວນ ​ທັງຈາກ​ພາກ​ລັດ ແລະ ທີມ​ງານ​ແຜນ​ງານ​ບີ​ຄວາ ໃນ​ການ​ສະ​ໜັບ​ສະ​ໜູນ​ລາຍ​ການ ຮຽນ​ຮູ້​ຮ່ວມ​ກັນ ທີ່​ມີ​ມາ​ແຕ່​ຕົ້ນ ກໍ​ຄື​ຄວາມ​ເຊື່ອ​ໝັ້ນ​ທີ່​ເພິ່ນ​ໄດ້​ມອບ​ໃຫ້​ພວກ​ເຮົາ. ”