Menu

ຄູມີບົດບາດສຳຄັນໃນການສ້າງອະນາຄົດຂອງ ຄົນລຸ້ນຕໍ່ໄປ ແລະ ການພັດທະນາ ຂອງ ສປປ ລາວ. ແຜນງານບີຄວາ ມີຄວາມພາກ ພູມໃຈ ທີ່ໄດ້ໃຫ້ການສະໜັບສະໜູນຄູ ໃນ ສປປ ລາວ ໂດຍຜ່ານການຊ່ວຍເຫຼືອກະຊວງ ສຶກສາທິການ ແລະ ກິລາ ໃນການປັບປຸງ ການຝຶກອົບຮົມ ແລະ ພັດທະນາວິຊາຊີບຄູ, ແລະ ການປັບປຸງ ອຸປະກອນການຮຽນ-ການສອນ ໃຫ້ແກ່ຄູ.

Mr. Phuvieng DPS299

ຄູເປັນ​ອາ​ຊີບ​ທີ່​ສຳ​ຄັນ ແລະ ເປັນ​ອາ​ຊີ​ບ​ທີ່ມີ​ຄວາມ​ຕ້ອງ​ກາ​ນ​ສູງ. ຄູ​ໃຊ້​ເວລ​າຫຼາຍ​ຊົ່ວ​ໂມງ​ໃນ​ການ​ຮຽນ, ສ້າງ​ແຜນກິດ​ຈະ​ກຳ, ກະ​ກຽມ​ອຸ​ປະ​ກອນ​ການ​ສອນ, ແຕ່ງ​ບົດ​ສອນ ແລະ ຕ້ອງ​ມີ​ຄວາມ​ເຂົ້າໃຈ​ນັກ​ຮຽນ ແລະ ເງື່ອນ​ໄຂ​ຂອງ​ພວກ​ເຂົາ​ ເພື່ອ​ຕອບ​ສະ​ໜອງ​ຄວາມ​ຕ້ອງ​ການ​ສ​ະເພາະຂອ​ງ​ນັກ​ຮຽນ​ແຕ່​ລະ​ຄົນ. ຄູ​ເຮັດແນວນີ້ ກ່ເພື່ອ​​​ດຶ​ງ​ເອົາຄວາມສາມາດ​ທີ່​ດີ​ທີ່​ສຸດ​ໃນ​ໂຕຂອງ​ນັກ​ຮຽນ​ອອກ​ມາ. ຄູ​ຕ້ອງ​ການ​ໃຫ້​ນັກ​ຮຽນ​ປະ​ສົບ​ຄວາມ​ສຳ​ເລັດ.

ທ່ານ ນ. ພູວຽງ ແສງອ​ຸ​ລານ ເປັນຄູສອນ ຫ້ອງ ປໍ 1 ຢູ່​ໂຮງ​ຮຽນ​ປະ​ຖົມ​ດ່ານ​ຊ້າງ ເຊິ່​ງ​ເປັນ​ໜຶ່ງໃນ 25 ໂຮງ​ຮຽນ​ປະ​ຖົມ​ທີ່​ໄດ້​ເຂົ້າ​ຮ່ວມ​ທົດ​ລອງ​ນຳ​ໃຊ້ຫຼັກ​ສູດ ປໍ 1 ແລະ ປໍ 2 ສະ​ບັບ​ປັບ​ປຸງ. ລາວມີ​ຄວາມ​ຍິນ​ດີ​ກັບຄະແນນ ແລະ ​ຜົນ​ການ​ຮຽນ ​ທີ່​ດີ​ຂຶ້ນຂອງ​ນັກຮຽນ ພາຍຫຼັ​ງ​ທີ່​ໄດ້​ນຳ​ໃຊ້ຫຼັກ​ສູດ ແລະ ອຸ​ປະ​ກອນ​ການ​ສອນ​ສະ​ບັບ​ປັບ​ປຸງ ສຳ​ລັບ​ ປ 1. ຄູໄດ້ກ່າວວ່າ “ໃນ​ຖາ​ນະ​ຄູ, ການສອນຈະປະສົບຄວາມສຳເລັດສູງສຸດແມ່ນເວລາທີ່ໄດ້ເຫັນ ນັກ​ຮຽນ​ເຂົ້າ​ໃຈ​ບົດ​ຮຽນ ແລະ ພັດ​ທະ​ນາຄວາມ​ຮູ້​ຂອງ​ພ​ວກ​ເຂົາ​”.

ທີ່​ສຳ​ຄັນໄປກວ່ານັ້ນ, ​ຄູ​ເຮັດ​ໜ້າ​ທີ່ຂອງ​ພ​ວກ​ເຂົາ​ດ້ວຍ​ຄວາມ ຮັກໃນອາຊີບ.  ແລະຄວາມຮັກໃນອາຊີບ​ຂອງຄູນີ້້ ໄດ້ຊ່ວຍ ເພາະບົ່ມ ແລະ ສ້າງ​ແຮງ​ຈູງ​ໃຈ​ ໃຫ້​ແກ່​ເດັກ​ຢູ່​ໃນໂຮງ​ຮຽນ​ຂອງ​ພ​ວກ​ເຮົາ.

ທ່ານ ນາງ ສົມ​ຜະ​ລາ ເສີດ​ຜາດ, ອຳ​ນວຍ​ການ​ໂຮງ​ຮຽນ​ປະ​ຖົມ​ດ່ານ​ຊ້າງ, ​ຕ້ອງ​ການ​ສ້າງ​ຄວາມແຕກຕ່າງສຳລັບ​ເດັກ​ນ້ອຍ​ຢູ່​ບ້ານ​ຂອງ​ລາວ ໄດ້​ເວົ້້າ​ວ່າ “ຂ້າ​ພະ​ເຈົ້າ​ເກີດ ແລະ ເຕີບໃຫຍ່​ຢູ່ໝູ່​ບ້ານນີ້. ຂ້າ​ພະ​ເຈົ້າກາຍມາ​ເປັນ​ຄູສອນ ຍ້ອນ​ວ່າຂ້າພະເຈົ້າຢາກ​ໃຫ້​ເດັກ​ນ້ອຍ​ໃນ​ຊຸມ​ຊົນ​ຂອງ​ຂ້າ​ພະ​ເຈົ້າ ​ສາ​ມາດອ່ານອອກ ຂຽນໄດ້; ຂ້າພະເຈົ້້າຢາກໃຫ້​​ພວກ​ເຂົາໄດ້ຮຽນຮູ້ ກ່ຽວກັບ ຄຸນສົມບັດ, ມີຄວາມໝັ້ນໃຈໃນການສະແດງອອກ ເຖິງຄວາມ ສາມາດຂອງພວກເຂົາ ແລະ ສາມາດຊ່ວຍເຫຼືອຕົນເອງໄດ້. ຂ້າພະເຈົ້າຕ້ອງການໃຫ້ພວກເຂົາມີອາຊີບ​ທີ່​ດີ​ໃນ​ອະ​ນາ​ຄົດ”.

ນາງ ເອັງ, ກໍາລັງຮຽນ​ ຢູ່ວິ​ທະ​ຍາ​ໄລ​ຄູ​ແຂວງ​ສາ​ລະ​ວັນ, ຂໍຂອບໃຈມາຍັງແຜນງານບີຄວາທີ່ໃຫ້ທຶນ​ການ​ສຶກ​ສາ​ນັກ​ຮຽນຄູ​ຊົນ​ເຜົ່າ, ລາວມີ​ຄວາມ​ໄຝ່​ຝັນແບບ​ດຽວ​ກັນ ແລະ ມີ​ຄວາມ​ເຊື່ອ​ໝັ້ນວ່າ ການ​ສຶກ​ສາ​ເປັນ​ກຸນ​ແຈ​ສູ່​ຄວາມ​ສຳ​ເລັດ. ລາວໄດ້ ເວົ້້າວ່າ “ຕອນ​ທີ່​ນ້ອງ​​ຍັງນ້ອຍ, ມີ​ພຽງເດັກ​ນ້ອຍ​ຈຳ​ນວນ​ໜຶ່ງ​ເທົ່າ​ນັ້ນ​ທີ່​ໄດ້​ເຂົ້າ​ໂຮງ​ຮຽນ. ພວກ​ນ້ອງ​ມີແຕ່​ຄູພຽງ​ຜູ້​ດຽວ ​ທີ່ສອນ ທັງໝົດ 5 ຂັ້ນຮຽນ. ນ້ອງຈຶ່ງ​ຕັດສິນໃຈ​ເຂົ້າ​ຮຽນ​ເພື່ອ​ເປັນ​ຄູ ຍ້ອນ​ວ່າ​​ນ້ອງ​ຕ້ອງ​ການ​ຊ່ວຍ​ເຫຼືອ​ເດັກ​ນ້​ອຍ​ຢູ່​ບ້ານ​ຂອງ​ນ້ອງ. ນ້ອງ​ຢາກ​ກັບ​ໄປ​ບ້ານ​ຂອງ​ນ້ອງ ແລະ ສອນ​ເດັກ​ນ້ອຍ. ຖ້າ​ເດັກນ້ອຍມີ​ການ​ສຶກ​ສາ ແລະ ມີ​ຄວາມ​ຮູ້, ພວກ​ເຂົາ​ຈະ​ມີ​ວຽກ​ເຮັດ ແລະ ບໍ່​ຈຳ​ເປັນ​ຕ້ອງ​ແຕ່ງ​ງານ​ຕອນ​ອາ​ຍຸຍັງ​ນ້ອຍ. ພວກ​ເຂົາ​ຈະ​ສາ​ມາດ​ພັດ​ທະ​ນາ​ຕົນ​ເອງ​ໄດ້. ເມື່ອ​ໄດ້​ຮັບ​ການ​ສຶກ​ສາ, ຜູ້​ຍິງ​ກໍ່​ສາ​ມາດ​ມີ​ບົດ​ບາດ ແລະ ມີ​ສິດ​ສະ​ເໝີ​ພາບ​ໃນ​ສັງ​ຄົມ​ຄື​ກັນ​ກັບ​ຜູ້​ຊາຍ”.

ນາງ ແຈງ ໝູ່​ຂອງ​ລາວ, ເຊິ່ງກໍ່​ເປັນນັກ​ຮຽນຄູ​ຊົນ​ເຜົ່າທີ່​​ໄດ້​ຮັບ​ທຶນ​ການ​ສືກ​ສາຈາກ​ແຜນ​ງານ​ບີ​ຄວາ​ເຊັ່ນ​ດຽວ​ກັນ, ໄດ້ກ່າວ​ເພີ່ມ​ເຕີມ​ວ່າ “ສິ່ງ​ທ້າ​ທາຍ​ຕ​ອນ​ທີ່​ນ້ອງ​ຮ​ຽນ​ຢູ່​ໂຮງ​ຮຽນ​ປະ​ຖົມ​ແມ່ນນ້ອງ​ຕ້ອງ​ໄດ້​ເດີນ​ທາງ​ໄກ​ຈາກ​ບ້ານ​ໄປ​ໂຮງ​ຮຽນ; ແລະ ບາງ​ເທື່ອ ນ້ອງ​ກໍ່ຂາດຮຽນ ເພາະ​ວ່າ​ຄອບ​ຄົວ​ຂອງ​ນ້ອງ​ທຸກ​ຍາກຫຼາຍ. ຍ້ອນ​ແນວນັ້ນ, ນ້ອງ​ຈຶ່ງ​ຢາກ​ເປັນ​ຄູ ເພື່ອ​ພັດ​ທະ​ນາ​ຕົນ​ເອງ ແລະ ປັບ​ປຸງ​ຊີ​ວິດ​ການ​ເປັນ​ຢູ່​ຂອງ​ຄອບ​ຄົວ​ໃຫ້ຫຼຸດ​ພົ້ນ​ອອກ​ຈາກ​ຄວາມ​ທຸກ​ຍາກ​ເທື່ອ​ລະ​ກ້າວ.

ເພື່ອ​ໃຫ້​ແນ່​ໃຈ​ວ່ານັກ​ຮຽນຄູ​ ເຊິ່ງຈະເປັນ​ຜູ້​ໃຫຍ່ໃນອະ​ນາ​ຄົດ ຈະ​ສາ​ມາດ​ພັດ​ທະ​ນາ​ຕົນ​ເອງ ໃຫ້​ເປັນ​ຄູ ແລະ ຜູ້​ສິດ​ສອນທີ່​ດີ​, ທ່ານ ນ. ຈັນ​ທະ​ມາ​ລາ, ອຳ​ນວຍ​ການ​ວິ​ທະ​ຍາ​ໄລ​ຄູ​ບ້ານ​ເກິນ ໄດ້ອະທິ​ບາຍ​ວ່າ “ຂະ​ແໜງ​ສຶກ​ສາ​ທິ​ການ ເປັນ​ຂະ​ແໜງ​ການ​ທີ່​ສຳ​ຄັນຫຼາຍ ແລະ ປັດ​ໃຈເປັນພື້ນ​ຖານ​ຂອງ​ການ​ພັດ​ທະ​ນາ​ຊັບ​ພະ​ຍາ​ກອນ​ມະ​ນຸດ. ການ​ສຶກ​ສາ​ເປັນ​ກຸນ​ແຈ​ສູ່ຄວາມ​ຮູ້. ທຸກ​ຄົນ​ໃນ​ສັງ​ຄົມ​ຕ້ອງ​ໄດ້​ຮັບ​ການ​ສຶກ​ສາ. ຖ້າບໍ່​ມີ​ການ​ສຶກ​ສາ, ກໍ​ບໍ່​ມີ​ການ​ພັດ​ທະ​ນາ.

ຄູ​ມີ​ຄວາມ​ຮັບ​ຜິດ​ຊອບສຳ​ຄັນ ເນື່ອງ​ຈາກ​ອາ​ຊີບ​ຂອງ​ພວກ​ເຂົາ​ມີ​ຜົນ​ກະ​ທົບ​ຕໍ່​ການ​ຂະ​ຫ​ຍາຍໂຕ, ການ​ພັດ​ທະ​ນາ ແລະ ຄວາມ​ເປັນ​ຢູ່​ທີ່​ດີ ຂອງ​ນັກ​ຮຽນ ກໍ​ຄື​ຂອງ​ຊາດ. ດັ່ງ​ນັ້ນ, ເນື່ອງ​ໃນ​ໂອ​ກາດ​ວັນ​ຄູແຫ່ງ​ຊາດ, ພະ​ນັກ​ງານ​ແຜ​ນງານບີ​ຄວາທຸກ​ຄົນ ຈຶ່ງ​ຕ້ອງ​ການ​ເນັ້ນ​ໃຫ້​ເຫັນ​ວ່າ ຄູ​ມີ​ຄວາມ​ສຳ​ຄັນຫຼາຍ​ຕໍ່​ພວກ​ເຮົາ!

ຊົ​ມ​ເຊີຍ​ວັນ​ຄູ​ແຫ່​ງຊາດໃນ ສ​ປ​ປ ລາວ!