Menu

ນັກພັດທະນາຫຼັກສູດຊັ້ນປະຖົມທີ່ສະຖາບັນຄົ້ນ ຄວ້າວິທະຍາສາດການສຶກສາ ກຳລັງ ຮັບຮອງປຶ້ມແບບຮຽນ ແລະ ຄູ່ມືຄູ່ສະບັບໃໝ່ ເພື່ອປັບປຸງການຮຽນຮູ້ໜັງສືສຳລັບນັກຮຽນ ຊັ້ນປະຖົມທຸກຄົນໃນ ສປປ ລາວ.

WLD2018-01

WLD2018-02

WLD2018-05

WLD2018-03

WLD2018-04

ທ່ານ​ຮູ້ບໍ່​ວ່າ​ເດັກ​ທີ່​ເກີດ​ຈາກ​ທ້ອງ​ແມ່ທີ່​ຮູ້​ໜັງ​ສື ​ຈຳ​ນວນ 50% ມີ​ແນວ​ໂນ້ມ​ທີ່​ຈະມີ​ຊີ​ວິດຢູ່​ລອດເກີນ​ອາ​ຍຸ 5 ປີ. ການຮູ້​ໜັງ​ສື ເປັນ​ໜຶ່ງ​ໃນ​ທັກ​ສະ​ທີ່​ສຳ​ຄັນ​ທີ່​ສຸດ ເມື່ອ​ເວົ້າ​ເຖິງການ​ຮຽ​ນຮູ້​ຂອງບຸກ​ຄົນ, ວັດ​ທະ​ນະ​ທຳ ແລະ ການ​ພັດ​ທະ​ນາ. ສິ່ງ​ດັ່ງ​ກ່າວ​ເປັນ​ພື້ນ​ຖານ​ສຳ​ລັບ​ການ​ຮຽນ​ຮູ້​ທຸກ​ຢ່າງ​ຢູ່​ໂຮງ​ຮຽນ ແລະ ໃນ​ການດໍາລົງຊີ​ວິດ. ຢູ່​ໃນ​ວົງ​ກວ້າງ, ອັດ​ຕ​າການ​ຮູ້​ໜັງ​ສື​ທີ່​ສູງຈ​ະ​ຊ່ວຍ​ສົ່ງ​ເສີມ​ການ​ຂະ​ຫ​ຍາຍຕົວ​ທາງ​ດ້ານ​ເສດ​ຖະ​ກິດ ແລະ ການ​ພັດ​ທະ​ນາ​ປະ​ເທດ​ຊາດ.

ເລີ່ມ​ແຕ່​ປີ 2015 ເປັ​ນ​ຕົ້ນ​ມາ, ທີມ​ນັກ​ພັດ​ທະ​ນາ​ຫຼັກ​ສູດ ແລະ ຊ່ຽວ​ຊານ​ແຜນ​ງານ​ບີ​ຄວາ ​ຢູ່ສະ​ຖາ​ບັນ​ຄົ້ນ​ຄວ້າ​ວິ​ທະ​ຍາ​ສາດ​ການ​ສຶກ​ສາໄດ້​ພັດ​ທະ​ນາຫຼັກ​ສູ​ດ ແລະ ສື່​ການ​ຮຽນ​ການ​ສອນ​ໃໝ່ ສຳ​ລັບ​ທຸກວິ​ຊ​າ​ໃນ​ຊັ້ນ​ປະ​ຖົມ, ໃນນັ້ນມີ ​ປຶ້ມ​ແບບ​ຮຽນ ແລະ ຄູ່​ມື​ຄູ​ວິ​ຊາ​ພາ​ສາ​ລາວ. ຫຼັກສູດ ແລະ ສື່​ການ​ຮຽນ​ການ​ສອນ ຊັ້ນປະຖົມສຶກສາປີທີ 1 ​ຈະ​​ພ້ອມສຳ​ລັບ​ການ​ຮຽນ​ການ​ສອນຂອງ​​ສົກ​ຮຽນ​ໃໝ່ ​ໃນ​ເດືອນ​ກັນ​ຍາປີ 2019 ນີ້.

ຂັ້ນ​ຕອນ​ທຳ​ອິດ​ໃນ​ການ​ຮຽນ​ອ່ານ ແລະ ຮຽນ​ຂຽນ ແມ່ນ​ການ​ພັດ​ທະ​ນາ​ທັກ​ສະ​ການ​ເວົ້າ​ໃຫ້​ຄ່ອງ​ແຄ້ວ, ຮຽນ​ຈື່​ຈຳ​ຕົວ​ໜັງ​ສື ແລະ ຮູ້​ວ່າຕົວ​ໜັງ​ສືນັ້ນ​ອອກ​ສຽງ​ແນວ​ໃດ. ຈ​າກຂໍ້​ມູນວິ​ທີ​ທີ່ເດັກ​ພັດ​ທະ​ນາ​ທັກ​ສະການ​ຮູ້​ໜັງ​ສື ແລະ ຄຳ​ເຫັນ​ຈາກ​ຄູ ແລະ ນັກ​ຮຽນ ທີ່​ໄດ້​ເຂົ້າ​ຮ່ວມ​ການ​ທົດ​ລອງ​ສື່​ການ​ຮຽນ​ການ​ສອນ ​ຢູ່​ໂຮງ​ຮຽນ​ປະ​ຖົມ​ຈຳ​ນວນ​ໜຶ່ງ​ທົ່ວ​ປະ​ເທດ, ນັກ​ພັດ​ທະ​ນາຫຼັກ​ສູດ​ໄດ້ອອກແບບ ແລະ ປັບປຸງຫົວຂໍ້ເນື້ອໃນຂອງຫຼັກ​ສູດ ແລະ ສື່​ການ​ຮຽນ​ການ​ສອນ​ວິ​ຊາ​ພາ​ສາ​ລາວໃຫ້ແທດເໝາະກັບຜູ້ຮຽນ ແລະ ເນັ້ນຄຸນນະພາບ.

ການ​ພັດ​ທະ​ນາ​ທັກ​ສະ​ການ​ເວົ້າ​ໃຫ້​ຄ່ອງ​ແຄ້ວ ແລະ ຄວາມ​ສາ​ມາດ​ໃນ​ການ​ນຳ​ໃຊ້​ຕົວ​ອັກ​ສອນ​ ໄດ້​ຖືກ​ຂະ​ຫຍາຍ​ໃສ່​ໃນ​ບົດ​ຮຽນຫຼາຍ​ຂື້ນ. ນັກ​ຮຽນ​ຈະ​ໄດ້​ຮຽນ​ຮູ້​ໂດຍ​ການ​ເຮັດ​ກິດ​ຈະ​ກຳ​ ແລະ ຈະ​ໃຊ້​ເວ​ລາ​ໃນ​ການ​ນຳ​ໃຊ້​ຄວາມຮູ້ຫຼາຍ​ຂື້ນ, ຮຽນດ້ວຍ​ຄວາມ​ມ່ວນ​ຊື່ນ ແລະ ມີກິດ​ຈະ​ກຳການ​ສອນ​ທີ່ຫຼາກຫຼາຍ ເພື່ອ​ຝຶກ​ທັກ​ສ​ະ​ທີ່​ຈຳ​ເປັນ​ສຳ​ລັບ​ການ​ອ່ານ ແລະ ການ​ຂຽນໄດ້​ຖືກ​ເພີ່ມ​ເຂົ້າໃນ​ແຕ່​ລະ​ບົດ​ຮຽນ. ຄູ່​ມື​ຄູ​ແບບ​ໃໝ່ຈະ​ມີ​ລາຍ​ລະ​ອຽດຫຼາຍ​ຂື້ນ ແລະ ມີ​ຄຳ​ແນະ​ນຳກ່ຽວ​ກັບວິ​ທີ​ການ​ຈັດ​ການ​ສອນ ແລະ ຄຳ​ແນະ​ນຳ​​ໃນ​ການ​ນຳ​ໃຊ້​ຄວາມ​ຮູ້​ທ້ອງ​ຖິ່ນ, ການ​ສ້າງ​ກິດ​ຈະ​ກຳ​ເສີມ, ການ​ສອນສໍາລັບ​ນັກ​ຮຽນຊົນເຜົ່າ ແລະ ​ການສອນ ຫ້ອງຄວບ. ບົດ​ຮຽນ​ທີ່​ມີ​ຄຳ​ແນະ​ນຳ​ລະ​ອຽດ​ຈະ​ຊ່ວຍ​ໃຫ້​ຄູ​ສອນ​ຢ່າງ​ມີ​ປະ​ສິດ​ທິ​ພາບ.

ເພື່ອ​ເປັນ​ການ​ເພີ່ມ​ຄວາມ​ສົນ​ໃຈ​ຂອງນັກ​ຮຽນ, ປຶ້ມ​ແບບ​ຮຽນຈະເໝາະ​ສົມ​ກັບ​ເດັກ​ນ້ອຍຫຼາຍ​ຂື້ນ ເຊິ່ງ​ຈະ​ປະ​ກອບ​ດ້ວຍສີ​ສັນ ແລະ ເຄື່ອງ​ປະ​ຈັກ​ຕາ​ທີ່ຫຼາ​ກຫຼາຍ. ​ຫົວ​ຂໍ້​ຂອງບົດ​ຮຽນໄດ້​ຖືກ​ເລື​ອກ​ຢ່າງ​ດີ ເພື່ອ​ໃຫ້​ມີ​ຄວາມ​ໜ້າ​ສົນ​ໃຈ ແລະ ກ່ຽວ​ຂ້ອງ​ກັບ​ນັກ​ຮຽນຄື: ຊີ​ວິດ​ປະ​ຈຳ​ວັນ, ຄອບ​ຄົວ​, ມິດ​ຕະ​ພາບ ແລະ ເກມ​ຕ່າງໆ. ນອກ​ຈາກນີ້, ແຕ່​ລະ​ຫ້ອງ​ຍັງ​ຈະ​ໄດ້​ຮັບ​ຊຸດອຸປະກອນ​ການ​ຮຽນ​ການ​ສອນ ເຊິ່ງ​ຈະ​ປະ​ກອບ​ດ້ວຍ: ປຶ້ມ​ນິ​ທານ, ປຶ້ມ​ອ່ານ​ເສີມສໍາລັບປ.​1 ແລະ ປ.​2 ຫຼື ບັດ​ຄຳ​ສັບຕ່າງໆເປັນຕົ້ນ. ສື່​ການ​ຮຽນ​ການ​ສອນ​ທັງໝົດ​ນີ້​ໄດ້​ຮັບ​ການ​ອອກ​ແບບ​ເພື່ອ​ໃຫ້​ນັກ​ຮຽນ​ມີ​ສ່ວນ​ຮ່ວມ​ໃນ​ກິດ​ຈະ​ກຳ​ການ​ຮຽນ ແລະ ການ​ສອນ​ແບບໃໝ່.

ໂດຍ​ຜ່ານ​ແຜນ​ງານ​ບີ​ຄວາ, ລັດ​ຖະ​ບານອົດ​ສະ​ຕ​ຣາ​ລີ ແລະ ສະ​ຫະ​ພາບ​ເອີ​ຣົບ ມີ​ຄວາມ​ພາກ​ພູມ​ໃຈ ໃນ​ການ​ສະ​ໜັບ​ສະ​ໜູນ ກະ​ຊວງ​ສຶກ​ສາ​ທິ​ການ ແລະ ກິ​ລາ​ຂອງ ສ​ປ​ປ ລາວ ໃນ​ການ​ປັບ​ປຸງ​ການ​ຮູ້​ໜັງ​ສື​ໃນ​ປະ​ເທດ​ລາວ ແລະ ໃຫ້​ອະ​ນາ​ຄົດ​ທີ່​ສົດ​ໃສ​ແກ່​ເດັກ​ຍິງ ແລະ ເດັກ​ຊາຍ​​ລາວ.