Menu

ເພື່ອເປັນສະເຫຼີມສະຫຼອງວັນປື້ມສາກົນ, ບີຄວາຈຶ່ງຢາກຍົກເລື່ອງຂອງຜູ້ປົກຄອງ ເດັກສອງທ່ານ ທີ່ມີຄວາມເສຍສະລະຢ່າງສູງ ຈາກໜູ່ບ້ານມົ້ງທີ່ຢູ່ເຂດຊົນນະບົດ ຫ່າງໄກສອກຫຼີກມາເລົ່າ. ພວກເຮົາມາອ່ານເລື່ອງຂອງ ທ່ານ ນ. ນູ ແລະ ທ່ານ ໂຮວາ ແລະ ເບິ່ງວ່າພວກເຂົາສ້າງມຸມການອ່ານ ສຳລັບເດັກນ້ອຍ ຢູ່ເຮືອນຂອງພວກເຂົາຄືແນວໃດ.

IMG-20170927-WA0081 99

20170622_120045 new light

Reading to children 1234

ວັນ​ປື້ມ​ສາ​ກົ​ນ ວັ​ນ​ທີ 23 ເມ​ສາ ແມ່ນ​ງານ​ປະ​ຈຳ​ປີ ທີ່​ສ້າງ​ຕັ້ງ​ໂດຍ​ອົງ​ການ​ສ​ະ​ຫະ​ປະ​ຊາ​ຊາດ​ເພື່ອ​ການ​ສຶກ​ສາ, ວິ​ທະ​ຍາ​ສາດ ແລະ ວັດ​ທະ​ນະ​ທຳ (ອົງ​ການ​ຍູ​ເນ​ສ​ໂກ້) ເພື່ອ​ສະ​ເຫຼີມ​ສະຫຼອງ​ການ​ອ່ານ, ການ​ຕີ​ພິມ, ແລະ ລິ​ຂະ​ສິດ. ໃນ​ແຕ່​ລ​ະ​ປີ, ອົ​ງ​ການຈັດ​ຕັ້ງ​ຕ່າງໆ, ມະ​ຫາ​ວິ​ທະ​​ຍາ​ໄລ, ສະ​ຖາ​ບັນ, ໂຮງ​ຮຽນ, ຊຸມ​ຊົນ, ຜູ້​ຈັດ​ພິມ ແລະ ນັກ​ຂຽນ​ທົ່ວ​ໂລກ​ພາ​ກັນ​ສະ​ເຫຼີມ​ສະຫຼອງວັນ​ດັ່ງ​ກ່າວ​ດ້ວຍ​ການ​ອ່ານ ແລະ ການແຈກ​ຢາຍ​ປື້ມ.

ເພື່ອ​ເປັນ​ການ​ສະ​ເຫຼີມ​ສະຫຼອງວັນ​​ດັ່ງ​ກ່າວ, ແຜນ​ງານ​ບີ​ຄວາ​ຈຶ່ງ​ຢາກ​ຍົກ​ເລື່ອງ​ທີ່ສ້າງ​ແຮງ​ບັນ​ດານ​ໃຈ​ຂອງ ທ່ານ ນ. ນູ ແລະ ທ່ານ. ໂຮ​ວາ ມາ​ເລົ່າ.

ທ່ານ ນ. ນຸ ແລະ ທ່ານ. ໂຮ​ວາ ອາ​ໄສ​ຢູ່​ໝູ່ບ້ານ​ຊົນ​ເຜົ່າ​ມົ້ງ​ທີ່​ຢູ່​ເຂດ​ຊົນ​ນະ​ບົດຫ່າງ​ໄກ​ສອກຫຼີກ​ແຫ່ງ​ໜຶ່ງ​ ທີ່​ມີ​ຊື່​ວ່າ ບ້ານ​ວຽງ​ຫິນ, ເມືອງ​ນ້ຳ​ບາກ, ແຂວງຫຼວງ​ພະ​ບາງ. ພ​ວກ​ເຂົາເປັນ​ພໍ່​ແມ່ ​ທີ່​ມີ​ຄວາມ​ພາກ​ພູມ​ໃຈ ທີ່​ມີ​ລູກ 4 ຄົນທີ່​ຮຽນ​ໜັງ​ສື​ຢ່າງ​ໜັກ​ຢູ່​ທີ່​ໂຮງ​ຮຽນ. ລູກ​ຊາຍ​ກົກ​ຂອງ​ພວກ​ເຂົາ​ປະ​ຈຸ​ບັນ​ຮຽນ​ຢູ່ ຊັ້ນ ມໍ. 5 , ລ​ູກ​ສາວຜູ້​ທີ​ສອງ​ຮຽນ​ຢູ່ຊັ້ນ​ມໍ 2 , ລູກ​ຊາຍ​ຜູ້​ທີ​ສາມ​ຢູ່​ຊັ້ນ​ປ​ໍ 5, ແລະ ລູກ​ຊາຍຫຼ້າຢູ່​ຊັ້ນ​ປໍ 2.

ຄື​ກັນ​ກັບ​ຊາວ​ບ້ານ​ຜູ້​ອື່ນໆ, ທ່ານ ນ. ນູ ແລະ ທ່າ​ນ. ໂຮ​ວາ ເປັນ​ຊາວ​ກະ​ສິ​ກຳທີ່​ປູ​ກເຂົ້າ ແລະ ພືດ. ພວກ​ເຂົາ​ເຮັດ​ວຽກຫຼາຍ​ຊົ່ວ​ໂມງແຕ່​ເຊົ້າ​ຈົນ​ຄ່ຳ ເພື່ອ​ຫາ​ລາຍ​ຮັບ​ໃຫ້​ພຽງ​ພໍ​ໃນ​ການ​ສະ​ໜັບ​ສະ​ໜູນ​ລູກ​​ທັງ​ 4 ຄົນໃຫ້​ໄດ້​ເຂົ້າ​ຮຽນ. ພວ​ກ​ເຂົາ​ນ້ອຍ​ໃຈ ທີ່​ພວກ​ເຂົາ​ບໍ່​ຮູ້​ວິ​ທີ​ສົ່ງ​ເສີມ​ລູກ​ໃຫ້​ຮຽນ​ຢ່າງ​ຖືກວິ​ທີ ເພາະ​ພວກ​ເຂົາ​ຮູ້​ສຶກວ່າ​ຕົນ​ເອງບໍ່​ໄດ້​ຮັບ​ການ​ສຶກ​ສາ​ພຽງ​​ພໍ ເພື່​ອ​ຊ່ວຍ​ແນະ​ນຳ​ລູກ​ເຮັດ​ວຽກ​ບ້ານ. ທ່ານ ນ. ນູ ແລະ ທ່າ​ນ. ໂຮ​ວາ ຮຽນ​ຈົບ​ຊັ້ນ​ປະ​ຖົມ​ເທົ່າ​ນັ້ນ ແລະ ບໍ່​ໄດ້​ຮັບ​ການ​ຊ່ວຍ​ເຫຼືອຫຼາຍ​ ໃນຕອນ​ທີ່​ພວກ​ເຂົາ​ຍັງ​ເປັນ​ນັກ​ຮຽນ. ເມື່ອຄະ​ນະ​ພັດ​ທະ​ນາ​ການ​ສຶກ​ສາ​ຂັ້ນ​ບ້ານ (ຄ​ພ​ສບ) ແຈ້ງວ່າ​ຈະເລືອກ​ເອົາ 20 ຄອບ​ຄົວ ມາ​ເປັນ​ຄອບ​ຄົວ​ຕົວ​ແບບ ໃນ​ການ​ເຂົ້າ​ຮ່ວ​ມ​ກາ​ນ​ຝຶກ​ອົບ​ຮົມຂັ້ນ​ຊຸມ​ຊົນ ກ່ຽວ​ກັບ ​​ການ​ສ້າງຄວ​າມ​ພ້ອມທາງ​ດ້ານ​ການ​ສົ່ງ​ເສີມ​ການ​ອ່ານ ເຊິ່ງ​ຈັດ​ໂດຍ ກຸ່ມ​ອົງ​ການຈັດ​ຕັ້ງ​ສາ​ກົນ​ທີ່ບໍ່​ສັງ​ກັດ​ລັດ​ຖະ​ບານ ຂອງ​ແຜນ​ງານ​ບີ​ຄວາ, ພວກ​ເຂົາ​​ກໍ່​ມີ​ຄວາມຮູ້​ສຶກກະ​ຕື​ລື​ລົ້ນຫຼາຍ.

“ຂ້ອຍ​ສົ່ງ​ເສີມ​ເມຍ​ຂ້ອຍ​ໃຫ້​ເຂົ້າ​ຮ່ວມ ແລ​ະ ຕັ້ງ​ໃຈ​ມີ​ສ່ວນ​ຮ່ວ​ມ​ກັບ​ທຸກ​ກິດ​ຈະ​ກຳ​ທີ່​ອາ​ຈານ, ຄະ​ນະ​ພັດ​ທະ​ນາ​ການ​ສຶກ​ສາ​ຂັ້ນ​ບ້ານ (ຄ​ພ​ສບ), ແລະ ຫ້ອງ​ການ​ພັດ​ທະ​ນາ​ການ​ສຶກ​ສາ​ແລະ ກິ​ລາຂັ້ນ​​ເມືອງ​ (ສກມ) ສະ​ເໜ​ີໃຫ້​ເຂົ້າ​ຮ່ວມ.” ທ່ານ ໂຮ​ວາ​ກ່າວ.

ທ່ານ ນ. ນູ ອະ​ທິ​ບາຍ​ວ່າ “ທຳ​ອິດ, ຂ້ອຍ​ກໍ​ບໍ່​ໄດ້​ປະ​ກອບ​ສ່ວນຫຼາຍ​ໃນ​ການ​ຝຶກ​ອົບ​ຮົມ ເພາະ​ວາ​ຂ້ອຍ​ອາຍ ແລະ ບໍ່​ລຶ້ງ​ກັບຂັ້ນ​ຕອນນີ້. ດັ່ງ​ນັ້ນ, ສ່ວນ​ໃຫຍ່​ແລ້ວ​ ຂ້ອຍ​ຟັງ​ຜູ​້​ຝຶກ​ອົບ​ຮົມ​ອະ​ທິ​ບາຍ ແລະ ປະ​ຕິ​ບັດ​ຕາມ​ການ​ແນະ​ນຳ​ຂອງ​ລາວ.” ຕົວ​ຢ່າງ, ລາວ​ໄດ້​ສົ່ງ​ເສີມ​ໃຫ້​ຂ້ອຍ​ຢືມ​ປື້ມ ແລ້ວອ່ານ​ກັບ​ລູກ. ຂ້ອຍ​ເອົາປື້​ມກັບ​ບ້ານ ແຕ່​ຂ້ອຍ​​ອ່ານບໍ່​ໄດ້, ຈຶ່ງ​ໃຫ້​ລູກ​ຊາຍ​ອ່ານ​ໃຫ້​ຟັງ. ຜົວ​ຂ້ອຍ ແລະ ຂ້ອຍ​ກໍ​ນັ່ງ​ຟັງ​ນຳ​ກັນ. ສິ່ງ​ດັ່ງ​ກ່າວ​ຖື​ວ່າ​ເປັນ​ເວ​ລາ​ຄອບ​ຄົ​ວ​ທີ່​ດີຫຼາຍ.”

​ໃນ​ໄລ​ຍະ​ຝຶກ​ອົບ​ຮົມ, ພວກເຂົາ​ໄດ້ຮ​ຽນຮູ້​ວິ​ທີ​ການ​ເລືອກ​ປື້ມ​ເລື່ອງ ທີ່​ເໝາະ​ສົມ​ກັ​ບ​ລະ​ດັບ​ການ​ອ່ານ ແລະ ຄວາມ​ສົນ​ໃຈ​ຂອງເດັກ​ແຕ່​ລະ​ຄົນ. ທ່ານ ນ. ນູ ເວົ້​າວ່າ “ແຜນ​ງານ​ບີ​ຄວາ ມອບ​ຄັງປື້ມໃຫ້​​ບ້ານ​ເຮົາ​ຈຳ​ນວນ 120 ຫົວ. ບາງ​ທ​ີ​​ການ​ຊອກ​ປື້ມທີ່​ລູກ​ຂ້ອຍ​ມັກ​ກໍ​ເປັນ​ເລື່ອງ​ຍາກ. ສະ​ນັ້ນ, ຂ້ອຍ​ຈຶ່ງ​ສັງ​ເກດ​ເບິ່ງ​ລູກ​ຊາຍ​ຂອງ​ຂ້ອຍ ຈຶ່ງຮູ້​ວ່າລາວ​ມັກ​ອ່ານ​ປື້ມ​ທີ່​ມີ​ຫຼາຍ​ສີ​ສັນ ແລະ ເປັນ​ໂຕ​ສັດ, ລວມ​ທັງ​ປື້ມ​ທີ່​ມີ​ຕົວ​ເລກ ກັບ ໂຕ​ໜັງ​ສ​ື​ໃຫ​ຍ່”.

ການ​ຝຶກ​ອົບ​ຮົມ​ໃຊ້​ເວ​ລາ​ສອງ​ສາມ​ອາ​ທິດ ເຊິ່ງ​ປະ​ກອບ​ມີ​ບົດ​ຝຶກ​ອົບ​ຮົມ 7 ບົດ​ທີ່​ແຕກ​ຕ່າງ​ກັນ. ເມື່ອ ທ່ານ ນ. ນູ ຈຳ​ເປັນ​ຕ້ອງ​ໄດ້​ເຮັດ​ວຽກ​ຢູ່​ສວນ, ທ່ານ. ໂຮ​ວາ​ ກໍ​ເຂົ້າ​ຮ່ວມ​ການຝຶກ​ອົບ​ຮົມແທນ. ເມື່ອ​ກັບ​ມາ​ບ້ານ, ພວກ​ເຂົາ​ກໍ​ໄດ້​ແລກ​ປ່ຽນ​ສິ່ງ​ທີ່​ພວກ​ເຂົາ​ຮຽນ​ຮູ້​ນຳ​ກັນ. ທ່າ​ນ ໂຮ​ວາ ກ່າວ​ວ່າ​ “ຂ້ອຍ​ພູມ​ໃຈ​ທີ່​ໄດ້​ເປັນພໍ່​ຄົນ​ໜຶ່ງ​ ໃນບັນ​ດາ​ພໍ່​ຂອງ​ເດັກ​ ທີ່ເຂົ້າຮ່ວມ ກາ​ນ​ຝຶກ​ອົບ​ຮົມຂັ້ນ​ຊຸມ​ຊົນ ກ່ຽວ​ກັບ ​ການ​ສ້າງ​ຄວ​າມ​ພ້ອມທາງ​ດ້ານ​ການ​ສົ່ງ​ເສີມ​ການ​ອ່ານ. ຊຶ່ງເປັນ​ໂອ​ກາດ​ທີ່​ໄດ້​ເຮັດ​ໃຫ້​ຂ້ອຍ​ສົ່ງ​ເສີມ​ລູກ ໃນ​ການ​ອ່ານ​; ຂ້ອຍ​ໄດ້​ເຮັດ​ຖ້ານ​ປື້ມ​ໃຫ້​ພວກ​ເຂົາ; ພວກ​ເຮົາ​ໄດ້​ອ່ານ​ປື້ມ​ນຳ​ກັນ, ຂ້ອຍ​ອ່ານ​ໃຫ້​ເຂົາຟັງ, ເຂົາ​ອ່ານ​ໃຫ້​ຂ້ອຍ​ຟັງ; ພວກ​ເຮົາ​ໄດ້​ແບ່ງ​ປັນ​ຄວາມ​ຮັກ​​ໃນການ​ອ່ານ​ປື້ມ​ຮ່ວມ​ກັນ.”

ການ​ຮັກ​ສາ​ປື້ມ​ທີ່​ດີ ແລະ ​ມີບ່ອນເກັບ​ມ້ຽນ​ປື້ມ​ທີ່​ດີ ເປັນ​ສິ່ງ​ທີ່​ສຳ​ຄັນຫຼາຍ​ໃນ​ການ​ສົ່ງ​ເສີມ​ການ​ອ່ານ. ການ​ສ້າງນິ​ໄສ​ການ​ອ່ານ​ ​ທີ່​ດີ ເປັນໜຶ່ງ​ໃນ​ເປົ້າ​ໝາຍ​ຂອງ​ການ​ຝຶກ​ອົບ​ຮົມ ແລະ ເດັກ​ໄດ້​ຮັບ​ການ​ສິດ​ສອນ​ໃຫ້​ຮັກ​ສາ​ປື້ມ​ໃນ​ບ່ອນ​ທ​ີ່​ເໝາະ​ສົມ ແລະ ບໍ່​ປະ​ປື້ມ​ໄວ້​ກາງ​ເຮືອນຫຼັງ​ຈາກ​ທີ່​ອ່ານ​ແລ້ວ. ຄວນ​ເກັບ​ມ້ຽນ​ປື້ມ​ໃຫ້​ຫ່າງ​ຈາກ​ເດັກ​ນ້ອຍ​ ເພື່ອບໍ່​ໃຫ້​ເຂົາ​ເຈົ້າ​ຂຽນ​ຫຼີ້ນ ຫຼື ຈີກ, ແລະ ເກັບ​ໄວ້​ໃຫ້​ຫ່າງ​ຈາກ​ອາ​ຫານ, ເຄື່ອງ​ດື່ມ ຫຼື ສັດ. ນອກນີ້, ກໍ່​ຕ້ອງ​ສອນ​ໃຫ້​ເດັກ​ນ​້ອຍ​ໃຫ້​ຮູ້ຮັກ​ສາ​​ປື້ມ ໂດຍ​ໃຫ້​ເປີດ​ໜ້າ​ເຈ້ຍ​ຄ່ອຍໆ ແລະ ບໍ່​ໃຊ້​ປື້ມ​ບັງ​ແດດ ຫຼື ບັງ​ຝົນ. ສອງ​ບົດ​ສຸດ​ທ້າຍຂອງ​ການ​ຝຶກ​ອົບ​ຮົມ ໄດ້​ສຸມ​ໃສ່ວິ​ທີ​ການ​ຮັກ​ສາ​ປື້ມ​ທີ່​ດີ​ຢູ່​ບ້ານ ແລະ ການ​ສ້າງ​ມຸມ​ການ​ອ່ານ​ຢູ່​ບ້ານ​ທີ່​ເໝາະ​ສົມ.

“ຂ້ອຍໄດ້​ຖາມ ສກມ ຫຼາຍຄຳ​ຖາມ ເພາະ​ວ່າຂ້ອຍບໍ່​ຮູ້​ວິ​ທີ​ເຮັດ​ມຸມ​ການ​ອ່ານ. ເພື່ອນ​ບ້ານ​ຂອງ​ຂ້ອຍ ແລະ ຂ້ອຍ​ໄດ້​ປະ​ກອບ​ສ່ວນ​ໄມ້, ໄມ​້​ໃຜ່, ເຫຼັກ​ຕະ​ປູ, ແລະ ອຸ​ປະ​ກອນ​ເພື່ອ​ເຮັດ​ວຽກ​ໄມ້. ສກມ ໄດ້​ແນະ​ນຳ​ໃຫ້​ພວກ​ເຮົາ​ສ້າງ​ຖ້ານ​ປື້ມ​ທີ່​ດີ.” ສກມ ໄດ້​ອະ​ທິ​ບາຍ​ວ່າ ຖ້ານ​ປື້ມທີ່​ດີ ຕ້ອງ​ມີ​ລວງ​ສູງ​ທີ່​ເໝາະ​ສົມ ຈຶ່ງ​ຈະ​ເຮັດ​ໃຫ້​ມືເດັກສາ​ມາດ​ຢິບ​ຈັບ​ໄດ້. ທ່ານ ໂຮ​ວາ ກ່າ​ວ.” “ພວກ​ເຮົາ​ຍັງ​ໄດ້​ຮຽນ​ຮູ້​ອຸ​ປະ​ກອນ​ການ​ອ່ານ ເຊັ່ນ ບັດ​ຄຳ​ສັບ. ຂ້ອຍ​ໃຫ​້​ລູກ​ຜູ້​ໃຫຍ່​ຂອງ​ຂ້ອຍ​ຊ່ວຍ​ຂຽນ​ໜັງ​ສື ຫຼື ຄ​ຳ​ສັບ​ໃສ່​ບັດ​ຢ່າງ​ເປັນ​ປະ​ຈຳ​; ແລ້ວ​ພວກ​ເຮົາ​ກໍ​ວາງ​ສະ​ແດງ​ຢູ່ມຸມການ​ອ່ານ.”

ຂໍ​ຂອບ​ໃຈ​ກາ​ນ​ຝຶກ​ອົບ​ຮົມ, ທ່ານ. ໂຮ​ວາ ແລະ ທ່ານ ນ. ນູ ຈຶ່ງໄດ້ສ້າງ​ມຸມ​ການ​ອ່ານ​ຂອງ​ຕົນ​ເອງ​ຢູ່​ບ້ານ. ພວກ​ເຂົາ​ໄດ້​ຮຽນ​ຮູ້​ວ່າ ບໍ່​ວ່າ​ພໍ່​ແມ່​ຈະ​ອ່ານ​ປື້ມ​ໄດ້ ຫຼື ບໍ່​ກໍ​ຕາມ, ພວກ​ເຂົາ​ກໍ​ຍັງ​ມີ​ໜ້າ​ທີ່ຫຼັກໃນ​ການ​ສົ່ງ​ເສີມ​ການ​ອ່ານ​ໃນ​ຄອບ​ຄົວ. ການ​ນັ່ງ​ຂ້າງໆ​ລູກ ແລະ ລຸກ​ຍູ້​ໃຫ້​ພວກ​ເຂົາ​ອ່ານ, ຟັງ​ເລື່ອງ​ທີ່​ພວກ​ເຂົາອ່ານໜ້າ​ຕໍ່​ໜ້າ, ຕັ້ງ​ຄຳ​ຖາມ​ກ່ຽວ​ກັ​ບ​ບົດ​ເລື່ອງ ແລະ ອື່ນໆ.. ​ຊ່ວງ​ເວ​ລາ​ຂອງ​ຄອບ​ຄົວ​ທີ່​ດີ​ທັງ​ໝົດ​ນີ້ ຈະ​ຊ່ວຍ​ສົ່ງ​ເສີມ​ເດັກ ແລະ ສ້າງ​ຄວາມ​ສົນ​ໃຈ​ໃນ​ກ​ານ​ອ່ານ​ຂອງ​ພວກ​ເຂົາ​ໄດ້​ດີ.

ແຜນ​ງານ​ບີ​ຄວາ ໂດຍ​ຜ່ານກຸ່ມ​ອົງ​ການຈັດ​ຕັ້ງ​ສາ​ກົນ​ທີ່ບໍ່​ສັງ​ກັດ​ລັດ​ຖະ​ບານ (BNC) ໄດ້​ຊຸກ​ຍູ້ຫຼາຍ​ກິດ​ຈະ​ກຳ​ການ​ອ່ານກັບ​ຊຸມ​ຊົນ​ເຊັ່ນ ການ​ສ້າງ​ຄັງ​ປື້ມ, ການ​ສ້າງ​ສະ​ໂມ​ສອນ​ການ​ອ່ານ ແລະ ການ​ຈັດ​ຕັ້ງ​ການຝຶກ​ອົບ​ຮົມ​ຜູ້​ປົກ​ຄອງ ກ່ຽວ​ກັບ ຄວາມ​ສຳ​ຄັນ​ຂອງ​ການ​ອ່ານ ທີ່ ທ່ານ ນ. ນູ ແລະ ທ່ານ ໂຮ​ວາ​ເຂົ້າ​ຮ່ວມ.