Menu

ກຸ່ມຄູ່ຮ່ວມພັດທະນາຂອງແຜນງານບີຄວາ ທີ່ເປັນອົງການຈັດຕັ້ງສາກົນທີ່ບໍ່ສັງກັດ ລັດຖະບານ ເຫັນໄດ້ເຖິງຄວາມສຳຄັນຂອງ ການລ້າງມື ເພື່ອສົ່ງເສີມການເຂົ້າຮຽນ ແລະ ການມີສ່ວນຮ່ວມໃນໂຮງຮຽນ. ໂດຍການຊ່ວຍ ສ້າງບ່ອນລ້າງມືຢູ່ໂຮງຮຽນປະຖົມ, ການຝຶກອົບຮົມຄູ ແລະ ນັກຮຽນ ກ່ຽວກັບ ວິທີການລ້າງມືດ້ວຍສະບູທີ່ຖືກຕ້ອງ, ແຜນງານບີຄວາເປັນສ່ວນໜຶ່ງທີ່ຈະຊ່ວຍ ປ້ອງກັນພະຍາດໃຫ້ແກ່ເດັກນ້ອຍ, ເຮັດໃຫ້ເດັກນ້ອຍມີສຸຂະພາບທີ່ດີ ແລະ ແຂງແຮງເພື່ອຈະຮຽນໜັງສືໄດ້.

HW_3

ວັນ​ລ້າງ​ມື​ສາ​ກົນໄດ້​ຖືກສະເຫຼີມສະຫຼອງຂຶ້ນ​ຄັ້ງ​ທຳ​ອິດ ​ໃນ​ວັນ​ທີ 15 ຕຸ​ລາ 2008. ຈຸດ​ປະ​ສົງ​ແມ່ນ​ເພື່ອ​ສົ່ງ​ເສີມ​ການ​ລ້າງ​ມື​ດ້ວຍ​ສະ​ບູ ເພື່ອ​ປ້ອງ​ກັນ​ພະ​ຍາດ ແລະ ຊ່ວຍ​ຊີ​ວິດ​ຄົນ.

ກຸ່ມ​ຄູ່ຮ່ວມ​ພັດ​ທະ​ນາ​ຂອງ​ແຜນ​ງານບີ​ຄວາທີ່​ເປັນ​​ອົງ​ການຈັດ​ຕັ້ງ​ສາ​ກົນ​ທີ່ບໍ່​ສັງ​ກັດ​ລັດ​ຖະ​ບານ ໄດ້​ຈັດ​ຕັ້ງປະຕິບັດ​ກິດ​ຈະ​ກຳ​ລ້າງ​ມື​ຢູ່​ບ້ານ​ເປົ້າ​ໝາຍ ໃນຫຼາຍ​ໆບ່ອນທີ່ຢູ່ເຂດ​ຫ່າງ​ໄກ​ສອກຫຼີກ​ໃນ ສ​ປ​ປ ລາວ. ພວກ​ເຂົາ​ໄດ້​​ນໍາໃຊ້ຄວາມຄິດສ້າງສັນໃນການ​ສ້າງ​ບ່ອນລ້າງ​ມື​ຢູ່​ໂຮງ​ຮຽນ​ປະ​ຖົມ  ໂດຍ​ການ​ນຳ​ໃຊ້​ອຸ​ປະ​ກອນ​​ທີ່ໃຊ້​ແລ້ວ ແລະ ລາ​ຄາບໍ່​ແພງຢູ່​ທ້ອງ​ຖິ່ນ​ຂອງ​ພວກ​ເຂົາ. ຕົວ​ຢ່າງ, ບ່ອນລ້າງ​ມືຢູ່​ບາງບ້ານ ​ເຮັດມາຈາກ ໄມ້​ໄຜ່ ແລະ ກະຕຸກ​ນ້ຳດື່ມ​ທີ່​ໃຊ້​ແລ້ວເທົ່ານັ້ນ; ເຊິ່ງໄມ້​ໄຜ່​ແມ່ນ​ນຳ​ໃຊ້​ເພື່ອ​ເປັນທໍ່ລະບາຍ ນໍ້າ ແລະເປັນ​ເສົາແຂວນຕຸກ​ນ້ຳ​ ທີ່ມີຝາປິດ ເຊິ່ງຖືກເຈາະ​ເປັນຮູ ​ ເພື່ອໃຊ້​ເປັນ​ບ່ອນ​ປ່ອຍ​ນ້ຳສຳ​ລັບ​ການ​ລ້າງ​ມື. ບ່ອນ​ລ້າງ​ມືນີ້​​ລາ​ຄາ​ຖືກຫຼາຍ, ມີ​ປະ​ສິດ​ທິ​ພາບ ແລະຊຸມຊົນ​ສາ​ມາດສ້າງເອງໄດ້​ຢ່າງ​ງ່າຍ​ດາຍ​!

ບ່ອນ​ລ້າງ​ມື​ແມ່ນ​ຍັງ​ໄດ້​ຖືກ​ອອກ​ແບບພິເສດ ເພື່ອໃຫ້ແທດ ເໝາະສົມກັບ​ການ​ນຳ​ໃຊ້ຂອງ​ນັກ​ຮຽນ​ປະ​ຖົມ ໂດຍ​ຄຳ​ນຶງ​ເຖິງ​ຄວາ​ມ​ສູງ​ຂອງ​ເດັກ​ນ້ອຍ, ໄລ​ຍະ​ຫ່າງ​ຂອງ​ເດັກ​ແຕ່​ລະ​ຄົນ​ໃນ​ການ​ລ້າງ​ມື ແລະ ຄວາມ​ສູງ​ລະ​ຫວ່າງ​ກ໋ອກນ້ຳ ແລະ ອ່າງ​ລ້າງ​ມື ເພື່ອ​ຮັບ​ປະ​ກັນ​ວ່າບ່ອນ​ລ້າງ​ມື ​ມີ​ຄວາມ​ເໝາະ​ສົມ​ສຳ​ລັບ​ເດັກ​ນ້ອຍນັກ​ຮຽນ. ສິ່ງເຫຼົ່ານີ້​ເປັນ​ສິ່ງ​ສຳ​ຄັນ ​ຖ້າ​ວ່າ​​ພວກເຮົາ​ຕ້ອງ​ການ​ໃຫ້​ການ​ລ້າງ​ມື ກາຍ​ເປັນ​ກິດ​ຈະ​ວັດ​ປະ​ຈຳ​ວັນ​ຂອງພວກ​ ເຂົ​າ.

ທາງແຜນງານ​ດັ່ງ​ກ່າວ​ໄດ້​ຝຶກ​ອົບ​ຮົມໃຫ້​ແກ່​ຄູ ແລະ​ ນັກ​ຮຽນ ກ່ຽວ​ກັບ ວິທີ​ການ​ລ້າງ​ມື​ທີ່​ຖືກ​ຕ້ອງ ດ້ວຍເຈັດ​ຂັ້ນ​ຕອນ. ການ​ລ້າງ​ມື​ດ້ວຍ​ສະ​ບູ​ສາ​ມາດ​ຂ້າເຊື້ອ​ພະ​ຍາດ ແລະ ຫຼຸດ​ຜ່ອນ​ພະ​ຍາດ​ທີ່​ມາກັບ​ນ້ຳເຊັ່ນ ພະ​ຍາດ​ຖອກ​ທ້ອງ ເຊິ່ງ​ເປັນໜຶ່ງ​ໃນ​ສາ​ເຫດ​ຫຼັກ​ທີ່​ເຮັດໃຫ້ເດັກ​ນ້ອຍ​ຂາດ​ໂຮງ​ຮຽນ.

ເມື່ອ​ເດັກ​ນ້ອຍ​ເຫຼົ່າ​ນີ້ມີສຸຂະພາບດີ, ພວກ​ເຂົາ​ຈະ​ສາ​ມາດ​ໄປ​ໂຮງ​ຮຽນ​ໄດ້​ຢ່າງ​ເປັນ​ປົກ​ກະ​ຕິ, ເຂົາເຈົ້າຈະແຂ​ງ​ແຮງ ແລະ ມີສະມາທິຮຽນໜັງສື​ໄດ້ ແລະ ສາ​ມາດສຳ​ເລັດ​ການ​ສຶກ​ສາ​ຂັ້ນພື້​ນ ​ຖານ​ຂອງພວກ​ເຂົາ​ໄດ້​ເປັນ​ຢ່າງ​ດີ.

ນອກ​ຈາກ ​ວິທີ​ການ​ລ້າງ​ມືດ້ວຍ​ສະ​ບູ​​ທີ່​ຖືກ​ຕ້ອງ​ແລ້ວ, ການ​ຝຶກ​ອົບ​ຮົມ​ຍັງ​ໄດ້ແນະ​ນຳ​ເວ​ລາ​ທີ່​ຕ້ອງ​ລ້າງ​ມືເຊັ່ນ: ກ່ອນ​ກິນ​ເຂົ້າ, ຫຼັງ​ຈາກ​ເຂົ້າ​ຫ້ອງ​ນ້ຳ​ແລ້ວ ແລະ ຫຼັງ​ຈາກການ​ເບິ່ງ​ແຍງ​ຄົນ​ເຈັບ.

ການ​ລ້າງ​ມື​ທີ່ຖືກຕ້ອງ ບໍ່​ພຽງ​ແຕ່​ເຮັດ​ໃຫ້​ນັກ​ຮຽນ​ມີ​ສຸ​ຂະ​ພາບ​ດີແລະມາ​ໂຮ​ງ​ຮຽນ ແຕ່​ຍັງ​ມີ​ປະ​ໂຫຍ​ດ​ຕໍ່ຊຸມ​ຊົນ​ອີກ​ດ້ວຍ. ການ​ຝຶກ​ອົບ​ຮົມໄດ້​​ສົ່ງ​ເສີມໃຫ້​ນັກ​ຮຽນ ເປັນ​ແບບຢ່າງໃນ​ການເຜີຍ ແຜ່ວິ​ທີການ​ລ້າງ​ມືທີ່​ຖືກ​ຕ້ອງ​ໃຫ້​ແກ່​ຄອບ​ຄົວ​ຂອງ​ພວກ​ເຂົາອີກ​ດ້ວຍ.