Menu

ໃນເດືອນກັນຍາ 2019, ນັກຮຽນຂັ້ນ ປ. 1 ທົ່ວປະເທດຈະເລີ່ມສົກຮຽນໃໝ່ ຊຶ່ງຈະນຳໃຊ້ຫຼັກສູດ ແລະ ສື່ການຮຽນການສອນສະບັບປັບປຸງໃໝ່.

CACIM group photo BQ

ໃນ​ວັນ​ທີ 4 – 6 ທັນ​ວາ, ​ສະ​ມາ​ຊິກຄະ​ນະ​ກຳ​ມະ​ການຮັບຮອງ ຫຼັກ​ສູດ ແລະ ສື່​ການຮຽນ​ການ​ສອນ ຈຳ​ນວນ 23 ທ່ານ ຊຶ່ງ​ເປັນປະ​ທານໂດຍ ​ທ່ານ ຮ​ສ. ປ​ອ. ຄຳ​ຜາຍ ສີ​ສ​ະ​ຫວັນ, ຮອງ​ລັດ​ຖະ​ມົນ​ຕີ​ກະ​ຊວງ​ສຶກ​ສາ​ທິ​ການ ແລະ ກິ​ລາ, ຈະ​ຮ່ວມ​​​ກັນ​ກວດ​ຜ່ານ ແລະ ພິ​ຈາ​ລະ​ນາ​ຮັບ​ຮອງປຶ້ມ​ແບບ​ຮຽນ ແລະ ຄູ່​ມື​ຄູ ສຳລັບຂັ້ນ ປ. 1 ທີ່​ຈະ​ແຈກ​ຢາຍ​ໃຫ້​ແກ່​ໂຮງ​ຮຽນ​ປະ​ຖົມ​ທົ່ວ​ປະ​ທດ ໃນ​ສົກ​ຮຽນ 2019/2020.

ໃນຂັ້ນ​ຕອນ​ການກວດ​ຜ່ານ ແລະ ການຮັບ​ຮອງຫຼັກ​ສູດ ໂດຍ​ສ​ະ​ເພາະ​ແມ່ນ​​ຕົ້ນ​ສະ​ບັບ​ປຶ້ມ​ແບບ​ຮຽນ ແລະ ຄູ່​ມື​ຄູ, ສື່​ການ​ຮຽນ​ການ​ສອນນັບວ່າມີ​ຄວາມສຳ​ຄັນ ເພາະ​ເປັນ​ການ​ຮັບ​ຮອງ​ຄຸນ​ນະ​ພາບ​ຂອງ​ຕົ້ນ​ສະ​ບັບ​ວ່າ ສາ​ມາດ​ນຳ​ໃຊ້​ໄດ້ຫຼືບໍ່ ຫຼື​ຄວນ​ປັບ​ປຸງ​ຕື່ມ​ແນວ​ໃດ​ ກ່ອນ​ຈະ​ສະ​ເໜີ​ເຖິງ​​ລັດ​ຖະ​ມົນ​ຕີ​ກະ​ຊວງ​ສຶກ​ສາ​ທິ​ການ ແລະ ກິ​ລາ ​ອະ​ນຸ​ມັດ​ຈັດ​ພິມ ແລະ ນຳ​ໃຊ້​ຕໍ່​ໄປ.” ທ່ານ ປອ. ອ່ອນ​ແກ້ວ​ ກ່າວ.

ຂັ້ນ​ຕອນນີ້ແມ່ນ​ຂັ້ນ​ຕອນ​ສຸດ​ທ້າຍ ຂອງຂະ​ບວນ​ການ ທີ່ໄດ້​​ລິ​ເລີ່ມ ຕັ້ງ​ແຕ່ປີ 2015 ເມື່ອ​ກະ​ຊວງ​ສຶກ​ສາ​ທິ​ການ ແລະ ກິ​ລາ ໄດ້ຕັດສິນໃຈ​​ປັບ​ປຸງຫຼັກ​​ສູດຊັ້ນ​ປະ​ຖົມ​ສຶກ​ສາ ແລະ ພັດທະ ນາສື່​ການ​ຮຽນ​ການສອນ​ໃໝ່ ສຳ​ລັບ​ຄູ ແລະ ນັກ​ຮຽນ. ສື່​ການ​ຮຽນ​ການ​ສອນໃໝ່ ​ໄດ້​ຮັບ​ການ​ທົດ​ລອງ​ຢູ່​ໃນໂຮງ​ຮຽນ​ທີ່​ຖືກ​ຄັດ​ເລືອກໃນຫຼາຍພາກ​ທົ່ວ​ປະ​ເທດ ແລະ ໄດ້ຮັບ​ການ​ປັບ​ປຸງ​ອີງ​ຕາມ​ຄຳ​ຄິດ​ຄຳ​ເຫັນ​ຈາກ​ການ​ທົດ​ລອງ ລວມ​ທັງ​ຈາກ​ການ​ປຶກ​ສາ​ຫາ​ລື​ກັບຄູ​ສອນ ກ່ອນ​ການ​ນຳ​ສະ​ເໜີ​ໃຫ້​ແກ່​ຄະ​ນ​ະ​ກຳ​ມະ​ການ​ໃນ​ອາ​ທິດ​ນີ້. ໃນ​ໄລ​ຍະ​ການ​ປະ​ຊຸມອັນ​ສຳ​ຄັນ ໃນ 3 ມື້, ຫົວ​ໜ້າ​ທີມ​ຂອງແຕ່​ລະ​ວິ​ຊາ ຈາກ​ທີມ​ພັດ​ທະ​ນາຫຼັກ​ສູດ ໃນສະ​ຖາ​ບັນ​ຄົ້ນ​ຄວ້າ​ວິ​ທະ​ຍາ​ສາດ​ການ​ສຶກ​ສາ (ສວ​ສ) ຈະ​ນຳ​ສະ​ເໜີ​ວິ​ຊາ​ທີ່​ຕົນ​ຮັບ​ຜິດ​ຊອບ ພ້ອມ​ທັງ​ຕອບ​ຄຳ​ຖາມ ຈາກຄະ​ນະ​ກຳ​ມະ​ການ. ຫຼັງ​ຈາກນັ້ນ ຄະ​ນະ​ກຳ​ມະ​ການ​ຈະປະກອບຄວາມ ເຫັນກ່ຽວກັບຈຸດບົກພ່ອງທີ່ຄວນປັບປຸງ,   ຖາມໃນຈຸດທີ່ບໍ່ຈະ ແຈ້ງ ຫຼື ໃຫ້ຄໍາແນະນໍາ ແລະ ສຸດທ້າຍ ຈະລົງຄວາມເຫັນ ຮັບຮອງ ບົນພື້ນຖານຄວາມຄິດເຫັນ ຂອງຄະນະກໍາມະການ, ນັກວິຊາການ ສວສ ຈະນໍາໄປປັບປຸງຕົ້ນສະບັບເປັນ ຄັ້ງສຸດທ້າຍ.

ສື່​ການ​ຮຽນ​ການ​ສ​ອນ​ໃໝ່ໄດ້ຖືກພັດທະນາຢ່າງຮອບດ້ານ: ນັກ​ຮຽນ​ຂັ້ນ ປ. 1 ທຸກ​ຄົ​ນ ຈະ​ໄດ້​ຮັບຊຸດ​ປຶ້ມ​ແບບ​ຮຽນ ສະ​ບັບ​ປັບ​ປຸງ​ໃໝ່ 1 ຊຸດ ຊຶ່ງ​ປະ​ກອບ​ມີ ວິ​ຊາ​ພາ​ສາ​ລາວ, ວິ​ທະ​ຍາ​ສາດ ແລະ ສິ່ງ​ແວດ​ລ້ອມ ແລະ ຄຸນ​ສົມ​ບັດ. ປຶ້ມ​ແບບ​ຮຽນ​ໃໝ່​ຈະ​ມີ​ສີ​ສັ​ນຫຼາຍ​ຂຶ້ນ ລວມ​ທັງມີ​ຮູບ​ພາບ ແລະ ເສັ້ນສະແດງ​ຕ່າງໆ ​ເພື່​ອ​ຊ່ວຍ​ໃຫ້​ເດັກເຂົ້າໃຈ​ໄດ້​ດີ​ຂຶ້ນ, ດຶງດູດຄວາມ ສົນໃຈ ແລະ ເພີ່ມ​ຄວາມ​ຈື່​ຈຳຂອງເດັກ. ຄູ​ສອນ​ຂັ້ນ ປ. 1 ແລະ ຜູ້​ອຳ​ນວຍການທຸກ​ຄົນ ຈະ​ໄດ້​ຮັບ​ຊຸດ​ຄູ່​ມື​ຄູ ສະ​ບັບ​ປັບ​ປຸງ​ໃໝ່ 1 ຊຸດ ສຳ​ລັບ​ວິ​ຊາ​ພາ​ສາ​ລາວ, ວິ​ທະ​ຍາ​ສາດ ແລະ ສິ່ງ​ແວດ​ລ້ອມ, ຄຸນ​ສົມ​ບັດ, ສິ​ລະ​ປະ ແລະ ຫັດ​ຖະ​ກຳ, ກາ​ຍະ​ສຶກ​ສາ ແລະ ດົນ​ຕີ. ຄູ່​ມື​ຄູ​ໃໝ່ ຈະ​ມີ​ລາຍ​ລະ​ອຽດ​ຫຼາຍ​ຂຶ້ນ ແລະ ມີ​ຄຳ​ແນະ​ນຳ​ກ່ຽວ​ກັບ​ບົດ​ສອນແຕ່ລະຂັ້ນຕອນລະອຽດ, ຄຳ​ແນະ​ນຳ​ກ່ຽວ​ກັບ​ການ​ປະ​ເມີນນັກ​ຮຽນ, ວິ​ທີ​ການ​ນຳ​ໃຊ້​ສື່​ການ​​ຮຽນ​ການສອນ​ຈາກ​ທ້ອງ​ຖິ່ນ ແລະ ການ​ສ້າງ​ກິດ​ຈະ​ກໍາ​ເສີມ​ໃຫ້​ແກ່​ເດັກ. ນອກນັ້ນ,​ ຄູ່​ມື​ຄູ ​ກໍ​ຍັງ​ມີ​ຍຸດ​ທະ​ສາດ ແລະ ກິດ​ຈະ​ກຳ​ເພື່ອ​ຊ່ວຍ​ຄູ​ສອນ​ນັກ​ຮຽນ​ທີ່ບໍ່ເວົ້າ​ພາ​ສາ​ລາວເປັນພາສາແມ່​ອີກ​ດ້ວຍ.

ນອກ​ຈາກນີ້, ຫ້ອງ ປ. 1 ທຸກ​ຫ້ອງ ກໍ​ຍັງ​ຈະ​ໄດ້​ຮັບ​ຊຸດ​ການ​ຮຽນ​ການ​ສອນ ທີ່ປະກອບດ້ວຍ​ສື່​ການ​ຮຽນ​ການ​ສອນ ເຊັ່ນ ບັດ​ຄຳ​ສັບ ແລະ ໂປ​ສະ​ເຕີ ເພື່ອ​ຈັດກິດ​ຈະ​ກຳ​ໃນ​ຫ້ອງຮຽນ, ປຶ້ມ​ນິ​ທານ​ທີ່​ເໝາ​ະ​ສົມ​ຕາມ​ເກນ​ອາ​ຍຸ ເພື່ອ​ຊ່ວຍ​ການ​ຮຽນການ​ສອນ​ພາ​ສາ​ລາວ ແລະ ຊຸດປຶ້ມ​ອ່ານເສີມ ເພື່ອ​ຊ່ວຍ​ພັດ​ທະ​ນາ​ການ​ຮູ້​ໜັງ​ສື​ສຳ​ລັບ​​ເດັກນ້ອຍ. ເນື້ອໃນປຶ້ມ​ແບບ​ຮຽນ, ສື່​ກາ​ນ​ຮຽນ​ກາ​ນ​ສອນ ແລະ ກິດ​ຈະ​ກຳ​ຕ່າງໆ ໄດ້​ຖືກ​ອອກ​ແບບ​ຢ່າງ​ຮອບ​ຄອບ ເພື່ອ​ຮັບ​ປະ​ກັນ​ວ່າຫຼັກ​ສູດ​ສະ​ບັບ​ປັບ​ປຸງ​ໃໝ່​ແມ່​ນ​ມີ​ຄວາມ​ພໍ​ດີ ແລະ ເໝາະ​ສົມ​ກັບ​ນັກ​ຮຽນ​ທຸກ​ຄົນ.

ພາຍຫຼັງການຮັບຮອງຈາກຄະ​ນະ​ກຳ​ມະ​ການຮັບຮອງຫຼັກ​ສູດ ແລະ ສື່່​ການຮຽນ​ການ​ສອນ, ການ​ຈັດ​ພິມ ແລະ ແຈກ​ຢາຍ​ສື່ການຮຽນການສອນ​ດັ່ງ​ກ່າວໃຫ້​ແກ່​ທຸກ​ໂຮງ​ຮຽນ​ທົ່ວ​ປະ​ເທດ ຈະ​ແມ່ນໜຶ່ງໃນວຽກສຳຄັນຂອງກະຊວງສຶກສາທິການ ແລະ ກິລາ. ອຳ​ນວຍ​ການ​ໂຮງ​ຮຽນ, ຄູ​ສອນ​ຂັ້ນ ປ. 1 ແລະ ຄູ​ນິ​ເທດ ຈະ​ໄດ້​ຮັບ​ການ​ຝຶກ​ອົບ​ຮົມ ແລະ ສະ​ໜັບ​ສະ​ໜູນ.

ນອກນັ້ນ, ນັກ​ພັດ​ທະ​ນາຫຼັກ​ສູດ​ຈາກ ສ​ສກ ​ກໍ​ພວມພັດທະນາຊຸດການ​ຝຶກ​ອົບ​ຮົມ ເພື່ອ​ແນະ​ນຳຫຼັກ​ສູດ​ໃໝ່ ແລະ ສ້າງ​ຄວາມ​ລຶ້ງເ​ຄີຍ​ກັບ​ການ​ນຳ​ໃຊ້​ສື່​ການ​ຮຽນ​ການ​ສອນ​ໃໝ່ ​ໃຫ້​ແກ່​ຜູ້​ທີ່ຈະນຳ​ໃຊ້​ໃນ​ອະ​ນາ​ຄົດ. ທີມ​ງານ​ທີ່​ປະ​ກອບມີ​ຄູ​ຝຶກຫຼັກ​ແຫຼ່ງ 50 ທ່ານ ແລະ ຄູ​ຝຶກ​ປະ​ຈຳ​ແຂວງຫຼາຍກວ່າ 600 ທ່ານ ໄດ້​ຖືກ​ຄັດ​ເລືອກເປັນ​ທີ່​ຮຽບ​ຮ້ອຍ​ແລ້ວ ແລະ ກຳ​ລັງ​ກະ​ກຽ​ມຄວາມ​ພ້ອມ​ ໃນ​ການ​ຝຶກ​ອົບ​ຮົມ ພ້ອມ​ທັງ​ການ​ຕິດ​ຕາມ​ຊ່ວຍ​ເຫຼືອຄູ​ສອນ.

ລະ​ບົບ​ການ​ສຶກ​ສາ​ທີ່​ມີ​ຄຸນ​ນະ​ພາບດີ​ຢູ່​ປະ​ເທດ​ຕ່າງໆໃນ​ທົ່ວ​ໂລກ ແມ່ນ​​ມີ​ພື້ນ​ຖານມາ​ຈາກ​ລະ​ບົບ​ຊັ້ນ​ປ​ະ​ຖົມ​ສຶກ​ສາ​ທີ່​ດີ.” ທ່ານນາງ ເຄ​ທີ ສະ​ມິດ, ເລ​ຂາ​ເອກ ສະ​ຖານ​ທູດ​ອົດ​ສະ​ຕ​ຣາ​ລີ ປະ​ຈຳ ສ​ປ​ປ ລາວ ກ່າວເປີດໃນ​ກອງ​ປະ​ຊຸມຄະ​ນະ​ກຳ​ມະ​ການຮັບຮອງຫຼັກ​ສູດ ແລະ ສື່​ການຮຽນ​ການ​ສອນ. “ການ​ຮັບ​ປະ​ກັນ​ວ່ານັກ​ຮຽນ ​ຮຽນ​ຈົບ​ຊັ້ນ​ປະ​ຖົມ ດ້ວຍ​​ພື້ນ​ຖານ​ການ​ຮຽນ​ຮູ້ໜັງ​ສື​ ແລະ ການ​ຄິດ​ໄລ່​ເລກທີ່​ດີ ແມ່ນ​ມີສ່ວນ​ສຳ​ຄັນ​ທີ່​ຈະ​ເຮັດ​ໃຫ້​ພວກ​ເຂົາ​ເຂົ້າ​ຮຽນ ແລະ ສຳ​ເລັດການ​ສຶກ​ສາ​ຊັ້ນມັດ​ທະ​ຍົມ​ສຶກ​ສາ ແລະ ການ​ສຶກ​ສາ​ຊັ້ນ​ສູງ.

ສ​ສກ ໄດ້ຮັບການສະໜັບສະໜູນໂດຍລັດຖະບານອົດສະຕຣາລີ ແລະ ສະຫະພາບເອີຣົບ ໂດຍຜ່ານ​ແຜນ​ງານ​ບີ​ຄວາ ໃນການ ພັດທະນາ ແລະ ຈັດຕັ້ງປະຕິບັດຫຼັກສູດຊັ້ນປະຖົມສະບັບປັບປຸງ ໃໝ່ 8 ວິ​ຊາ. ການ​ປັບ​ປຸງ​ດັ່ງ​ກ່າວ​ຈະ​​ດຳ​ເນີນ​ໄປ ປີ​ລະ​ຂັ້ນ​ຮຽນ, ເລີ່ມຈາກ ຂັ້ນ ປ. 1 ໃນ​ເດືອນ​ກັນ​ຍາ 2019. ສຳ​ລັບ​ວິ​ຊາ​ຄະ​ນິດ​ສາດ​ແມ່ນ​ໄດ້​ຮັບ​ການ​ສະ​ໜັບ​ສະ​ໜູນ​ໂດຍອົງ​ການ​ໄຈ​ກາ ແລະ ໄດ້ເລີ່ມ​ຈັດ​ຕັ້ງ​ປະ​ຕິ​ບັດຈາກ​ຂັ້ນ ປ. 1 ​ໃນ​ເດືອນ​ກັນ​ຍາ 2018 ທີ່ຜ່ານ​ມາ.