Menu

ຄູຝຶກຫຼັກແຫຼ່ງຂັ້ນສູນກາງ ຈາກກະຊວງສຶກສາທິການ ແລະ ກິລາ ແລະ ຈາກຂັ້ນທ້ອງຖິ່ນ ທັງໝົດ 17 ແຂວງ ແລະ 1 ນະຄອນຫຼວງວຽງຈັນ ໄດ້ເຂົ້າຮ່ວມການຝຶກອົບຮົມການສ້າງຂີດຄວາມສາມາດໃຫ້ແກ່ຄູຝຶກຫຼັັກແຫຼ່ງ ຄັ້ງທີ 1 ຊຶ່ງໃຊ້ເວລາ 5 ວັນ ເພື່ອພັດທະນາທັກສະການໃນການເປັນຄູຝຶກ ແລະ ຄວາມຮູ້ທີ່ກ່ຽວຂ້ອງ ເພື່ອກຽມຄວາມພ້ອມໃຫ້ຄູຝຶກຫຼັກແຫຼ່ງໃຫ້ກາຍເປັນຄູຝຶກທີ່ເຂັ້ມແຂງ ແລະ ມີຄຸນະພາບ.

MT Dec 001

MT Dec 002

MT Dec 003

ການ​ຝຶກ​ອົບ​ຮົມຄູ​ປະ​ຈຳ​ການໃນການນໍາໃຊ້ຫຼັດສູດຊັ້ນປະຖົມ ແມ່ນ​ມີ​ຄວາມສຳ​ຄັນໃນ​ການ​ກະ​ກຽມ​ຄວາມ​ພ້ອມ​ໃຫ້​ຄູ​ໃຫ້ມີ​ຄວາມ​ສາ​ມາດ​ຈັດ​ຕັ້ງ​ປະ​ຕິ​ບັດຫຼັກ​ສູດຊັ້ນ​ປະ​ຖົມ​ສຶກ​ສາສະ​ບັບ​ປັບ​ປຸງໃໝ່​ໄດ້ຢ່າງມີ​ປະ​ສິດ​ທິ​ພາບ. ​ສະ​ນັ້ນ ຈຸດ​ປະ​ສົງ​ຂອງ​ການ​ຝຶກ​ອົບ​ຮົມໃນ​ຄັ້ງ​ນີ້​​ແມ່ນ​​ເພື່ອສ້າງທັກ​ສະ​​ ແລະ ເຕັກ​ນິກ​ທີ່​ຈຳ​ເປັນຕ່າງໆທີ່ກ່ຽວຂ້ອງໃຫ້​ແ​ກ່​ຄູ​ຝຶກຫຼັກ​ແຫຼ່ງເພື່ອ​ເຮັດ​ໃຫ້​ການ​ນຳ​ໃຊ້​ສື່​ການ​ຮຽນ​ການ​ສອນໃນ​ຫ້ອງ​ຮຽນ​ມີ​ປະ​ສິດ​ຕິ​ພາບ ແລະ ເປັນ​ການ​ປັບ​ປຸງ​ຜົນ​ການ​ຮຽນ​ຂອງ​ນັກ​ຮຽນ.

ພາຍຫຼັງ​ທີ່​ໄດ້​ມີ​ການ​ຄັດ​ເລືອກ​ຄູ​ຝຶກຫຼັກ​ແຫຼ່ງ ແລະ ຄູ​ຝຶກ​ປະ​ຈຳ​ແຂວງ​ໃນ​ເດືອ​ນ​ຕຸ​ລາ 2018, ກໍ​ໄດ້​ມີ​ການຈັດການ​ຝຶກ​ອົບ​ຮົມ​ການ​ສ້າງ​ຂີດ​ຄວາມ​ສາ​ມາດ​ໃຫ້​ແກ່​ຄູ​ຝຶກຫຼັັກ​ແຫຼ່ງ ຄັ້ງ​ທີ 1 ຂຶ້ນ​ ​ຊຶ່ງ​ໃຊ້​ເວ​ລາ 5 ມື້ ໃນ​ຕົ້ນ​ເດືອນ​ທັນ​ວ​າ 2018 ທ​ີ່​ຜ່ານ​ມາ. ຈຸດ​ປະ​ສົງ​ຂອງ​ການ​ຝຶກ​ອົບ​ຮົມ​ແມ່ນ​ເພື່ອ​ສ້າງ​ຂີດ​ຄວາມ​ສາ​ມາດ​ໃຫ້​ຄູ​ຝຶກຫຼັກ​ແຫຼ່ງ​​ທາງ​ດ້ານການ​ວາງ​ແຜນ ແລະ ​ຄວາມສາ​ມາດ​ໃນ​ການຈັດຝຶກ​ອົບ​ຮົ​ມ​ຄູຝຶກປະຈໍາແຂວງ​ໃຫ້ມີ​ຄຸນະ​ພາບ.

ຄູ​ຝຶກຫຼັກ​ແຫຼ່ງ​ມີ​ບົດ​ບາດ​ສຳ​ຄັນ​ໃນ​ການ​ຝຶກ​ອົບ​ຮົມ​ຄູ​ຝຶ​ກ​ປະ​ຈຳ​ແຂວງ ແລະ ການ​ສະ​ໜັບ​ສະ​ໜູນ​ການ​ຝຶກ​ອົບ​ຮົມ​ຄູ​ຝຶກ​ປະ​ຈຳ​ການ. ດັ່ງນັ້ນ, ຄູ​ຝຶກຫຼັກ​ແຫຼ່ງ​ຕ້ອງ​​ມີ​ທັກ​ສະ​ການວາງ​ແຜນ ແລະ ​ຄວາມສາມາດໃນ​ການຈັດ​ຕັ້ງ​ປະ​ຕິ​ບັດ​ກິດ​ຈະ​ກຳ​ເຫຼົ່າ​ນີ້​ ຢ່າງ​ມີ​ປະ​ສິດ​ຕິ​ພາບ ແລະ ປະ​ສິດ​ຕິ​ຜົນ.

ການ​ຝຶກ​ອົບ​ຮົມ​ໄດ້​ສຸ​ມ​ໃສ່ການ​​ພັດ​ທະ​ນາ​ທັກ​ສະ​ ແລະ ຄວາມ​ຮູ້ຕ່າງໆທີ່​ຄູ​ຝຶກຫຼັກ​ແຫຼ່ງ​ມີ​ຢູ່​ແລ້ວໃຫ້ດີຂຶ້ນ, ລວມ​ທັງ​ປະຕິບັດກິດ​ຈະ​ກຳ​ຕ່າງໆໃນ​ການ​ຊອກ​ຫາ​ຈຸດເຂັ້ມ​ແຂງ ແລະ ຄວາມ​ສາ​ມາດ​ຂອງ​​ຄູ​ຝຶກຫຼັກ​ແຫຼ່ງແຕ່ລະຄົນ. ຜູ້​ເຂົ້າ​ຮ່ວມ​ໄດ້​ຮຽນ​ຮູ້ ແລະ ພັດ​ທະ​ນາທັກ​ສະ ແລະ ທັດສະ​ນະ​ການ​ເປັນ​ຄູ​ຝຶກ​ທີ່​ດີ, ລວມ​ທັງພັດທະນາ​ຄວາມ​ເຂົ້າ​ໃຈ​ກ່ຽວ​ກັບພາລະບົດ​ບາດ ແລະ ຄວາມ​ຮັບ​ຜິດ​ຊອບ​ຂອງ​ຄູ​ຝຶກຫຼັກ​ແຫຼ່ງ. ການຝຶກອົບຮົມຍັງລວມມີ​ການ​ສັງ​ເກດ​ການ​ສອນຕົວ​ຈິງ​ໃນ​ຫ້ອງຮຽນຊັ້ນປະຖົມ ແລະ ເບິ່ງວິ​ດີ​ໂອ​ກ່ຽວກັບການ​ຈັດ​ກິດຈະກຳ​ການ​ຮຽນ-​ການ​ສອນ ເພື່ອ​ສ້າງ​ໂອ​ກາດ​ຜູ້​ເຂົ້າ​ຮ່ວມຮຽນ​ຮູ້​ກ່ຽວ​ກັບ​ສະ​ພາບ​ການ​ຮຽນ​-ການສອນໃນ​ຫ້ອງ​ຮຽນ​ຊັ້ນປະຖົມ, ຮູ້​ປຽບ​ທຽບ ແລະ ເຫັນ​ຄວາມ​ແຕກ​ຕ່າງ​ຂອງວິ​ທີ​ການ​ຮຽນ-​ການ​ສອນໃນຫຼັກ​ສູດ​ທີ່ນໍາໃຊ້ໃນປັດ​ຈຸ​ບັ​ນ ແລະ ຫຼັກ​ສູດ​ສະ​ບັບ​ປັບ​ປຸງ​ໃໝ່. ຈຸດ​ສຸມ​ຂອງ​ການ​ສ້າງ​ທັກ​ສະ​ການ​ອຳ​ນວຍ​ຄວາມ​ສະ​ດວກໃຫ້​ຄູ​ຝຶກຫຼັກ​ແຫຼ່ງແມ່ນ​ການ​ຝຶກ​ຫັດ​ການ​ເປັນ​ຄູ​ຝຶກ​ຕາມ​ຫົວ​ຂໍ້​ທີ່​ກຳ​ນົດໄວ້.

ການ​ຝຶກ​ອົບ​ຮົມ​ດັ່ງ​ກ່າວນີ້ ເປັນ​ການ​ລິ​ເລີ່ມ​ທີ່​ສຳ​ຄັນ​ຕາມ​ກຳ​ນົດ​ເວ​ລາ​ຂອງ​ການ​ຝຶກ​ອົບ​ຮົມ​ຄູ​ປະ​ຈຳ​ການທີ່​ຈະ​ສະ​ໜັບ​ສະ​ໜູນ ການ​ຈັດ​ຕັ້ງ​ປະ​ຕິ​ບັດ​ຫຼັກ​ສູດຊັ້ນ​ປະ​ຖົມ​ສຶກ​ສາ ຂັ້ນ ​ປ. 1 ໃນ​ປີ 2019. ຕໍ່​ໄປ​ ສະ​ຖາ​ບັນ​ຄົ້ນ​ຄວ້າວິ​ທະ​ຍາ​ສາດ​ການ​ສຶກ​ສາ ຈະ​ມີ​ການ​ຝຶກ​ອົ​ບ​ຮົມການ​ສ້າງ​ຂີດ​ຄວາມ​ສາ​ມາດ​ໃຫ້​ແກ່​ຄູ​ຝຶກຫຼັັກ​ແຫຼ່ງ ຄັ້ງ​ທີ 2 ຊຶ່ງ​ໃຊ້​ເວ​ລ​າອີກ 5 ວັນໃນ​ເດືອນ​ມັງ​ກອນ 2019. ຈາກນັ້ນ,​ຄູຝຶກຫຼັກແຫຼ່ງຈະຈັດການ​ຝຶກ​ອົ​ບ​ຮົມການ​ສ້າງ​ຂີດ​ຄວາມ​ສາ​ມາດ​ໃຫ້​ແກ່​ຄູຝຶກ​ປະ​ຈຳ​ແຂວງ 17 ແຂວງ ແລະ 1 ນະຄອນຫຼວງໃນ​ເດືອນ​ກຸມ​ພາ 2019 ຕາມ​ລຳ​ດັບ. ​ສຳ​ລັບ​ການ​ຝຶກ​ອົບ​ຮົມຄູ​ຝຶກຫຼັກ​ແຫຼ່ງ ແລະ ​ຄູ​ຝຶກ​ປະ​ຈຳ​ແຂວງ ສຳ​ລັບ​ຂັ້ນ ປ. 1 ແມ່ນ​ຈະ​ຈັດຂຶ້ນ​ໃນເດືອນພຶດ​ສະ​ພາ-ມິ​ຖຸ​ນາ 2019.

BEQUAL